Ларгсса нюжмардий МахIачкъала шагьрулул 81-мур оьрчIал багъраву хьунни щалагу Аьрасатнал конкурс «Шинал тарбиячи – 2017».

Конкурсрай гьуртту хьун бувкIун бия республикалул районнал ва шагьрурдал муниципал конкурсирдай ххув хьусса, школалийн гьаннинсса кIулшиву дулайсса 33 тарбиячи.
Конкурс хьунни «ОьрчIал багъру – оьрчIан» тIисса федерал программалул лагрулий.
Конкурсрай ххув хьуми барча буллалисса шадлугърай гьур­тту хьунни ДР-лул кIулшиву дулаврил ва элмулул министр Шагьаьппас Шагьов, МахIачкъала шагьрулул КIулшиву дулаврил управлениялул каялувчи ТIагьир Мансуров, ДР-лул Халкьуннал Мажлисрал депутат,«Единая Россия» партиялул «ОьрчIал багъру – оьрчIан» тIисса программалул Дагъусттаннайсса координатор, МахIачкъала шагьрулул 71-мур школа-детсадрал каялувчи ПатIимат Шяъванова.
Конкурсрал агьамшиву кIицI лаглай, Ш. Шагьовлул увкуна: «Цуксса хъуннасса къула­гъас дуллай бурув жува оьрчIру тарбия баврих, цуксса къулайсса шартIру хIасул дуллай бурув миннал кIулшиву итххяххан дан, мунин лавхьхьуну тIайлабацIусса хьунтIиссар миннал ялун бучIантIимургу. На барчаллагьрай ура ва аралуву зузисса цумацагу тарбиячинайн. Ва конкурсрал жунма исват бунни хIакьину жучIара ххуйсса ккаккияртту душиву. ХIакьину шиккун бавтIун бур республикалул яла хьхьичIунсса тарбиячитал. Конкурсрай ххув къахьурчагу, муний гьуртту шаврил агьамшиву цурдара хъуннассар, цанчирча зул цинявннал буну тIий зула пишакаршиву ларай дан­сса, цайминная даврил опыт ла­хьхьинсса гъира».
Министрнал хаснува барчаллагь увкуна шяраваллал кIанттай зузисса тарбиячитурахь, захIматсса шартIирдаву зий бухьурчагу, шагьрурдайминнаяр махъун къабагьан хIарачат буллай бушиврий чIурчIав дуллай.
ПатIимат Шяъвановал кIицI лавгуна аьдатравун багьсса конкурс тарбиячитурал цала пишакаршиврул даража ххал бан­сса, бюхъурду ялун личин бансса майданну хъанахъишиву. «Жула хъун хъанахъисса никирал ялун бучIантIимур тарбиячитурал кIунттихьгур бусса, цанчирча вайннал бизлай буну тIий тарбиялул гьану, вайннал тIитIлай буну тIий миннан кIулшивурттал дунияллийнсса цалчинсса хьулу», — увкуна ванил.
2017 шинал тарбиячи­нал цIанин лайкь хьунни Ма­хIачкъала шагьрулул 3-мур оьрчIал багърал тарбиячи Гулбарият Темирханова.
Ххув хьусса ва хьхьичIунсса кIанттурду бувгьусса тарбиячитуран буллунни дипломру ва арцуйнусса бахшишру. Конкурсрай гьуртту хьусса цинявппагу тарбиячитуран дуллунни ДР-лул КIулшиву дулаврил ва элмулул министерствалул чулухасса сертификатру. Сертификатру ларсунни Ккуллал оьрчIал багърал тарбиячи Разият АхIмадовал ва ЦIуссалакрал райондалул Чапаевкаллал оьрчIал багърал тарбиячи Милана Щамххаловал.
Конкурс ларайсса сакиншиндарай бан дурсса гьурттушиндарахлу Барчаллагьрал чагъар буллунни оьрчIал багърал хъунмур Белла Багъдуеван.
Зулайхат Тахакьаева