Ттигъанну МахIачкъалалив бувкIун бия Курск шагьрулиясса делегация. Миннащал хьунабавкьунни Дагъусттаннал жяматийсса ишккаккулт. Хъамал хьунабавкьунни ТОКС-рал командир, генерал-майор Оьмар Муртузалиевлул ва Дагъусттаннал дакьаврил фондрал хъунама Мухтар Давудовлул. Делегациялущал ия Хасавюртуллал райондалул администрациялул бакIчинал хъиривчу Вахит Касимовгу.
Зулайхат Тахакьаева
Хьунабакьаврий Оьмар Муртузалиевлул бувсунни Хъунмасса Буттал КIанттул цIанийсса дяъвилий ятIа-тIар бакъа бакъа хьусса аьралитурал цIардах, дяъвилул майданнайва ливчIми бувччусса кIанттурдах луглай, Дагъусттаннал ТОКС-рал кьюкьрал дуллалисса давурттая. Миннан хас бувну итабавкьуну бур «Учинну цIарду бакIра-бакIрах» тIисса Аьпалул луттирал 11 том. Му бакъассагу, итабавкьуну бур Хъун дяъвилия, ххувшавугу ларсун, зана хьусса Дагъусттаннал аьс­картурал цIарду рирщусса «Бу­ттал кIанттул солдатътал» тIисса Аьпа­лул луттирал 15 том.
Мухтар Давудовлул барчаллагь увкунни хъамаллурахь, Аьра­сатнал миллатирттал ва диннал дянивсса дахIавуртту цIакь дан, дусшиву ххишала дан дуллалисса даврихлу. КIицI лавгунни ва хьунабакьаврил сиптачи ва сакиншинначи хьушиву Аьрасатнал дакьаврил фондрал Курскаллал областьралмур отделениялул хъунама, Курск шагьрулул администрациялул бакIчи Николай Овчаров.
Хьунабакьаврийн бувкIсса жяматийсса ишккаккултрал дакIнийн бувтунни Дагъусттанная Хъунмасса Буттал КIанттул цIанийсса дяъвилий талан лавгун ивкIшиву 180 азара да­гъусттанчу, минная 95 азара зана къавхьуну ур, 57 хьуну ур Совет Союзрал Виричу, 7 хьуну ур Славалул ордендалул кавалер. Ттигъанну Курскаллал кьюкьрал хIарачатрайну лявкъуну усса ур Совет Союзрал Виричунал цIанин лайкьсса ца ттигу да­гъусттанчу – Илияс Арслангереев, Курскаллал Дугалий жан кьурван дурсса.
Аьрасатнал Сеймский округ­рал Хъаннил союзрал хъунмур, Курск шагьрулул 30-мур школалул директор, делегациялул каялувчи, Елена Веселовал ва Курск шагьрулул депутат, 18-мур школалул директор Светлана Медвецкаял барчаллагь увкунни цинявннахь ва мюнпатсса хьунабакьаврихлу.