Майрал 17-нний «Дагестан» РИА-лий хьунни уттигъанну Азирбижаннаву хьусса Дагъусттаннал Культуралул кьинирдал жям дуллалисса пресс-конференция. Мунивух гьуртту хьунни ДР-лул культуралул министрнал хъиривчу Мурад ХIажиев, ПаччахIлугърал «Лезгинка» ансамбльданул директор Жамбулат МахIаммадов, Дагъусттаннайсса Азирбижаннал паччахIлугърал драмалул театрданул директор Фирдоуси Аскеров, ДР-лул халкьуннал артист МухIсин Камалов.

Бадрижамал Аьлиева
Мурад ХIажиевлул дакIнийн бувтунни Дагъусттаннал Культуралул кьинирду Азирбижаннаву дуршиву ДР-лул БакIчи Рамазан АьбдуллатIиповлул сипталийну. Бувсунни уттинин цаллагу жулла культура Азирбижаннаву укун гьарта-гьарзану кка­ккан къадуршиву, Республикалул БакIчинал сипталийн бувну бювхъушиву ва даву бюхттулсса даражалий дуван.
— Культуралул программалущал жу бивру Баку, Хачмаз, Кусары, Закатал ва Белокан шагьрурдайн, мукунма Да­гъусттаннаясса 3 театргу: Лазгиял, Азирбижаннал ва Яруссаннал. Жун щаллу дурну дия ххишала дакъа ххуйсса, ххаллилсса шартIру, ччай-къаччай хIасул хьусса чIири-хъунсса диялда­къашиву, аьркиншинна най дунура щаллу дувайва. Укунсса хьунабакьавурттал мяйжаннугу халкь кунначIан кув гъан буллалиссар, — увкунни М. ХIажиевлул.
Фирдоуси Аскеровлул бувсунни Хачмаз шагьрулийн багьсса цалва театрданул аьрххилия. Гейдар Аьлиевлул цIанийсса Культуралул къатлуву ххалаххи багьансса кIану къабивкIун бур инсантураха. Микку ва театрданул ккаккан бувну бур азирбижаннал цIа дурксса драматург АьбдурахIим-баг Ахвердиевлул чивчусса «Неизменные лица» пьеса. Азирбижаннал тамашачитурал жулла республикалия­сса актертал хъинну ххуйну кьамул бувну бур.
Хачмаз шагьрулий тIиртIусса ссавнил лув республикалул культуралул аваданшиву цалла цаннияр ца ххуйсса къав­тIавурттайну ккаккан дурну дур «Лезгинка» ансамбльданул. Цивппа му шагьрулийгу, Азирбижаннал махъсса шагьрурдайгу цукун кьамул бувссарив бувсунни Жамбулат МахIаммадовлул. Авадансса культуралул заллухърусса, махIаттал-хIайран буван бигьа бакъасса азирбижаннал миллатран ххишала дакъа хIаз дирзун дур жулла цIанихсса ансамбльданул программа, махъсса цинявппагу артистал ва коллективру. Дунияллул цимивагу мурцIнийн бивсса, цимивагу миллатрал инсантал цан хъатру ришлай бивкIсса, къа­ккавксса тамашачитал бакъа­сса «Лезгинка» ансамбльданул къавтIалтравурив Азирбижаннал публикалуща бювхъуну бур яла чаннами, гъилими асарду кьабитан. Залдануву ккаккан дуван пикрилий бивкIсса концерт, инсантурал чIявушиврийн бувну, кьатIувра ккаккан дурну дур. Мяш бакъа гъилишиву дуллай, чIер-чIер тIий бивтсса кьиблалул бургъилу жулва артистурал мяйжаннугусса чувшиву дурну дур, мукунна тамашачитуралгу, цимирагу ссятрай нанисса концертрая цуя-ца ти-шинай хьуну акъар, цIуру-кIуру тIутIисса хьуну акъар.
— Азирбижаннаву яла сийлийсса, 2 азара инсан лагай­сса, Бакуйсса Гейдар Аьлиевлул цIанийсса Дворец ккуччу-пIякьа тIий бувцIуну бия инсантурал, ляхсса кIанттурдугума бувгьуну. Инсантал бия билетру бири­къаллай. Концерт къуртал хьуну махъгу жулва артистал итакъабакьлай бия тамашачитал. «Лезгинка» ансамбль дазул кьатIув цимирагу хIукуматрай хьуссар, амма, тIайламур бусан, Азирбижаннаву дия ляличIийссара иминшиву, гъилишиву, — увкунни Жамбулат Мусаевичлул.
Азирбижаннавун лавгсса дагъусттанлувтурал бусаврийну, гурсса хъатру ришлай кьамул бувну бур Республикалул БакIчи Рамазан АьбдуллатIиповлул лавхъсса махъ. Муданагу му­къул усттарсса Рамазан ХIажи­мурадовичлул ва ххуллух бю­хханнува бувну бур ихтилат.
МухIсин Камалов хъунмасса барчаллагьрай ия Азирбижаннавусса цалва даврил уртакьтурайн, цивппа кьамул бувсса, тIайла бувксса лавайсса даражалухлу.
— Концерт дикIайкунсса анш­лаграйну ларгунни. Цинявппагу артистурал дакIнил хIал (настроение) хъинну ххуйсса бия. Концерт бюхттулсса даражалий лагаврин хъунмурчIин кабакьу бунни Азирбижаннавусса жул дустурал, уртакьтурал бувсса кумаграл, жуща жулла даву ххуйну дуван бюхъаншиврул дурсса ххаллилсса шартIирдал, — увкунни ванал.
Укунсса Кьинирду аьдатравун дагьанссар тIисса пикригу бур. Ялун нанисса чIумуву Дагъусттаннайгу хьунтIиссар Азирбижаннал Культуралул кьинирду.