Гъумучиял клубраву хьунни хьхьичIунсса ккаккиярттащал школа къуртал бувминнан медаллу дуллалисса шадлугъ. Муний гьуртту хьунни «Лакрал район» МР-данул бакIчи Юсуп МахIаммадов, ванал хъиривчутал, КIулшиву дулаврил управлениялул хъунама Явсупи ХIамзаев, учительтал, школа къуртал бувминнал нину-ппу ва гъан-маччами.
Шадлугъ тIитIлай, райондалул бакIчинал, райондалул администрациялул ва депутатътурал цIания школа къуртал бувми барчагу бувну, чIа увкунни миннан гихуннай­сса дуккавриву тIайлабацIу.
— ХIакьину зу личIи хъанай буру зулла оьрчIшиву ларгсса, зула кIилчинмур къаттану хьусса школалия. Бухлай буру цIусса оьрмулувун. Зул хьхьичI буссар бигьа бакъасса ххуллу. Му ххуллу лажин кIялану битансса каши-кьудрат Заннал дулуннав зухьхьун. Бивзний ша бакьиннав!
Ци пиша язи бугьарчагу, кьадарданул чунмай бичирчагу, зула нитти-буттахъангу, учительтурангу ххаришиврунсса, пахрулунсса наслу зуяту букканнав. Умуд макьукьару шагьрурдай куннасса шартIругу, давурттугу жулла райондалий ду­сса чIун дучIантIишиврийн. Амма хъамамабитару, Лакку улклул ялун бучIантIимур зул кIунттихьгур бу­сса, — увкуна ванал.
Муния махъ дуллуна медаллу. Медаллу ларсми барча буллай, хаснува барчаллагь увкуна Кьиблалул федерал округрал дянивсса куклумур атлетикалул бяст-ччаллий шамилчинмур кIану бувгьусса Рамазан МахIаммадовлухь.
Гъумучиял школалул директор Ххадижат ХIусниевал, школа къуртал бувминнан оьрмулул кIилчинмур шачIанугу бигьану лахъансса тIайлабацIу чIа тIий, чIурчIав дуруна, замана ци чулинмай кIура баярчагу, инсан так кIулшивурттал айшиву бюхттул.
Оьрмулуву лайкьсса кIану бугьансса тIайлабацIу ва каши-кьудрат чIа увкуна Явсупи ХIамзаевлул, КIундиннал школалул ва шинал­сса выпускрал каялувчи Абризат ХIажиевал.
Жагьилтурал, спортрал ва туризмалул отделданул каялувчи Малик ХIусмановлул мусил ва арцул лишанну дуллуна республикалул ГТО-лул кьараллу хьхьичIунну ккаккан дурсса оьрчIан ва душваран.
Нитти-буттахъал цIания школа къуртал бувми барча бувна Аьжа Макьаевал.
Райондалул магьирлугърал зузалтрал хIадур дурну дия ххаллил­сса концерт.