Вай гьантрай жулва шагьрурдал ва щархъал сайки гьарцагу культуралул идаралуву ЦIусса шинал байрандалун хасъсса, мюрщулт ххари бансса, шадлугъру дуллай бур. ЦIусса шинал байран дур жулва оьрчIан ца яла ххирамур, щаллусса шинай цих ялугьлай бикIайсса язимур байран.
Итни кьини «Россия» КРЦ-лул концертрал залдануву, МахIачкъалаллал администрациялул Культуралул управлениялул сакиншиннаралу, хьунни «Новогодний подарок – каждому ребенку» тIисса ихIсандалул акция.
З. АьбдурахIманова
Байрандалий гьуртту хьунни ятинсса, чIявусса оьрчIру бусса, ахIвал-хIалданул кIюласса ва нину ягу ппу акъасса кулпатирттавасса республикалул шагьрурдаясса ва районнаясса 800-ксса оьрчIру.
ЦIусса шинащал, хъинсса чIа учавурттащал, оьрчIру барча бан байрандалийн увкIун ия МахIачкъалаллал администрациялул бакIчинал хъиривчу Рафик Буттаев, шагьрулул Культуралул управлениялул хъунама Фарид Абалаев, Кировский райондалул администрациялул бакIчинал хъиривчу ХIабибат ХIасанова ва оьрчIан ялунсса кIулшивуртту дуллалисса Центрданул каялувчи Альбина Ботвина.
Ва кьини шадлугърайн хIадур дурсса концертрал программалул сакиншинна дурну дия Кировский райондалул КIулшивуртту дулаврил отделданул, ялув кIицI лавгсса Центрданул педагогтурал ва дуклаки оьрчIал гьурттушинна дурну.
ОьрчIру дазу-зума дакъа ххарину бия сахIналий чIюлу бувсса, чанна лавхъсса елкалия, ганил лагма лавгун цивппа кIинтнил магьлувун бувцусса Дякъил Ттаттая, Марххаладушния, цанма ххирасса магьравасса Аьжужа Къария тIайла хьуну, цаймигу персонажирттая. СахIналийсса артистураяр махъун къабагьлай, карнавалданул янна-уссавусса оьрчIру цивппагу, байрандалувух гьурттуну, ЦIусса шинан хасъсса назмурду ккалай, ссигъри бувчIлай, Дякъил Ттаттал буллалисса тIуркIурдавух чялишсса гьурттушинна дуллай, къавтIий, балайрду тIий, хороводру дуллай бия. Ва кьини залдануву Дякъил Ттаттал магьлул хъунчантайлува бахшиш къаларсъссагу цуппа ца оьрчI къаливчIхьунссия. Бахшишру дачIлай, Дякъил Ттаттал мурадру дузал буллай, залданувух зирангну лечлай бия авурсса лаххи-ликкиярттавусса ванал мюрщи кумагчитал-гномталгу.
СахIналий мукунма оьрчIал хьхьичI цалва гьунарду ккаккан бунни «Арабеска – М», «Салам» тIисса оьрчIал къавтIавурттал ансамбльлал ва «Капелька» тIисса вокалданул группалул.
Мюрщи тамашачитал, мукунма, гьуртту хьунни циняв цачIусса, тяхъасса флешмобравухгу.
Шадлугърал ахирданийгу кинотеатрданул администрациялул цала чулуха оьрчIан ккаккан дунни оьрчIан ххира хьусса, хIазсса мультфильмру.
