Дарбантлив, Каспийскалий, Къизилюртлив, Къизлардай, МахIачкъалалив ва Хасавюртлив Роспотребнадзорданул отделлал зузалт хьунабавкьуну бивкIссар школардай ва вузирдаву дуклаки оьрчIащал.
Студентътурахь ва дуклаки оьрчIахь бувсун бур чахуткалул азар къалахъаншиврул цукун къуццу тIун аьркинссарив. Школардаву дирхьуну дур «Чахуткалул профилактикалул хIакъираву» тIисса дарсру.
Профилактикалул давуртту дурну дур Бабаюртуллал, Гъуниннал, Хайдакьуллал, Къизлардал, Нугъайнал, МахIарамкантуллал, Табасараннал ва Тарумовкаллал районнай. Тиккусса школардай оьрчIахь ва миннал нитти-буттахь бувсун бур чахуткалул хьхьичIалу кьукьиншиврул профилактикалия, цивппа азардания бур учинсса ххуллурдая.
Ккуллал ва Лакрал районнай бувсун бур Дагъусттаннай чахуткалул азарданул эпидемиологиялул тагьардания. Роспотребнадзорданул пишакартурал бусаврийн бувну, 2014 шиная шинмай республикалий чан хъанай бур чахуткалул къашавайми, эпидемиологиялул, яни азар ппив шаврил тагьар чIурунура личIлай дур.
Лаващиял райондалийсса Къуппиял шяраваллил жямат, ЦIуссалакрал райондалийсса Гьамиящиял жямат, Хасавюртуллал райондалийсса Яхсай ва Къуруш шяраваллал жямат ххал баншиврул тай шяраваллавун лавгун бивкIссар флюрография дайсса машина. Ххал увну ур 182 инсан, азарданул лишанну ляркъуну дакъар цаннайрагу.
Роспотребнадзорданул сянаткартал хьунабавкьуну бур Избербашлив ва Каспийскалий медициналул зузалтращал, хьуну бур «ккуркки столлу», медициналул зузалтрал конференция, Къизилюртлив духтуртал хьунабавкьуну бур захIматрал коллективирттащал, миннахь бувсун бур азарданул профилактикалия.
