Ттигъанну Гъумучиял клубраву хъуннасса шадлугърал даражалий хьунни Лакрал райондалий 70-ку шиннардий лачIунбуккаврил школалул гьану бивзсса ва гихунмай райондалий оьрчIал ва чIаважагьилтурал спортшкола (ДЮСШ) тIигу-тIивтIуну, мунил цалчинсса директорну зий ивкIсса, лачIунбуккаврил ва классикалул лачIунбуккаврил СССР-данул спортрал мастер Ибрагьим Ибрагьимовлул цIанийсса районнал дянивсса лачIунбуккаврил турнир.

Зулайхат Тахакьаева
Лакрал спортрал тарих байбивхьусса миллатрал цIанихсса арснал аьпа абад буллалисса, мунищала архIал жагьилтурал дянив спортрайну дусшиврул арардугу цIакь даву мурадрайсса турнир цалчин дурссия ванияр 2 шинал хьхьичI. Гьашинусса турнир хас дурну дия райондалул ДЮСШ-лун 35 шин там шаврин. Турнир сакин дурну дия райондалул администрациялул Спортрал ва физкультуралул комитетрал, кIулшиву дулаврил управлениялул, оьрчIащалсса ва жагьилтуращалсса отделданул ва ДЮСШ-лул цачIуну.
Турнир тIиртIуна чIава лачIун­буккултрал командарттайн сахIна­лийн оьвкуну. ДуркIун дия 10 команда: Лакрал, Ахъушиял, Гъуниннал, Тарумовкаллал районнаясса; Лаващиял ва Гергебиллал районная дия кIи-кIира команда: 2 команда дия МахIачкъала шагьрулиягу — «Спартак» СДЮСШОР-данул ва «Лидер» ДЮСШ-лул. Сайки 200-ннийн бивсса чIава спортсментал.
Райондалул спорткомитетрал хьхьичIунсса пишакар Малик ХIусмановлул барчаллагь увкуна турнирданий гьуртту хьун бувкIсса командарттал хъуниминнахь, тренертурахь, гьуртту хъанахъиминнан чIа увкуна тIайлабацIу.
Дусшиврул ва спортрал байран лахъа-хъун дан райондалийн бувкIсса бусравсса хъамаллуравух бия: Аьрасатнал ПаччахIлугърал Думалул депутатшиврийнсса кандидат Аьли Шяъбанов; СССР-данул боксрал мастер Аслан Къажлаев; Ибрагьим Ибрагьимовлул гъан-маччами, шяравучутал, ванал тарбия бувсса спортсментал.
Лакрал райондалул бакIчи Юсуп МахIаммадовлул цалва ихтилатраву кIицI лавгуна спортраву хьун дур­сса яргсса хьхьичIуннайшивурттахлу ватандалул хIакьсса патриот Ибрагьим Ибрагьимов лайкьсса эбратну хьушиву 70-80-ку шиннардийсса Лак­рал райондалул никиран.
Тай шиннардий, цукун­чIавсса­рагу шартIру дакъанна, Ибрагьим ХIажиевичлул хIарачатрайну райондалул лачIунбуккулт байбивхьуну бур зональныйсса ва республикалул бяст-ччаллаву гьуртту хъанай ва хьхьичIунсса кIанттурду бугьлай.
Гьуртту хъанахъиминнан тIай­лабацIу чIа тIий, Юсуп МахIам­мадовлул увкуна: «ХIакьину жула чIава спортсментурал жунна кка­ккан дантIиссар цалла усттаршиву. Гьай-гьай, бяст-ччаллаву цавай ххув шайссар, цавай бух шайссар. Ххув къахьурчагу, гьурттушинна цурда агьамссар, миннаву хьхьичIунмай хъит учинсса гъира-гьавас ххи хъанахъиссар. ХIакьину ва турнирданий гьуртту хъанахъиминнаягу таманссанная цIанихсса спортсментал бувккун, цалла ватандалул цIа лахъ данссар тIисса умуд бур», — куну.
Ихтилатру буллалими кIицI лаглай бия Ибрагьим Ибрагьимов ивкIшиву цалла даврил фанат, энтузиаст. Гъумуксса спортзал хьхьичIва-хьхьичI ганал сипталийну бакьин бувну бивкIшиву. Гихуннайгу сайки цинярда давуртту дай­сса диркIун дур цалла, дурмуних багьагу тачIав тIалав къабувну.
