Ххирасса дустал! На мудангу пахрулий дакIнийн бутара нава 25 шинал хьхьичI «Илчилул» гьану бивзминнавух бивкIшиву. «Илчилул» хъунама редактор Качар ХIусайнаевал цуппа хъунмурну бивтния мукьах къулбас дурсса цалчинсса приказнава даврийн кьамул бувсса бивкIшивриягу.

Лахьхьу-цархьхьу кунма ххуйну дакIний бур Качар Абачараевна, Руслан Башаев, Казбек Мазяев, ХIасан КIурухов ва нава, циняв ца кабинетраву, цалчинмур номер хIадур буллай бивкIсса куц. Яла ца зурува ПатIимат Бариевагу бувкIссия. Муния махъ миллатран ххира­сса чичултращал, Дагъусттаннал Халкьуннал шаэр Юсуп Ха­ппалаевлущал, элмурдал доктор Абачара ХIусайнаевлущал ва цаймигу бусравсса инсантуращал зун тIайлабацIу шаву – му ттул талихIри. Вай 25-гу шинал мутталий кказитрал бивтунни бюхттулсса ва бусравсса хху­л­лу. «Илчи» мудангу бивкIссар агьалинал пикри-хияллу, дард­ру, буруккинтту лаласлай, агьамсса масъалартту гьаз буллай, миллатрал агьалинал оьр­му ххуй бансса шартIирдая чичлай. ХIакьинусса кьинигу кказит хьхьичIунмур ххуттай бавцIуну бур, Дагъусттаннай хъанахъисса иширттая агьалинан тIайламур баян буллай. Ттун хъинну тIааьнну бикIайва, Москавлив бикIу, цамур шагьрулий бикIу, «Илчи» кказит бусравну бушивриясса ихтилатру.ТIааьнну бикIайва кказит хасну ттунмагу дакI тIайласса дуснугу, аькьилсса учительнугу хьуну тIий. Ттунма, кказитрайсса даву кьариртун, цамур давриха зун багьарчагу, «Илчи» ттун яла ххирамур коллективнува ливчIунни. Ттун тIайлабацIу хьунни лавай­сса даражалул журналистуращал уртакьну зун. Минная чIявусса ххуй-ххуйсса затру лахьхьин! Ца кьаивтун, таманал цIа учин къахьунссар, буниялттунгу итххявхсса, гьунарду бусса, аькьлулул куртIсса ва кIулшивуртту цIакьсса инсантал зий бия редакциялий. Ттигу мува бюхъулий ва хIарачатрай зийнма бур.
На мудангу кказитрал вихшаласса буккуну бивкIра. ХIура дуккангу къаритав бавкьу­сса коллективращалсса дусшиврийсса арардугу.
На зун зул бигьа дакъасса давриву чIа тIий бура талихI, цIуллушиву, дуллалисса давурттаву тIайлабацIу ва хъиншивуртту!
Земфира Шаллаева,
«Эксклюзив» салондалул хъунмур