Даниял Магьдиев

Ттул Зумрут, ттул Лулу

ЧIирттувагу ливчIун бакъахьурчангу
Ттул чIаххув душ Зумрут, кIай зул къатрая,
КIинтнил лагабургъил гъили дай ларзу
ДакIний дур ттун ттигу, шинну гьарчангу.

Ххаллилсса вил буттал цIа гьаз дувансса
На акъа шярава уккайсса цури.
КIизивулул къатри диркIсса кIанаву
БакIгу хьхьичIун дуртун, ацIайма цури.

Нара къарутарчан дакIнийн оьрчIшиву,
Ларгсса чIумуяту учайсса щилли.
Интнил ххаллилшиву хIисав къавхьунахь
КIинтнил гьантраяту бусанма чари.

Дакъассари цичIав ахир дакъасса,
МарцIсса ччаву дакъа, ва дунияллий.
Шанавух увкусса оьрчIал пишнияр
Дакъассари цамур цичIавгу марцIсса.

Ина оьрчIшивура, хъуннар къашайсса,
Интнил кIюрх укунна, мудан тяхъасса,
Ххярк тIий, излай, агьлай, шаттирду ласлай,
Вил каруннавура на хъуна хьусса.

Ттухва аякьалий бувсса захIматран
Арцуйнусса багьа на къабищунна.
Ттул оьрчIнийсса Лулуй, цIанасса Зумрут,
Гъинтнил гъилишиву на вин дулунна.

Вай нанисса шинну дацIан дан къашай,
Багъру хъахъи шайхту, дакI къума лагай.
Ччавурив вичIансса, оьрчIнийра хьусса,
ЧIумуща цукунчIав чан дуван къашай.

Ккурккул, Бархъал, Гьанжи – вил мина чуври,
ОьрчIшиву ттуяту ладиркIсса цанни?
Нава къабусарчан вихь ххирашиву,
Утти вил ва ттул дакI тIитIайсса щилли?

Лулуй, Лулуйгу тIий, кару тIиртIуну
ВичIан ачайссияв, ссичIату ливхъун,
Инагу, ххарину пишгу тIий, мудан,
На карав уцайвав, ххирагу уллай.

Къаучинна Зумрут, учинна Лулуй,
Каруннавун уца цIуницIа вила,
Маитав къужа хьун, къачча хъунав хьун,
Итикьай, оьрчI куна, на вила карав.

Хъамабитайссарив тачIав лахIзарду,
Нава вил гъилисса каруннавусса,
Вил дакIних вичIилий, ххарину пиш тIий,
ТIааьнсса шанавун нава лагайсса.

Ца махъ бухьурчангу, щялмахъ чичирчан,
Ттуйн къаччан бикIайссар ларгсса оьрчIшиврул
Ца ххуттай бунугу, гъалатI буккарчан,
На куклу дувайссар мяйжансса ччаву.

ЧIаххувдуш бурхха тIий, хIурмат хъун буван
КъабивкIмур ва бумур баччан булларча,
Багьа цир ххуттардил вай цIанакулсса,
Ттула нава хъяврин уллай чивчусса.

ЧIявуну лагара, навалу ливчIний,
Ларгсса оьрчIшиврувун, Лулуй, вил хъирив,
ЦIунил зана шара, хъинну къаччайна,
Зумрут, захIматнугу ттула шинначIан.

Лулуй, ттул хъунмур ссу, цал ттигу уца
Вищала на ккурчIав цIан маркIачIанай,
Инава бувххукун, бигьалаганнин
КьурванпатIиматлухь на угьи уча.

МахъачIил маччанал дурсса щавурдайх
Ках уча, лажинни, гъилисса каних,
Акъарича цама ттун вияр гъансса,
Пиш чин а цIунилгу, оьрчIни укуна.

Хаин хьунал тIисса куклусса махъру
Щилай бурча циняв, кьутIай мечI кунма,
Лаити цал ттигу вила карщуву,
ЧIаваний дяркъусса гъарая куна.

На вил цIанилура игьалагайсса,
Вил каруннавура гъили лагайсса.
Ттул оьрчIнийсса Лулуй, цIанасса Зумрут,
Циняв назмурду на винни хас дурсса.

ЗахIматний бакъарив, вихшала дурну,
Оьвчайсса инсаннал чIарав ацIайнайн.
Ттунгу багьай оьвчин кув чIумал Лулуй,
ОьрчIшивруйнгу, вийнгу, ламус къабувну.

Дулувияв гьарзад на ссихIирчинан,
Агар щябитарчан ва жула ккурчIав
КьурванпатIиматгу, Лулуй, инагу,
Зул каруннахь нагу ца гъинтнил хьхьуну.

Аьлилавл ахъуву лелуххул балай,
Мизитрах чавхъу тIисса щаращул макьан,
Дахьа жагьил хьусса ххарисса зущал,
ЦичIав дардру дакъа, пиш тIисса нагу.

На чIавасса чIумал архIал бивкIнугу,
Оьрмулул шанмагу арх буцан бунну,
Аммарив лахIзарду ттуву ххарисса
Зу дакIнийн багьтари чантIа тIий бури.

Вил ппу гьунар бусса ХIажимахIаммад,
Лулуй, Зумрут, на зуйн икрамрай ура,
КIизивулул къатри диркIсса кIанаву
ДачIрасса хъюнил хьхьичI мудан ацIара.

ОьрчIний ххира хьусса Лулу маччасса,
ЧIаххувдуш, ссу кунма, ттун чIалачIисса,
Багъишла ити на, багьайсса хIурмат
Уттинин вихава бан къашаврихлу.

На вичIан учIанна къур щюлли шайхту,
Интнил ххаришиву ттущалла ларсун.
Вил хъювун ухханна, кьутI къаувкуна,
Банавшалул кацIгу канил бувгьуну.

Лулуй, Лулуй куну, на вийн оьвчинна,
ОьрчIний куна, вичIан кару тIитIинна
Гьанавиххи хьуну, маз къухъна хьурчан,
ДакIнихь нава чаймур буси учинна.

Хъювхъу багьарчангу ттигу гъилисса,
Вил кару цIуницIа ххира дуванна,
Ттула кIяла хьусса бакI кьусгу риртун,
Ина ках чиншиврул хьхьичI щяикIанна.

Вил гъилишивруя дакI ххари дуллай,
Гьан дував на шинну, Лулуй, цимигу.
Вин хIурмат бан цичIав цамур къаляхълай,
Зумрут, ура вил хьхьичI на бакI кьус ритлай.

Пахъ дагьунни гьарзад, хьхьунил ларсунни,
ЦIунил шану ттущал ччалан бивкIунни,
Хияллал дурцуну, дурхсса ттул дакIгу
ОьрчIшивручIан, Лулуй, лирхъун ларгунни.

Зунттаву ляхъайми цинявппа душру
Ляхъаннав, ттул Лулуй, ина кунмасса,
Лахъисса оьрмулий хьунабавкьуми
Лякъиннав вин, Зумрут, ттуха лавхьхьусса.

ХъатIай тямаданал цалчинсса кьуру
Гьаз бай цIусса кулпат лахъа-хъун буллай.
Нарив ттула кьуру гьаз бара гьарцал,
ЦIуллу баннав Зумрут, ттул Лулу куну!