Уттигъанну Каспийскалий ЦБС-лул 1-мур филиалданий хьунни Ниттил мазрал кьинилун ва Экологиялул шинан хас дур­сса батIаву. Мунивух гьуртту хьунни шагьрулул 2-мур школалул дуклаки оьрчIру, муаьллим Ума СалихIовал каялувшиндаралу.

Бадрижамал Аьлиева
Ниттил мазрал кьинилул тарихрая бувсунни филиалданул хъунмур Саида ХIурияловал. Бувсунни щаллагу аьрщарай бушиву 60 азаруннийн бивсса мазру, миннувасса бачIиминнунгу бухлагаврия хъуннасса нигь душиву.
— КIулсса куццуй, Да­гъус­ттан хъанай бур Аьрасатнал ца яла чIявусса миллатру бумур регион. Амма Дагъус­ттан­нал ляличIишиву, ца муниву дакъасса, дур караматсса тIабиаьтравугу. ЦIанасса чIумал Дагъусттаннай бур буручлачисса, федерал агьамшиву ду­сса 4 кIану, бур паччахIлугърал 14 заказник ва республикалул агьамшиву дусса 25 тIабиаьтрал гьайкал. ЖучIанма бивсса бусалардайн бувну, Дагъусттаннал халкьуннал мудангу дуручлай бивкIун бур тIабиаьт: вацIри ва цивппалусса мурхьру, аьрщи, жанаварт, лелуххант, щинал луртанну. ЧIявуми жанаварт ва лелуххант, кьулларду, хIатта зун­ттавусса цаппарасса мурхьругума рувхIанийссаннун ккаллийну бивкIун бур, — увкунни ванил.
Дуклаки оьрчIал дурккунни ниттил мазурдийсса назмурду. Цинявнналагу ххал дунни Да­гъусттаннаясса видеофильм.