Мукьра шин хьуну дур Дибиров АьвдурахIин Дибирдул арс Лакрал райондалул азарханалий хъунама хIакинну зий. Ва чIумул манзилданий чIярусса ххуй чулийннайсса дахханашиннарду хьунни райондалул цIуллу-сагъшиву дуруччавриву. Дур-дурмур кIицI къадулланну, банну ванащал цащалва ихтилат.
АьвдурахIин, буси медициналийнсса вила ххуллия.
— На мединститутравун дуклан увхра, ттула ппу хIакин уну тIий, пиша язи бугьлагьийни, мунил ялув бунияласса пикривагу къабувну. Медициналул аралувун уххайхтур ттун бувчIуссагу тIайлану язи бувгьушиву ттула пиша. Хирург хьуссагу хаварбакъулий кунара. ЦIубутIуй терапевт хьунна тIий икIайссияв.
Ряххилчинмур курсирай дуклакисса чIумал архIал дуклакими сайки цинявппа хирургнал пиша язи бугьлан бивкIукун, навагу хирург хьунна, куну, хирургиялул отделениялий ординатуралийн увхссияв профессор Далгат Далгатовлул кафедралийн.
Институт къуртал байхту, на зун тIайла увккунав Чачаннал республикалийн. Интернатура къуртал бувссар «Грознефтьоргсинтез» тIисса идаралул медсанчастьрай. Хъунисса каширду дусса медициналул идара бия. Тикку бия республикалул ожоговый центргу. ЧIиви оьрчIал ганзликкурая кьувкьуну, хъазамрай бурчу бишин багьлай бия. ДакIния къабуккай, операциялух арцу дулун гъан хьусса оьрчIал нину-ппу, на арцу къаласара учайхту, гассят отделениялия лавгун бия, на лавайсса даражалул медициналул кумаг бан къабюхъайсса хIакиннан ккалли увну, ттуйн вихшала дакъа.
Уттинин азарханалий бивкIун бур бухсса рентген-аппарат. Флюорография дан къашайшалтран занан багьлай бивкIун бур Лаващав ягу МахIачкъалалив. Ттигъанну бувкIун бур хъунисса каширду дусса ттизаманнул цифровой рентген-аппарат. ЦIанакул бакIрал томографиягума шиккура дан бюхълай бур. Ваний зий ур хIакин-рентгенолог Мансур Убринский. Ва агьалинан бусрав хьуну ур ххаллилсса хирург-травматолог хIисаврайгу.
Та центрданий хьуссар ттул цалчинсса хирургиялул опыт. Интернатуралия махъ зий уссияв районнал дянивсса азарханалун хIисавсса Гудермес шагьрулул 2-мур азарханалий дежурный хирургну. Мукьра шинай тикку зий, даву канилух дурккукун, лавгссияв Москавлив аспирантуралувун дуклан уххан. БакIрайн агьунав МОЛГМИ-лул хирургиялул кафедралийн. Ттун бахтти хьуссар ттизаманнул хъунасса хирург Виктор Савельевлул каялувшиндаралу зун нясивну лякъаву. Тикку зий ия цамагу бюхттулсса даражалул хирург, Аьрасатнал элмурдал академиялул член-корреспондент Евгений Яблоков. Югославиянал БакIчи Броз Титол цайва операция бан танайн дакъа вихшала къадайсса диркIун дур.
Аспирантурагу къуртал бувну, увхссияв докторантуралувун тава факультетрай. Элмийсса каялувчинал маслихIат бувну, кафедралий хъунама элмийсса зузалану зий уссияв. Цаппарасса ттул статьярду бивщуну буссар «Бюллетень экспериментальной медицины» тIисса, кьатIаллил билаятирттайгу итабакьлакьисса, Аьрасатнал журналданий.
