Ларгсса нюжмар кьини Апанни Къапиевлул цIанийсса Лакрал музыкалул ва драмалул театрдануву хьунни цIу буккан бувсса «Ккурккуллал Щаза» спектакль.

Зулайхат Тахакьаева
Спектакль чивчуну бур аьлимчу-фольклорист Халил Халиловлул. Сценический редактор – Аьрасатнал Федерациялул магьирлугърал лайкь хьусса деятель Гулизар Султанова. Режиссер – ДР-лул халкьуннал артист Аслан МахIаммадов. Художник – ДР-лул лайкь хьусса художник Аскар Аскаров. Композитор – Аьрасатнал халкьуннал артист Ширвани Чаллаев. Ва спектакль Лакрал театрданул бивхьуссия 2005 шинал. ЦIу буккан бувсса спектакль хьхьичIмурнияр чан-кьансса кутIагу, бахханагу бувну бур. Му ттинингу ккаккан бувссар Поэзиялул театрдануву «Воспевший Дагестан» фестивальданул лагрулий ва республикалул 11 театрданул дянив лайкь хьуссар Дагъусттаннал БакIчинал премиялун.
Тамашачитурал хьхьичI бавцIу­нни революция хьуннинсса заманнул Дагъусттаннал хьхьичIунсса шаэртураву ца яргсса кIану бувгьусса шаэр ва балайчи Ккурккуллал Щазал захIматсса оьрму. Щазал щалла творчество дур зунттал цIансса аьдатру ва оьсса шярал мазру сававну гъюжу бувксса цила кьадардания бусласисса. Ми шеърирду гьануну лавсун бур спектакльданувугу.
Щазан (Дагъусттаннал халкьуннал артистка Луиза Шагьдилова) дакIнийн багьлай бур зиялий лавг­сса цила оьрму. Актертурал бю­ххансса тIуркIулул тамашачитуран цал ттигу исват бунни, сситтучIа ссавур дан къабюхъарча, ахир оьнийн кIура даяйшиву.
Мискинсса ухьурчагу, къирият бюхттулсса, аьдлу-низам кIулсса, аьдатирттай ацIайсса буттал (Да­гъусттаннал халкьуннал артист Аслан МахIаммадов), хъуни къатрал оьрчIах бурувгссарча тIий, душ мукъулун багьсса иш лялиян бан къахъанай сситтуй шаппату бу­ккан бувсса Щазан (жагьилсса Щазал роль дургьуну бия Зульфия Архилаева) нясив хьуну бур Гъумук авадансса АьвдурахIиннул (Наби МахIаммадов) ужагърай ичIува душну зун. Ганалгу га Ва­ччатусса цала хъамаличу Хъунбуттал (Дагъусттаннал лайкь хьусса артист ХIажиаьли ХIажиаьлиев) дуснан АхIмадлун (Ибрагьим Мусиев) щар буллуну бур, ганих хъунмасса багьагу лавсун. Цила марцIсса ччавугу чулийн къадурккун, рахIму ба­къасса ласная къия ва зулму ккухIлан багьсса Щаза бур:
Ттул оьрмулул интнийх
ттурлу даркьунни,
БакI щаращул ялтту
кIинттул микI кунма.
Ттул талихIрал цIуку
цIаннал бувгьунни,
ЦIан ттуруллул бувгьу
ВацIилу кунма, – тIий.

Къалпсса инсантурал мурдалсса мукъурттийн вих хьуну цала лякьлул оьрчIал оьрму оьнийн гьан бувшиврий шинну ларгун махъ бакIрай авцIусса ппу ур: «Ттула оь нава хIачIав, ттула дикI нара дукав, нава бувгьусса хIави ттула каних ххуку бав», — тIий.
Ппу паракьат ан къавхьусса нинугу (Барина Мусаева) дур «Вил чIарав дацIан къархьусса, вихлу ду­ккан къархьусса, вил нину дирчIивуй! Агь, ттул оьрму ччу­ччивуй!» — тIий цийнна цурда на­аьналий.
Спектакльдануву ялагу роллу дургьуну бия Дагъусттаннал халкьуннал артистка Жинасат ДинмахIаммадова (АтIа), Дагъус­ттаннал лайкь хьусса артист Шамсуттин Къапланов (ТтурчIиял Маммадай), Дагъусттаннал лайкь хьусса артистка Халисат Батырбекова (лас ивкIусса чIаящирищар).
Спектакль къуртал хъанай бур Дагъусттаннал халкьуннал шаэр Расул ХIамзатовлул Щазан хас бувну чивчусса мукъурттийну.

Вил чIугу, вил угьгу,
язухъсса махъгу,
Зунттал инсантуран
бавну бур чIалну.
Тти тIурча вил махъ бур
иттавсса макьну,
ТалихI къабуллунан
ччергъилттул зяйну.

Спектакль къуртал хьуну махъ сахIналийн лавхъун, цала шяраваллил жяматрал цIания театрданул коллективрахь, хаснува асар хьунну рольлу дургьусса актертурахь барчаллагь увкуна Ккурккуллал школалул директор Даниял Магьдиевлул.