Ларгсса нюжмар кьини Гъумучиял школалул 10-11-ми классирттал дуклаки оьрчIахь райондалул экономикалия ва бюджетрая бусласисса дарс дирхьунни райондалул администрациялул бакIчинал цалчинма хъиривчу Абакар Къюннуевлул. Дуклаки оьрчIащал дарсирай щябивкIун бия цаппарасса учительталгу.
Абакар Къюннуевлул балжину бувсунни райондалул экономика щаллу дуллалисса арардая, райондалул ва шяраваллал бюджет ци бутIрая дузал хъанай буссарив, ци журалул налогру дукIлай дуссарив мивун. КIицI лавгунни, щала билаятрайсса кризис сававну, махъсса шиннардий ва хасну гьашину райондалул бюджет цуксса ссуссукьу бувссарив.
Гьашинусса дуккаврил шинал Гъумучиял школалун 20 млн. къуруширттал итабавкьуну бушиврий чIурчIав дуллай, школалул директор Ххадижат ХIусниевал увкуна: «Зун цумацаннангу хъамабитан къааьркинссар зу дуккин баншиврул, зуя лайкьсса инсантал букканшиврул райондалул ва паччахIлугърал цуксса харж буккан буллай буссарив. Мунин лавхьхьуну зугу хIарачат бан аьркинссар зува райондалунгу, миллатрангу, щала паччахIлугърангу бучIину лякъин».
Абакар Къюннуевлул бувккусса лекция мюнпатсса бушиврий чIурчIав дуллай бия дуклаки оьрчIругу, учительталгу.
