Ххуллун кьини А. Къапиевлул цIанийсса Лакрал театрданул залдануву дия тачIав дакъачIинсса уттарашиву. Лакку мазран хас дурсса конкурсраву гьуртту хьун сайки циняв шагьрурдаяту ва лакрал районнаяту бувкIун бия дуклаки оьрчIру – ттуршунная ливчусса.
Му конкурсрай ккаккан дурну дия кIира номинация: назмурду дуккаву ва балайрду учаву. Дия мукунна инсценировкардугу. Кьимат бищун личIи бувну бия ацIния цая инсанная сакин бувсса жюри. Миннавух: Гулизар Султанова (жюрилул хъунмур), Бадрижат МахIаммадхIажиева, Мариян Илиясова, Качар ХIусайнаева, Руслан Башаев, Рамазан Фаталиев, Сулайман Мусаев, Аслан МахIаммадов, Мадина Исмяилова, Светлана Мутаева, Фиразат Магьдиева.
Му ххишала дакъа хъуннасса ва агьамшиву ххисса даврил сиптачину хьуну бия Лакрал театр, мунил хъунмур Набинал душ Бадрижат МахIаммадхIажиева бакIчину. Лакку мазгу, миллатрал культурагу ххирасса, ччисса цума-цанналгу цIанияту барчаллагь чинсса бакъа бакъая.
Цивппа оьрчIал ккаккан бувсса номердугу, хъиривсса жюрилул кьимат бищаврил батIавугу най дия сайки 4 ссятраяр ххишалагу.
ХьхьичIунсса кIанттурду бувгьуминнан дия ххуй-ххуйсса бахшишру, дия личIи-личIисса призру.
Ва хъинну ккалли бансса иширан хас дурсса гьарза-гьартасса материал дуккантIиссар «Илчи» кказитрал хъиривсса цания ца номерданий.
Жул корр.
