Хъуннасса уттарашинна дия ларгсса ххуллун кьини ЧукIуннал шяраву, профессор Арсен ХIусайновлул ужагърай. Ва ия гьашину хъарас щаврил Хъун хъузала.
Арсен ХIусайнов кIулссар Аьрасатнаву, ца хьхьичIунсса профессор хIисаврай акъассагу, буттал улклуя архну ухьурчагу, цала дакIгу, пикрирдугу ватандалия ябуцан къабитайсса, билаятрал хъуншагьрулий ялапар хъанахъисса дагъусттанлувтал цачIунмай бан, тайннан ниттил мазгу, буттахъал аьдатругу хъамаритала хьун къаритан хъуннасса хъар цайнна ларсун нанисса ватанлувну.
https://www.youtube.com/watch?v=1n9fW5LITao&feature=youtu.be
Арсеннул цала буттал шяраву щавшсса кюрттарах ябитайхтува, асар хъанай бия цуксса бюхттулсса дуссарив ванал дакIниву ватандалухсса ччавугу, буттахъал аьпалул хIурматгу. Гьарцагу чарил чIучIа, ххюл шикку бур ччаву дуну бивхьусса. ЦIу буну даркьуну дур цимурца лагмарасса тIабиаьтрацIун. Вай Арсен ХIусайновлул къатри ххаллилсса даражалий цIу дуккан дурну дур цала буттан цIа дирзсса ванал арснал Буйдалавл.
КIанийн дуртун дурунни, буттал буттахъачIагу яла кьимат бюхттулну диркIсса, кьянатсса зунттал аьрщарал буллугъшиврул ва барачатрал лишанну хьусса ва никирая никирайн ирсирай нанисса Хъарас щаврил аьдат.
Байран дайдирхьуна цинявппагу хъамал къурув бувккун, гикку хъунбакъасса хъунил парч гъайучаврия. Хъун хъузалану къурув увккуна Арсеннул арс Буйдалав. Гъайувкусса дазурдавух гьаннагу бишлай, дуаьртту дурккуна ЧукIуннал колхозраву хъунмасса захIмат бивхьусса, хIакьинугу СПК-лул хъунамашиву дуллалисса ХIаммада Маршаевлул.
Муния тихунмай хъинну авадансса мажлис байбивхьуна Арсен ХIусайновлул къатрал ттиликIрахса багъраву. АрхIала най бия спортрал тIуркIурдугу: пут личаврил, гьаз даврил, тIанкI учаврил ва цаймигу. ХьхьичIунминнан дуллуна бахшишру. Мажлисрал тямадашиву дуллай ия Маршаев ХIаммада.
Мажлис хъун буван бувкIун бия Лакрал райондалул бакIчи Юсуп МахIаммадов, идарарттал каялувчитал, ДР-лул Жяматийсса Палаталул хъунаманал хъиривчу Ссапар Аьбдуллаев, ишбажаранчитал Сайпуллагь Аьбдуразакьов, Сайпуллагь Аьбдуллаев, профессор Киров Абакаров, «Илчи» кказитрал хъунама редактор Руслан Башаев.
БувкIсса хъамаллурахь барчаллагь тIий, Арсен ХIусайновлул бувсуна цала ччянияцIавасса хиял бивкIшиву, буттал шяраваллил агьлу цачIун бавтIун, жула халкьуннан яла ххирамур ва барачатмур байран дувансса. «Ва байрандалул мархри хьхьичIазаманная шихунмай нанисса бур. Азарлийсса шиннардил манзилданий жула ппухълуннал хъинну кьиматрай дуллай, жуйнна дияннин ядурну дур ва байран, аьрщи цIу дуккаврил, уртту-тIутIал цIусса оьрму байбишаврил, тIайлабацIулул ва барачатшиврул лишанну. Журагу ядан аьркинссар ва байран», — увкуна ванал.
Хъарас щаврил кьини барча дуллалисса цала мукъуву райондалул бакIчи Юсуп МахIаммадовлул куна:
— Жула буттал буттахъал кьуру тапшур байсса бивкIссар так жяматрай дакI аьтIисса, жяматрал ялув захIмат буллалисса инсантурайн, ччи-ччинахьхьун къабулайсса бивкIссар. ХIакьину жула агьлу аьрщараха зузаврия циваннив махъунмай бивщуну бур. Инсантурай аьй дуллангу хъанай бакъар, цанчирча хIукуматрал политика зунттал агьулдануцIун вари чинну кабакьлакьисса дакъар. Амма, Арсен Буйдалаевичлул кунна, шяраву цала буттал къатригу цIу дуккан дурну, багъраву, къатрал чIарав кIива мурхь бугьарчагума – мугу хъуннасса давур зула шяравалугу, районгу ядуван».
Хъун хъузалал, ванал кулпатрал ва щала ЧукIуннал жяматрал савлугърая кьуртти гьаз буллай, махъру лавхъуна ялагу Ссапар Аьбдуллаевлул, МахIаммад Ссунгъуровлул, Киров Абакаровлул, Руслан Башаевлул ва цайминналгу.
Мажлисрал сий хъиннура ягин дуруна Лакрал райондалул Магьирлугърал къатлул зузалтрал ва лакрал цIанихсса балайчитурал ва музыкантътурал – ХIусайна ХIусайнаевлул, Нурислан ЧIивиевлул Гьажар Рамазановал, Рашид Багъатаевлул, АьлихIажи Щамххаловлул.
Зулайхат Тахакьаева
