Июль зурул 28-нний шадлугърай ларкьунни Къарабудагъккантуллал райондалийсса «Бургъил зума» тIисса бигьалагай базалий вай гьантрай най диркIсса республикалул диннал жагьилтурал слёт.

Микку гьуртту хьунни ХIукуматрал Председательнал хъиривчу Рамазан Жяъпаров, муфтийнал хъиривчу Идрис Асадуллаев, МахIачкъалаллал Епархиялул секретарь, иеромонах Иоанн (Анисимов), ягьудинал Ккураннал советрал председатель Валерий Дибияев, Да­гъусттаннал гуманитар институтрал ректор Мурал Шапиев, Гуманитар-педагогикалул колледжрал директор ЯрахIмад ХанмахIаммадов, Пятигорскаллал универститетрал Этнополитикалул хъиривлаявурттал центрданул директор Майя Аствацатурова, динийсса идарарттащал зузисса комитетрал хъунама МахIаммад АьвдурахIманов, печатьрал ва информациялул министр Рашид Акавов ва цаймигу бусравсса къуллугъчитал.
Миллатирттал ва диннал дусшиву цIакь даву мурадрайсса форумрал даву ларайсса даражалий ларгшиву кIицI лавгунни ихтилатру буллалиминнал. Бувсунни жагьилтурахь рувхIанийсса ирс – ххазина ябуван аьркиншиву, цинярдагу диннал хIурмат буну къуццу тIун аьркиншиву. Бувсунни форумрал цачIунмай був­сса жагьилтал архIал Дагъусттаннал тарихрал ва архитектуралул гьайкаллу ххал дуван экскурсиялий лавгшиву, субботникрайн бувккун, пляж марцI бувшиву ва цаймигу давурттив дуршиву. Дагъусттаннал динийсса идарар­ттащал зузисса комитетрал зузала МахIаммад МахIаммадовлул чIурчIав дурссакун: «Дин лахьлахьисса цинявнная имамтал, кашиштал, раввинтал къашайссар, мурадгу му бакъар, гьарманан кIулну дикIан аьркинссар диндалул гьанулул кIулшивуртту, цIакьсса ва куртIсса кIулшивуртту думи бяйкьу ххуллурдайн къа­багьантIиссар».
Слетрай гьуртту хьуминнан дуллунни хасъсса сертификатру. Республикалийсса шаннагу диндалул вакилтал гьурттусса культуралул программалийну къуртал дунни форумрал даву.