Аьда Шахшаева, Дагъусттаннал паччахIлугърал медакадемия къуртал бувну махъ зий бувкIун бур райондалул азарханалий участокрал терапевтну. 2013 шиная шинмай зий бур виваллил органнал ва гинекологиялул ультразвукрал диагностика дуллай. Ттигъанну бувкIун бур Москавлия, туннурдал диагностика дан лархьхьуну.
Ахиргу, Юсуп ХIамидовичлул оьвкуну, зана хьура Ватандалийнай. Му дия Дагъусттаннай цIуллу-сагъшиву дуруччаврил министрну бюхъу бусса сакиншинначи, ттулагу хьхьичIунсса гьалмахчу Танка Ибрагьимов ивтун, му аралуву асар хьунсса дахханашиннарду хъанай дайдирхьусса чIун.
— Ина хъунама хIакинну зун увкIния мукьах аргъ дирзунни азарханалий. Вила хьхьичI бивхьусса цуми мурадру бювхъур чулийн буккан бан, цуми ливчIри чулийн къабувкнува?
— Зунма чIалачIисса куццуй, азархана зузи бувну бур медициналул идаралул тIалавшиннардацIун къадаркьусса, хьхьичIарасса райкомрал къатраву. Амма хъунмур буруккин къумашиву дакъар, шартIругу дузал данссар. Цалчинма-цалчин багьлай бия диагностикалул база ххуй бавриха зун. Азарханалий хьхьичIра-хьхьичI дикIан аьркинссар низамгу, пишакаршиврул даража лахъсса зузалтгу. На ттула хьхьичI бивхьусса яла агьаммур мурадну буссия цала даву кIулсса жагьилсса пишакартал бучIан бансса.
УчIан ан бювхъунни ряха-арула пишакар. Вайнна бусраврай зумух ласлан ччисса миннал цIарду: Лиана Аминтаева, акушер-гинеколог; Зарема ЦIаххаева, анестезиолог; Саида Минкаилова, невропатолог: Даниял Гъапуров, терапевт; Арсен Аьлиев, хирург; Мансур Убринский, травматолог, рентгенолог; Ада Шахшаева, УЗИ-лул специалист.
Вай цинявппагу зий буссар «Земский доктор» программалий. Барчаллагь паччахIлугъран жагьилсса, ччаннай бацIан бувасса хIакинтуран кумаг буллалисса.
Саида Минкаилова, хIакин-неврапотолог. Дагъусттаннал медакадемия къуртал бувну, кIира шинай зий бивкIун бур цал Москавлив, яла Новострорай. Лакрал райондалул азарханалий зий бур 2013 шиная шинмай.
Даву канилух дурксса хIакинтал шиккувагу бия. Цалчинсса ттул кумагчи хьуссар хирургиялул отделениялий каялувшиву дуллай ивкIсса Сулайман Сиражуттинович, цIанакул зий ур Ккуллал райондалул азарханалул хъунама хIакинну. Шагьмандара Рамазанов, хIакин-анестезиолог, зий ур «Анаварсса кумаграл» хъунама хIакинну.
— Жула жагьилтал медициналул идарарттайн чIявусса дуклан бухлай бухьурчагу, буттал кIанттайнмай зана хьун ччай бакъар. Ци чаранну ляхълай буру жагьилсса пишакартал кIункIу бансса?
— Даву сантирайн дагьсса, цала даража хъиннува лахъ бансса кIанттайн ххуйсса пишакартал цивппа бучIантIиссар. Мунияту жу дузал дуллай буру пишакаршиву ларай дансса шартIру. ЧIумуя-чIумуйн тIайла буккайссар Москавлив билаятрал хьхьичIунсса клиникардай цIу-цIумур ххал дан, лаласун.
— Шагьрурдал азарханардай хъин хъанахъисса къашайшалт цIуру-кIурулий бикIай даруртту биялну бакъар ягу бувагу бакъар тIий. ЗучIа цукунсса дур дарурттал дузалшинна?
