Махъа нанисса жагьилтал маз, миллатрал литература ххирану хъуни шаву, миннан рувхIанийсса тарбия дулаву мурадрай, Республикалул оьрус мазрал ва культуралул центрданул дуллай бур чIярусса мероприятияртту. Центр тIивтIуну хъунма хIал къахьурчагу, уттинин итталун дагьансса цимирагу батIаву хьунни шикку. Ца мукунсса ирглийсса даву – гьунар бусса шаэр Римма Казаковал оьрмулул 85 шинал юбилейран хас дурсса. Му хьунни «Литературалул хъамалханалувусса» цалчин­сса хьунабакьаву.

Бадрижамал Аьлиева
Центрданул зузалтрал бувсунни шаэрнал оьрмулул ва творчествалул ххуллия. Бувну бур Римма 1932 шинал Севастополь шагьрулий. Нитти-буттал – аьраличу Федор Казаков ва секретарь-машинистка Софья Шульманнул – душнин дуллуну дур Рэмо тIисса цIа. Му хъанай дур «Революция, Электрификация, Мировой Октябрь» тIисса махъру цачIун бувсса цIа, муксса коммунизмалувун кьувтIусса бивкIун бур ванил нину-ппу. Махъ, оьрмулул 20 шинаву, шаэрнал цинна ларсун дур Римма тIисса цIа. Риммал оьрчIшиву ларгун дур Белоруссиянаву, школалулми шинну – Ленинградрай. Школа къуртал бувну махъ, бувххун бур Ленинградуллал паччахIлугърал университетравун. Казаковал шинну дурну дур Дальний Востокрай Хабаровск шагьрулий ялапар хъанай, личIи-личIисса кIанттурдай зий, лекторну, дарс дихьуну. ЦIанихсса «шестидесятниктуравун» цIа дагьсса Риммал цалчинсса шеърирду бувккун бур 1955 шинал, цалчинсса сборник – 1958 шинал. Гихуннай: СССР-данул Чичултрал союзравун кьамул баву, му СоюзрачIасса литературалул лавайсса курсру къуртал баву, Союзрал правлениялул секретарьну зузисса шинну, КПСС-равун кьамул баву. 1999 шинал Римма Казакова бивтун бур Москавуллал Чичултрал союзрал секретарьну ва цила оьрмулул ахирданийннин му даврий зий бивкIун бур.
Римма хъанахъиссар жула билаятрай цIа ларгсса балайрдал мукъурттил автор, А. Серовлул учайсса «Мадонна», «Вин на ххирара», Л. Лещенкол «Ттул гъан­ссагуй, архссагуй», Ф. Киркоровлул «КIиришиврул паччахI», Н. Басковлул «Вальс» (музыка И. Крутойл) балайрду миннува анжагъ цаппарассар.
Ванил назмурду видурцIуну дур инсаннал асардацIунсса личIлулшиврул, инсаннал хасият­рал марцIшиврул, ччаврил.
Шаэр оьрмулуцIа хьуну бур 2008 шинал.
Шаэрнал оьрмулия бусла­симуницIун ккаккан дуллай бия мукунна ванил суратру ва видео, итабавкьуна ванил мукъурттий чивчусса балайрду.
Ва давривух гьуртту хьунни ДГУ-лул, ДГУНХ-лул, ДГПУ-лул преподавательтал ва студентътал. Миннал дурккунни шаэрнал язи-язими назмурду.