Гьарца шинал декабрьданул 3-нний щаллагу дунияллий кIицI лагайсса Мушакъатминнал кьини жулла республикалий дувай личIи-личIисса мероприятияртту. Ми даврил агьамми мурадругу бур цIуллу-сагъшиврул ссуссукьуминнахсса ургъил-къулагъас ларай даву, миннал ва цIуллу-сагъминнал дянивсса манзил чIиви баву, миннаву цивппагу аьркиншиврийнсса, цаллами каширдайнсса вихшала цIакь даву.
Бадрижамал Аьлиева
Мукунсса ца мероприятие хьунни ЦIуллу-сагъшиврул ссуссукьусса оьрчIансса реабилитациялул центрданийгу. Му дайдихьлай, Центрданул директор Татьяна Березкинал кIицI ларгунни Мушакъатминнал кьинилун хас дурсса мероприятияртту ва идаралий цIакьсса аьдатравун дагьшиву, цикссагу шиннардил лахъишиврий дуллай. Барчаллагь увкунни Дагъусттан Республикалул ЗахIматрал ва соцразвитиялул министерствалухь, муданнасса къулагъасрахлу, буллалисса кумаграхлу. Барчаллагь увкунни оьрчIал нитти-буттахъахь, миннал буллалисса захIматрахлу, ччаврихлу, вихшалдарахлу ва ссавурданухлу, чIа увкунни цинявннаннагу цIакьсса цIуллушиву.
Мукунма оьрчIан ва нитти-буттан цIуллушиву чIа тIутIисса ихтилат бунни ДР-лул ЗахIматрал ва соцразвитиялул министерствалул кулпатрал, хъаннил ва оьрчIал иширтталсса байсса отделданул начальник Фарида Забитовалгу. Мунил барчаллагь увкунни Реабилитациялул центрданул зузалтрахь, буллалисса хъунмасса ва дакIнийхтунусса захIматрахлу, оьрчIаха дуллалисса аякьалухлу.
Ахирданий центрданул оьрчIал ккаккан бунни личIи-личIисса номерду, балай увкуну, къавтIун бивзун, назмурду дурккуну. Цинявппагу оьрчIан бахшиширттан дуллунни нахIу-нацIурду.
ЦIуллу-сагъшиврул ссуссукьуминнал кьинилун хасну ДР-лул БакIчиначIасса Уполномоченный Аьлибек Аьлиев ивунни аькьлу-кIулшилул итххяххаврил чулуха махъун багьлагьисса оьрчIансса «Забота» къатта-интернатравун. Мунащал бия ДР-лул захIматрал ва соцразвитиялул министр ХIасбулла ХIажигишиев, ДР-лул БакIчинал маслихIатчи ХIусман МахIачев.
Цалва ихтилатраву Аьлибек Аьлиевлул кIицI лавгунни махъсса ппурттуву ва интернатраву ххуй чулиннайсса дахханашивуртту хьушиву, яла-яларив – оьрчIахсса бургаву.
— Жунма чIалай бур махъсса зурдардий «Забота» интернат баххана хьуну бушиву. ОьрчIахсса бургавугу цамур куццуйсса дур. Хъунмасса барчаллагь учин ччай ура интернатрал зузалтрахь. Мяйжаннугу, ва къабигьасса давур, шикку зий бур хъуннасса дакI-къюкI ва оьрчIахсса ччаву дусса инсантал, — увкунни ванал.
Гихунмайсса ихтилатраву кIицI лавгунни укунсса оьрчIал чIарав шайссаксса бацIлан аьркиншиву, миннан кумаг буллай, шайссаксса чIявуну шиккун букIлай.
ХIасбулла ХIажигишиевлул увкунни:
— ХIакьину ляличIийсса кьини дур, цилгу жунма дакIнийн бутлатисса жула чIарав бушиву каширду ссуссукьусса инсантал, жува миннан кумаг буллан, чIарав бацIлан аьркинсса. ХIакьину республикалул каялувшиндарал ва махъсса органнал шаймур буллай бур цIуллу-сагъшиврул ссуссукьусса инсантуран рахIатшинна щаллу дуван, — куну.
ХIусман МахIачевлул чIа увкунни оьрчIан цIакьсса цIуллу-сагъшиву, оьвчаву дунни общественностьрайн цIуллу-сагъшиврул ссуссукьусса инсантурал масъаларттах къулагъас дуван.
Ахирданий циняв оьрчIан дуллунни личIи-личIисса бахшишру.