— ЧIумуя-чIумуйн ФОМС-райн диян дувайссар жува ххал бувсса ва хъин бувсса къашайшалтрал сияхI ва Минздраврал жунна ккаккан дурсса даву биттур дуршиврийсса отчет. Агарда къашайшала къатIайлану хъин увну ухьурча, му чIалачIиссар медициналул документирттайну. Мунан харж дурсса арцу гьаваллавун наниссар. Ми арцу зия къахьуншиврул жун аьркинссар ФОМС-райн диян дуван гьарцагу жува хъин увсса къашайшалаясса информация. Жу лавайсса даражалул кумаг буллай бухьурча, поликлиникалийн инсантал букIлай бухьурча, мунийну медициналул стандарт биттур дурну духьурча, арцугу лякъин бюхълай бур. Гьарзад жула хIакинтурал биялалухьри дусса. ФОМС-рал зуруя зуруйн дулайссар жу хъин увсса къашайшалансса арцу – харж булун ккаккан дурссагу, дукиялунссагу, дарурттанссагу, азарханалул тагьар ххуй данссагу, ремонтирттанссагу. Ми арцу, тили-хъили къадурну, аьркиннийн тIайлану ишла дулларча, гьарзадран диял хьунтIиссар.
Цайми азарханардай дарурттал дузалшинна цукунсса дуссарив къакIулли, жучIа оьрмулун агьамшиву дусса дарурттал дузалшинна дуссар.
— Ци журалул къашайшивуртту хьунадакьлай дур жула кIанттай?
— Ччя-ччяни хьунадакьлай дур къюкIлил, гьутрурдал, туннурдал, лякьлул, ххюттукалул азарду. КъюкIлил азарду кунна, туннурдал азардугу жагьил хъанай дур. Хъуннасса даву дуллай буссару тромбозрал профилактика дан, ишла дуллай буссару инфаркт миокарда хьусса чIумал кумаг бансса ттизаманнул стандартру. Инфаркт миокарда дурхIусса къашайшалт хъин буллай буссару, реабилитация дуллай буссар.
— Вил ка сававсса душиврул цIа дурккун дур илданийх. Ина ляличIисса журалул, хIатта уттинин Дагъусттаннай бувагу къабувсса операцияртту буллай ур тIий, вил цIа дургьуну бучIайссар тIий бур цайми районная ва шагьрурдая.
— Ца ттул цIа дургьуну букIлай бухьунссар тIий акъара. ЖучIа зузисса хирургтал цинявппагу лавайсса даражалул специалисталли. ТIайлассар, махъсса шиннардий чIявусса букIлай бур Ахъушиял, Лаващиял, Къарабудахккантуллал, Жаржавуллал (Гергебиллал) районнаясса, Къизлардаясса, Къизилюртлиясса, МахIачкъалалиясса къашайшалт. Амма миннан цанмавагу къакIулссар операция цума хирургнал бантIиссарив. Азарханагу, районгу ххуй чулийсса зума-мазрай дуну тIийри ми букIлакIисса. Дагъусттаннай уттинин къабуллай бивкIсса операциялул хIакъираву – му ялун ливчусса туннурдай буллалисса операцияр, «малоинвазивная флебология» учайссар мунийн. На му элму лархьхьуссар МОЛГМИ-лул 2-мур азарханалий СавельевлучIа ва ЯблоковлучIа. Аьрасатнал цайми регионнаягума бучIай жучIа ва журалул операция бансса къашайшалт.
— Операция бан аьркинсса гьарца оборудование диялну дуссарив азарханалий?
— Лавайсса даражалул кумаг баншиврул машан ласарду лапароскопическийсса стойка, лякьа ххякъадурккунна, мониторданул ялув бацIаврийну операция бувайсса хасъсса ярагъ.
Му бакъассагу, жул хIакин Мансур Убринскийл Санкт-Петербурглив Р. Р. Вреденнул цIанийсса травматологиялул институтраву лархьхьуссар артроскопиялул пишакаршиву. ЧIал къавхьуну жучIава буллантIиссар ва журалул операциярттугу.
