ЦIуссалакрал райондалий аьдатравун дагьну дур Аьрасатнал лайкь хьусса учитель Валериан Абакаровлул аьпалун хас дурсса буттал улча лахьхьаврил слет. Гьашинугу май зурул 14-нний ЦIуминалий шадлугърал даражалий, райондалул цинявппагу школарттал дуклаки оьрчIругу гьуртту хьуну, кIицI ларгунни ва слет.

Мажлис бачин бувну ия, сакиншиннардал давуртту цала бакIрайн ларсъсса, ОьрчIал ва мюрщи жагьилтурал спортрал школалул директор Сергей Аьлимов.
ЦIуссалакрал райондалул КIул­шивуртту дулаврил управлениялул хъунаманал хъиривчу Светлана Къудаевал барча бунни Рес­публикалул кIулшивуртту дулаврил зузалтрал дянивсса буттал улча лахьхьаврил слетрай хьхьичIун дурксса, 2-мур кIану бувгьусса ЦIуссалакрал райондалул учительтурал команда.
Слетрал программа дия хъинну авадан­сса, чIярусса затру хIисавравун ларсун сакин дурсса.
Най бия шикку инсан усса кIану кIул буллалисса, бахьттагьалтрал туризмалул техникалул кIулшивуртту ххал дуллалисса бяст-ччаллу, буттал улча кIулшиву ххал дуллали­сса викторинарду. Бия экологиялул темалиясса докладругу.
Бяст-ччаллу къуртал хьуну, хIасиллу дурну махъ, слетрал сакиншинначитурахь, гьуртту хьун бувкIсса жагьилсса туристътурахь, краеведтурахь ва бусравсса хъамаллурахь барчаллагь увкунни Валериан Абакаровлул кулпатрал ва оьрчIал.
Слетрай хьхьичIунсса кIанттурду бувгьуминнан буллунни кубокру, дипломру ва грамотарду.
И. Саидова