ХIурмат бусса имамтал, исламрал вузирдал муаьллимтал ва динчитал! Жува хIакьину ялапар хъанай буру хъинну анаварну даххана хъанахъисса дунияллий, жунма сантирай чулийн буккан буван багьлай бур чIявусса масъалартту.

Къабяйкьинсса ку­ццуй ми масъалартту щаллу булланшиврул диндалул ххуллу-хха бувгьуминнал дикIан аьркинни куртIсса кIулшивуртту, бюхъу ва опыт. Хаснува инсантурал масъалартту чулийн буккан бавриву хIукму бувайсса, бази бувайсса имамтураяр ихтилат. Зу чара бакъа зулла кIулшивурттту куртIгу, цIакьгу дуллан аьркинссару, лавхьхьумуний гьашиву къадурну, динийсса ва дуниявийсса кIулшивурттал хъирив багьан аьркинссару.Ттизаманнул динчинал, так диний­сса кIулшиву дакъагу, дикIан аьркинссар гьарцагу аралуву­сса гьанулул кIулшивуртту. Хавар бикIан аьркинссар элмулул ва дунияллул иширттая, кIулну дикIан аьркинссар законну, кIулну бикIан аьркинссар тарих, культура. КIулну бикIан аьркинссар мукунма интернетраву зун, ттизаманнул техникалул средстварттал кумаграйну информациялул ва идеологиялул даву сантирай дачин дуван жяматрал дянив. Зун мукунма ххуйну кIулну бикIан аьркин­ссар кьатIаллил билаятирттал мазру, бувчIинну ххуйну зула пикрирду оьрус мазрай аьч буван, жагьилтурал суаллахьхьун мяълумну жаваб дулун.
Цала ихтилатраву билаятрал Президент Владимир Путиннул увкунни: «Динчитал дурккусса, чантI увкусса инсантал бикIан аьркинссар, цIувххумунихьхьун балжийну жаваб дулайсса ва цала пикри куртIну аьч бувай­сса, аьщуйн щуну ванийн вари учайсса». Республикалул БакIчи Рамазан АьбдуллатIиповлулгу имамтуращалсса ца хьунабакьаврий увкуна: «Зу, имамтал, халкьуннал хьхьичIун бувккун, махъ учайсса инсанталлу, Заннал зуйн, жяматрал хьхьичIун був­ккун, вяъзарду ккалансса вихшала дурну дур, ва иширацIун бавхIуну жямат цачIунмай баврияр агьамсса ци дуссар?».
Имамтал гьуртту хъанан аьркинссар райондалул ва шяраваллил администрациялул дуллалисса давурттай. Чялишну хIала буххаван аьркинссар жяматрал оьрмулуву хъанахъисса иширттавух. Цимурцаннуя хавар бикIаншиврул, кIулшивуртту магьир дулланшиврул имамтурал чIун-чIумуй квалификация гьаз дуллан аьркинссар. 2014 шинал Республикалул БакIчинал сипталийну хIасул бувсса Да­гъусттаннал гуманитар институтраву кIулшивуртту куртIгу, цIакьгу дувансса сант дуссар хIакьинусса кьини, му сант гьарцагу имамнащагу ишла дуван бюхъайссар. Ва вузрал гьанулий чIявусса имамтурал, исламрал вузирдал ва мадрасарттал преподавательтурал гьар шинах квалификация гьаз дувайссар. Жу хъунмасса барчаллагьрай бу­ссару вузрал учредительтурайн, Республикалул БакIчинайн ва Муфтиятрайн. Ва базилухгу институтрал хIадур дурссар квалификация гьаз дуллалисса цIусса программартту, дуклаки оьрчIал ва студентътурал дянив экстремизм ппив хьун къаритаврил темалуцIун дархIусса, динчитурал кIулшивуртту магьир даврицIунгу дархIусса. Лекцияртту буккинтIиссар цала даву ххуйну кIулсса экспертътурал, кIулшиву дулаврил аралуву зузисса пишакартурал, динийсса идарарттай зузиминнал. ДакI дарцIуну ура вай курсирдая зу биялсса хайр ласуншиврий ва гъирарай зула давурттаха зунтIишиврий. ЧIа тIий ура ду­ккавривугу, агьалинан хайр­сса давуртту дуваврил ххуллий­сса давривугу тIайлабацIу.

МахIаммад АьвдурахIманов,
Дагъусттаннал динийсса идарарттащал зузисса Комитетрал председатель