Хъунма хIал ливчIун бакъар дуккаврил шин къуртал хьун, дуклаки оьрчIал ва учительтурал цимирагу шинал захIматрал хIасилну хъанахъисса ПаччахIлугърал Цасса Экзаменну дулайсса чIун дучIан. 1717Му журалул экзаменну дуллалисса чIумалсса тагьарданул ялув бацIансса, экспертътал хIадур буллалисса даву дачин дурну бур «Жяматийсса ялувбацIултрал корпус». Му суккушиндарал семинар хьунни вай гьантрай Къарабудахккантуллал райондалийсса «Бургъил зума-къирагъ» («Солнечный берег») цIанилусса оьрчIал бигьалагаврил ва цIуллу-сагъшиву цIакь даврил центрданий.

Бадрижамал Аьлиева
Шиккува кIицI лаган, му Корпусравун студентътал цачIун хъанахъиссар цала хушрай.
Семинарданул сакиншинначиталну бия Дагъусттаннал паччахIлугърал университет ва ДР-лул КIулшиву дулаврил ва элмулул министерство.
Мартрал 10-нний министерствалул чIарав бавтIун бия респуб­ликалул шанма вузрал – Дагъусттаннал паччахIлугърал университет­рал, Дагъусттаннал паччахIлугърал техникалул университетрал ва Да­гъусттаннал паччахIлугърал медициналул университетрал – студентътал, цинявппагу – 150-нния ливчусса жагьилтал. Ца хъунма автобус ва шанма-мукьва «Газель» бувцIуну, лавгуна ми Избербаш шагьрулучIасса «Бургъил зума-къирагъ» центрданийн.
Аьрххи цава, ххуллу кIива тIий, ва хьунни оьрчIан цалла кIулшивуртту, бюхъурду ххал бувансса, авадан бувансса ва аьлагъужасса шагьрулия бигьалагансса аьр­ххину. Сайки 3 гьантлий Каспий хьхьирил зуманив оьрчIащалсса даву дачин дурну бия хасъсса пишакартал. Ми гьантрай студентътурал щаллу дунни хасъсса кIулшивурттал программа, хьунни личIи-личIисса тренингру, мастер-классру. Ахирданий тIурча, семинарданул экспертътурал ва куратортурал дунни собеседование ва тестирование.
Ва шиналсса ГИА (Государственная итоговая аттестация) даврил базалия ва цаймигу хIакъи-хIисаврттая студентътурахь бувсунни корпусрал региондалул координатор, ДГУ-лул тарбиялулмур даврил отделданул начальник Мурад Буттаевлул ва ДР-лул КIулшиву дулаврил ва элмулул министерствалул управлениялул начальникнал хъиривчу Жамиля АхIмадовал.
Семинарданул лагрулий хьунни ДР-лул кIулшиву дулаврил ва элмулул министр Шагьаьппас Шагьовлул ва ялувбацIултрал хьунабакьавугу.
ОьрчIру шагьрулийнмай зана хьунни хъиннува ххуйну зунсса пик­рирдалгу вибувцIуну.