Никирал ттурчIайн кьутIавуртту дурну, ттизаманнул хирургиялул стандартру зузи дуллай буру.
Минздраврал ва ФОМС-рал кабакьаврийну жу машан ласарду цифровой журалул рентген-аппарат. Мунил дуллантIиссар компьютерданул томография.
— Махъсса шиннардий инсантал чIявуну халкьуннал медициналийн кIура баллай бур? Ина мунил муттаэравкьай, чул бувгьумарав?
— Халкьуннал медицина – му цирив ттигу бувчIин бувар инсантуран. Халкьуннал хIакиншиву му дур нукIузаманная шихуннай жуйнна дирсса магьирлугъ. Гьарцаннан бусрав хьусса хьхьичIавасса хIакин ур грекнал аькьил Гиппократ. Танаяр хьхьичI цу ивкIссарив жунма кIулну бакъар. Ттизаманнул медициналул га ккалли увай медициналул гьану бивзсса хъунасса хIакиннан. Таная мукьахгу бувккун бур чIявусса хIакинтал. Тайннавасса ца яла машгьурма ур Баргъбуккавал билаятирттай цIа ларгсса Абу Аьли ибн Сина (Авиценна). Официалийсса медициналул тагу ккалли увай медициналул гьану бивзманан. Цалгу цачIун бувну бур чIярусса ттуршукурдай салкьи бувсса халкьуннал хIакинтурал опыт. Му опыт цачIун бувсса лу ккаллину бур цинявппагу кIулшиву дусса хIакинтурал столданий бикIан аьркинсса луттиран. Авиценная мукьах ялагу чIявусса бувкссар халкьуннал хIакинтал дянивми ттуршукурдай. БивкIссар алхимиялуха ва аьщуйн щусса медициналуха зузиссагу.
ЦIанихсса халкьуннал хIакинтурал кьюкьлуву ивкIссар лаккучу, диндалул ишккакку, аькьил Сайпуллагь-кьади Башларов. Та заманнул инсантурал га ккалли увай антибиотикру буккан бувманан.
Лабораториялул хъунмур Зарема Гъазиева буслай бур анализру дайсса кабинет поликлиникалия азарханалийн бизан бувну, цIусса матахIрал ва оборудованиялул лащу-щаллу бувну бушиву.
Ссавур бусса халкьуннал медициналул гьану? Ххал дигьлай бивкIссар личIи-личIисса ххяххияртту, личIи-личIисса жанавартрал хъирив бацIлай. Ми хъирив лаявурттайн бувну дуллай бивкIссар рецептру. Ларгмур ттуршукулий къюкIлин ккаккан бувсса дарувну хьуссар ххяххиялул гьанулийсса даруртту. ХIакьинусса кьинигу къюкIлинсса чIявуми даруртту буссар ххяххиялул гьанулий итабакьлакьисса. Антибиотикругу сайки цинявппа ххяххиялул гьанулий бувсса бур. Мунийн бувну официал медицина ккалли хъанахъиссар халкьуннал медициналул тIайланнасса ирсиран. Ттизаманнул медициналул мархри халкьуннал медициналувур бусса.
Лаборантътал Бика ЦIаххаева
ХIакьину чувчIав бакъар халкьуннал хIакиншиву лахьхьин дувайсса идарартту. Бакъар Гиппократлул, Авиценнал, Сайпуллагь-кьадинал даражалул хIакинтал. Бур анжагъ цайнува цивппа хьусса хIакинталлу тIисса гьан-санчитал. ЦукунчIавсса кIулшиву дакъасса, ча бувкссарив къакIулсса инсантурайн вихшала дишин къабучIиссар.
Соцсетирдаву ччя-ччяни бакIрайн дагьай уран цIуцIаву хъин дуллай буру тIисса баян бавуртту. Бан-бит бакъасса инсантал бигьану хъяврин хъанай бур.