Цалва ихтилатраву Аслан Къажлаевлул дакIнийн бивчуна Ибрагьим ИбрагьимовлуцIун бавхIусса цаппара лахIзарду:
— На ура мюрщими классир­ттаву дуклакисса оьрчI. Кьинирдал ца кьини Гъумук бур ца аваза «Мастер увкIун ур, мастер увкIун ур», — тIисса. Яла бавуна га оьрчIру лачIунбуккан вардиш буллай ушиву. На чIивинияцIава боксрахун машхул хьуну уссияв. Ччан бивкIуна лачIунуккаврихунгу агьан. Занай ура тренировкардайн. Амма на гайминнаяр хьхьарасса ияв. Нигьауслай ур къаучиншиврул, дуклаки оьрчIал дянивсса ца бяст-ччалливу нагу гьуртту хьун ччай ура учав. Ибрагьим ХIажиевичлул ихтияр дуллунни. ЛачIун уклай минутIрагу гьаннин, цаннал увтунна, мукуна кIилчинманалгу увтунна.
Нава ух хьуну тIий нач хъанай ур къаучиншиврул лавгра бяст-ччаллия махъсса тренировкалийн. Муний Ибрагьим ХIажиевичлул ттухь увкуна: «Аслан, вия къаоь­ккисса боксер укканссар», — куну.
Гихунай боксрал бяст-ччаллий на цалчин ххув хьусса чIумал, тту­хьхьун кагу дуллуну: «На вихь къакунав вия ххаллилсса боксер укканссар, куну», — тIива. Мяйжаннугу, лачIунуккаврихун агьну ивкIссания, гьарцаннал утлай, ттуя варши хьунссия. Ибрагьим ХIажиевич ия хIакьсса педагог ва психолог. Ганан чIалай бия ттуву лачIунуккаврил пагьму бакъашиву.
Турнир сакин дурминнахь ва муний гьуртту хьун бувкIминнахь барчаллагь увкуна Ибрагьим Ибрагьимовлул душнил Заирал ва, ванал тарбия увсса, Ххажалмащиял ДЮСШ-лул директор Юсуп АхIмадовлул.
Бяст-ччаллий яла шавкь думи бия мюрщулт. Цалла цIа учавривун, ми гьавасланну лахъайва сахIналийн. Бух хьуми яхI гъавгъун, аьтIун бикIайва. Укунсса журалул бяст-ччаллай ххув хьуминнал цIардайну цалла командалулгу, шяраваллилгу, щалла райондалулгу цIа бюхттул шайшивугу кIулну, му цIа дуруччин цайрагу хъуннасса жаваблувшинна душивугу бувчIлай, хIарачат буллай бия гьаксса.
ДакIний личIансса, яргсса хьунни турнирданий ххувхьуминнан бахшишру дуллалисса шадлугъ. Хъунисса турнирдай кунма, ххувхьуми ва хьхьичIунсса кIанттурду бувгьуми лахъан буллай бия шачIанттайн. Миннан дуллунни медаллу, дипломру ва арцуйнусса бахшишру.
Турнирданий гьуртту хьусса спортсментал, тренертал, судьятал -цинявппагу ца зумату кунма, байкъалитIавай, буслай бия турнир лавайсса даражалий хьушиву. Яла-ялагу кIицI лаглай бия, бувчIа-къабувчIаву къархьуну, паракьатну лагаву. Барчаллагьрай бия хъинсса хъамалушиндарахлу.

Лакрал райондалия
турнирданий хьхьичIунсса кIанттурду бувгьунни:

24 килолул кIушивруву: Ханов ХIасан-Басрил -2-мур кIану; Исмяилов Баширдул 3-мур кIану.

26 килолул кIушивруву: Ханов Иманаьлил -1-мур кIану; ХIусманов Мурадлул — 2-мур кIану; ХIажиев Оьмардул — 3-мур кIану.

50 килолул кIушивруву: Насу­хIов Юсуплул – 3-мур кIану.

60 килолул кIушивруву: Щам­ххалов Ризваннул – 1-мур кIану.

65 килолул кIушивруву: Сулайманов Аьбдулжалиллул – 1-мур кIану; ХIабиев ХIажинал – 2-мур кIану.
Командарттал дянив 1-мур кIану бувгьунни Гергебиллал район­далул командалул (тренер МахIмудов ХIажимурад);
2-мур кIану — Лакрал райондалул командалул: шанма – 1-мур кIану, шанма – 2-мур кIану ва шанма – 3-мур кIану (тренер Оьма­ров Илияс).
3-мур кIану – «Спартак» СДЮСШОР-данул командалул.