Вай гьантрай Дагъусттаннай Ставрополлал крайрал Кьинирдал лагрулий хьунни личIи-личIисса хьунабакьавуртту, шадлугъру.
Дагъусттаннал ва Ставропольелул дянивсса дусшиврул ва уртакьшиврул икьрал чирчуссар 1993-ку шинал.
Му шиналла апрель зуруй Ставрополлал крайрай хьуссар Дагъусттаннал Кьинирду, миннул лагрулий кIирагу региондалул дянив чирчуссар машлул ва экономикалул, элмулул ва техникалул, социал ва культуралул арардавусса уртакьшиврийсса зузаврил кьутIи.
Ставрополлал крайраясса делегация Дагъусттаннайн бувкIссар, Рамазан АьбдуллатIиповлул оьвкуну, жулла республикалул делегациялул Ставрополлайнмур аьрххилун жавабну.
ЖучIана увкIсса Ставрополлал крайрал губернатор Владимир Владимиров аэропортрай хьунаавкьунни ДР-лул БакIчинал.
Рамазан АьбдуллатIиповлул ва Ставрополлал крайрал ХIукуматрал Председательнал цалчинма хъиривчу Николай Великданьнул тIутIив дирхьунни МахIачкъалалив «Воин-освободительнал» гьайкалданучIа. Вай мукунма бивунни «Аьрали славалул» музейравунгу. Музейрал директор Жаннат Сагидовал бусравсса хъамаллуран ккаккан дунни Буттал КIанттул цIанийсса Хъунмасса дяъвилий талай бивкIсса дагъусттанлувтурал ишла дуллай бивкIмур, минная аьпалун лирчIмур. Хъамаллуран ялагу ккаккан бувунни 1999-ку шинал Дагъусттаннай хьусса аьрали иширттан хас бувсса экспозициягу.
Дагъусттаннайсса Ставрополлал Кьинирдал лагрулий МахIачкъалалив Дусшиврул къатлуву хьунни «Дагъусттан Республикалул ва Ставрополлал крайрал дянивсса уртакьшиврийсса зузаву» тIисса цIанилусса ккуркки стол. Мунил давривух гьуртту хьунни Рамазан АьбдуллатIипов ва Николай Великдань. Муниннин цал шиккува вай бивунни Аьрасатнал халкьуннал Дусшиврул музейравун.
БавтIминнал хьхьичI махъ лахълай, Рамазан АьбдуллатIиповлул чIурчIав дунни Ставрополлал крайращалсса цIакьсса дахIаврий, яла-яла,губернатор Владимир Владимировлущалсса уртакьшиврийсса зузаврий.
— Ванияр мукьра шинал хьхьичI чIаххуврайсса республикарттащалсса уртакьшиврийсса зузаврил царагу «сагъсса» проект къадиркIссар, — кунни Дагъусттаннал бакIчинал.
Аьрасатнал Федерациялул ва Ухссавнил Ккавкказуллал Федерал округрал субъектирдаву Ставрополлал край хъанай дур ца яла хьхьичIунмур. Цимирагу аралуву край дур хьхьичIунсса кIанттурдай. Региондалул ларайсса ккаккияртту чIалачIи дунни экономикалуву, шяраваллил хозяйствалуву, гьамин жун зуяту лахьхьинмур чIявур. Жугу хIарачат буллай буру Дагъусттаннай шаймур буван, ххуй чулиннайсса дахханашивуртту дуван, — увкунни АьбдуллатIиповлул.
Гихунмай хьунни ихтилатру кIирагу региондалул дянив хьунтIисса давурттая. Н. Великданьнул кIицI ларгунни цала региондалий яла хъунмамунин ккаллийсса Дагъусттаннал диаспоралул дуллалисса давуртту, крайрай тIивтIушиву Дагъусттаннал халкьуннал Культуралул центр. Ахирданий мунал оьвкунни сентябрь зуруй Ставропольелий хьунтIисса «Агроюг» цIанилусса инвестициярттал форумрай гьуртту хьун, крайрал Губернаторнал цIания тIурча, Дагъусттан Республикалул БакIчинайн оьвкунни мукунма сентябрьданий хьунтIисса Ставрополь шагьрулул 240 шинацIун дархIусса шадлугъирттавух гьуртту хьун.
ДР-лул ХIукуматрал вице-премьер Раюттин Юсуповлул дакIнийн бувтунни Ставрополлал крайрай Дагъусттаннал Кьинирду дуллалисса чIумал му региондалул Экономика хьхьичIуннай даврил министерствалущал цачIу ххал бивгьушиву хъинну чIявусса масъалартту, му чIумал Дагъусттан Республика хьхьичIуннай даврил 7 проект ккаккан дуршиву, Ставропольелул чулухаллил итталун яла-яла дагьшиву «Обеление экономики» цIанилумур проект.
Юсуповлул бувсунни ва шинал кIирагу региондалул дянивсса товарооборот 11 % ларай хьунтIишиву.
Дагъусттан Республикалул ва Ставрополлал крайрал дянив яла-яла цIакьми арардавасса царайну дур культуралулми. МуницIун бавхIуну, ДР-лул культуралул министр Зарема Буттаевал бувсунни чIаххуврайсса региондалул уртакьтуращал дурсса ва дуван дакIнийсса давурттая. Муний рязий хьунни Ставрополлал крайрал культуралул министр Татьяна Лихачевагу.
ЦачIу дурсса ва дувантIисса давурттал хIасиллу дуллай, Рамазан АьбдуллатIиповлул увкунни: «Жува ца билаятрал агьлуру, му хъамабитлан къабучIиссар», — куну.
Дагъусттаннайсса Ставрополлал крайрал Кьинирдал ца яргмур ишну хьунни Оьруснал театрдануву хьусса хъуннасса концертгу.
Бадрижамал Аьлиева