— Бурив азарханалун кумаг буллалисса?
— Чан бакъар. Депутат ЖахIпар Абуевлул цала харжлугърах бувунни къашайшалт кьамул буллансса отделение. Му дурну къуртал давай буру, ремонтрал давуртту дан лирчIунни. Уссар жул коллега, Нижневартовскалий ялапар хъанахъисса МахIаммад Дибиров, хIакьсса патриот. Таналгу жун хъунмасса кумаг бувай анестезиологиялуву ишла бансса дарурттал ва ярагъуннил чулуха.
— Ина билаятрал хъуншагьрулийсса ххуйсса къатта-къушгу, давугу кьадиртун, Лаккуйнай зана шаврил буслай бур вин буттал кIану ххирашиврия. Мукун бушиву исват буллай бур ина бигьа дакъасса хирургнал ва жаваблувшинна ххисса хъунама хIакиннал даврил ялун жяматийсса давурттахагу зий ушиврул. Тамансса мурадру хьхьичIунну чулийн буккангу бунни. Ча ляхълай ура ина миккун харж дансса чIун?
— Жула лак дунияллийх кIама бивщуну бур. Ватандалия архну ялапар хъанахъисса чIявуминнал дакIурдиву яхьуну дур буттал кIанттухсса ччаву. Буттал кIану хьхьичIунмай бансса чаранну лякъин ччиссагу хьунабакьлай бур миннал дянив. Мунил цIанийру жяматийсса давриха зузисса. На навалу акъарахха ми давурттаха зий. Хъуннасса даву дуллай бур райондалул бакIчи Юсуп МахIаммадов, ганал чIаравсса зузалт, школалул директор Ххадижат ХIусниева, депутатътал ЖахIпар Абуев, Амирхан Амирханов, Исмяил Аьлиев, Илиясовхъал кулпат. Жула гьарцаннал мурадру цава ца бушиву чIалай, вай цинявппагу хIарачат буллай бур лак цачIунмай бансса, дусшиву цIакь дансса давуртту дан, хаснува жагьилтурал дянив.
— Ихтилат къуртал бан ччива хIакиннал маслихIатирттайну.
— Инсан дакI аьчухсса ухьурча, мунаща шайссар оьрмулия тIин-тIааьн ласун. Мукунсса инсаннайн азардугу къалачIайссар. Ибн Синал увкусса куццуй, «цIуллусса чурххаву, жангу цIуллусса» дикIайссар.
Азарханалул хъунмур медсестра, операциялул сестра Закират ЖахIпарова.
Даниял Гъапуров, терапевт. Дагъусттаннал медакадемия къуртал бувну, Москавлив лархьхьуну дур кардиоглогиялул ва функционал терапиялул пишкаршиву.
Анисат Жалаева, терапиялул отделениялул хъунмур.
Функционал диагностикалул медсестра Муъминат Сулайманова кардиограмма дуллай
ЦIусса оборудованиялул лащу-щаллу бувну бур стоматологиялул кабинетгу. Ккарччал хIакин Зулайхат Оьмариева.
Дукра гьарзану дукайсса инсаннайнгу азар лачIайссар, ккашикарсса инсаннайнгу азар лачIайссар. Увччуманал цала дукра ккашилманайх кIидачIирча, кIиягу цIуллу-сагъну бикIантIиссар. МарцIсса кIанттайнгу азар къалачIайссар. Аьмал ххуйсса инсаннайнгу азар къалачIайссар. Зула аьмаллу, пикрирду марцIну ябувара, зула лагма-ялттусса кIанттурдайгу марцIшиву дуруччияра.
— Вин хъунмасса барчаллагь, АьбдурахIин Дибирович, аьчухсса ихтилатрахлу. ТIайлабацIу ххи хьуннав зул давриву.
Ихтилат бувссар
Зулайхат Тахакьаевал
