Уттигъанну ДР-лул Культуралул министерствалуву хьунни «Душа Дагестана» премия дуллалисса батIаву.
ДакIнийн бутан, ва хъанай дур ДР-лул ХIукуматрал премия шинал лажиндарай культуралуву, халкьуннал искусствалуву дурсса хьхьичIуннайшивурттахлу дуллалисса.
2015 шинал «Душа Дагестана» премия ларсми барча буван увкIун ия ДР-лул ХIукуматрал председательнал цалчинма хъиривчу Анатолий Карибов. Шадлугъравух гьуртту хьунни культуралул министр Зарема Буттаева, мунил хъиривчу, ДР-лул Культуралул министерствалучIасса РДНТ-лул директор Марита МухIадова ва м.ц..
Республикалул БакIчинал ва ХIукуматрал чулуха «Душа Дагестана» премиялул лауреатътал барча буллалисса махъ лахълай, Анатолий Шамсуттиновичлул цалва ихтилатраву чIурчIав дунни ларгсса шин культуралул иширттал чулуха авадансса диркIшиврий, Дарбантуллал 2000 шин шаврил шадлугърал, Дагъусттаннал ва Дарбантуллал Кьинирду Парижлий ЮНЕСКО-лул штаб-квартиралуву даврил, мукунна цайми-цаймигу творчествалул проектру щаллу даврил дагъусттаннал обществалул, аьмну республикалул сипат ххуй чулий ккаккан давриву хъунмасса бутIа бивхьушиврий. КIицI лавгунни Парижлийсса Дагъусттаннал Кьинирдай Дагъусттаннал ва ЮНЕСКО-лул дянивсса гуманитар аралуву чирчусса цачIусса зузаврил кьутIи (Коммюнике) хъанахъишиву республикалул культуралул цинявппагу зузалтрал, миннавух ва премиялул лауреатътуралгу, хьхьичIуннайшиву, ххувшаву душиву.
«Душа Дагестана» 2015 шинал премия ларсун дур республикалул районнаясса 15 инсаннал, 8 номинациялуву. Миннавух бур хореографтал, музыкантътал, балайчитал, халкьуннал театрдал режиссертал, м.ц. Миннавух бур Лакрал райондалиясса ХIажимахIамма МахIаммадов ва Ккуллал райондалиясса Марина Ибрагьимова.
