Абакардул арс Шуаьев СилахIуттин
Оьрмулул 83 шинаву аьпалухьхьун лавгунни Лакрал райондалийгу,цайми-цайми кIанттурдайгучIявуссаннан кIулну ивкIсса инсан, цала щала оьрму буттал шяраву бувтсса адамина, Карашрал шяраватусса Абакардул арс Шуаьев СилахIуттин.
СилахIуттин увну ур Карашрал шяраву 1934-кусса шинал. Буттал шяраву арулва классрал школагу бувккуну, лавгун ур армиялийн. Тикку Саратов шагьрулий ванал бувккуну бур радио-телеграфистнал пиша лахьхьайсса полкрал школа. Тиккува зийгу ивкIун ур ВВС-рал связьрал хъунма радиотелеграфистну.
Армия лавхъун махъ зий ивкIун ур Украиннал Макеевка тIисса шагьрулийсса шахталий. Мичча кIура авну мукьахсса СилахIуттиннул щалва оьрму бавхIусса бур Карашрал шяраваллил жяматрал ва колхозрал давурттацIун, счетоводнал пишалия айивхьуну, шяраваллил советрал председательнал къуллугърайн ияннин. Мукуна биялсса хIаллай ва зий ивкIссар цал комсомолданул, яла парторганизациялул секретарьнугу. 1964-1968 шиннардий ванал къуртал бувну бур Буйнакскаллал финансирттал ва экономикалул техникум.
2004-ку шинал СилахIуттиннун дуллуссар «Дагъусттан Республикалул шяраваллил хозяйствалул лайкь хьусса зузала» тIисса цIагу.
СилахIуттин аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал арс Эдмоннухь, душру Заремахь ва Дианахь, уссихь Кариннухь ва махъсса цинявппагу гъан-маччаминнахь. Цал бунагьирттал аьпа баннав, рухI бигьаний дишиннав.
Карашрал ва Ккурккуллал жямат
Лавгунни язисса шаэр – жула ХIасан!
ЛичIи хьунни жуятува, Вихьуллал жяматрачIа бакъассагу, щалагу Лакку билаятрай бусравну оьрму бувтсса КIуруххъал Шяъваннул ва Сиянатлул арс, лакрал ца яла аьрипсса мукъул заллу, язисса шаэр, КIуруххъал ХIасан. Ятин дурунни лакрал литература, магьирлугъ ххираминнал дакIру.
Хъуннасса кьурчIишиву кIидачIлай, жижара буллай ура КIуруххъал гъан-маччаминнахь, ххаллилсса Вихьуллал жяматрахь, «Илчи» кказитрал зузалтрахь. Яраппий, ганан къабуллумур ганал кулпатран, душваран, гъанссаннан булуннав.
Шяъваннул арс КIуруххъал ХIасан абадлий дакIний личIантIиссар дустуран.
Гьав нурданул дуцIиннав. Аьпа баннав.
Шалласу Шалласуев
