Дагъусттаннал паччахIлугърал тарихрал ва архитектуралул цачIун бувсса музейрал цIусса директорну ивтунни – Гъуниннал райондалул бакIчину ивкIсса Пахруттин МахIаммадов.
Музейрал коллективращал му шадлугърал тагьарданий кIул унни январьданул 23-нний ДР-лул культуралул министр Зарема Буттаевал.
Бадрижамал Аьлиева
— Пахруттин Оьмаровичлул цалла дур экономистнал кIулшиву. Ванал хъачIунттах бур налогирттал органнаву каялувшиву дуллалисса къуллугъирттайсса даврил хъунмасса опыт, уттигъаннунин, тIурча, ва зий ивкIссар Гъуниннал райондалул бакIчину. Ванал каялувшиндаралу Гъуниннал райондалун 2015 шинал бивхьуссар республикалул кIанттул каялувшиндарал органнал дуллалисса давриву яла лахъми кьиматру. Ттул пикрилий, музейрал коллективран бахтти хьуссар даврил укунсса опыт бусса инсан каялувчину учIаву. Жунма кIулли Республикалул БакIчи Рамазан АьбдуллатIиповлул хъунисса хьул-умудру жула музейрацIун бавхIуну бушиву. Музейрал бур кьянкьану ччаннай бавцIусса коллектив, ххуйну зуншиврулгу щаллу дурну дур чара бакъа аьркинсса шартIру. ХIакьинусса кьинирив агьамшиву дур музейравун шайссаксса чIявусса инсантал кIункIу баврил, дуклаки оьрчIру, студентътал. Шиву зузи дуван аьркинни личIи-личIисса проектру. Умуд бур вай цимурца Пахруттин Оьмаровичлул каялувшиндаралу хьхьичIунну щаллу дуван бюхъанссар тIисса, — увкунни Зарема Ажуевнал.
Барчаллагь увкунни уттинин музейрал директорну ивкIсса Игорь Олейниклухь, цалгу коллективрал бакIчишиву дурсса бигьа дакъасса чIумал, му коллектив цуппа цачIун буван, лагма лаган буван бювхъусса.
Музейрал директорну ивтсса Пахруттин МахIаммадовлул барчаллагь увкунни цайнна дурсса вихшалдарахлу.
Ахирданий Зарема Буттаевал музейрал коллективраву хьхьичIунминнан дуллунни ДР-лул ХIукуматрал ва Культуралул министерствалул чулухасса ХIурматрал грамотартту.
