Ларгсса нюжмардий Цалчинмур МахIачкъалалив Каммаевлул цIанийсса кIичIираву «Соколенок» тIисса 20-сса, цIусса, уттизаманнул тIалавшиннардугу дусса, оьрчIал садик тIитIлатIисса шадлугърал батIаву хьунни.
Шикку гьуртту хьунни ДР-лул Халкьуннал Мажлисрал председатель Хизри Шихсаидов, МахIачкъала шагьрулул бакIчи МахIаммад Сулайманов, шагьрулул КIулшиврул управлениялул хъунама ТIагьир Мансуров ва цаймигу идарарттал каялувчитал.
Ва оьрчIал садик бувну бур ца шинал дяниву. Садикраву 330 оьрчIансса кIану бусса бур. Шиву бикIан тIий бусса бур 14 группа. Гьарца группалун бикIан тIий бусса бур школалийн гьаннин дарсирдах гъира бутлатисса, тяхъасса дарсру дихьлансса, бигьалаглансса цанма-цанмасса къатри. Шиву бур музыкалул, физкультуралул, дарсру дихьлансса кабинетру ва логопед, психолог зунсса кабинетру. Бур, чIирттай оьрчIисса суратру, накьичру дирхьусса, дукра дукай кIану ва медициналул блок. Садикрал хIаятраву бур мюрщулт гьавалийн сайрданий буккан бансса лази-лавкьусса беседкарду, тIуркIу тIунсса спортрал площадкарду ва уртту-тIутIив дургьусса газонну, мюрщи багъру.
Шадлугъ тIитIлатIисса хъун дакъасса концертрая махъ, садик тIитIин ихтияр дуллусса шагьрулул бакIчинал кIицI лавгунни, цумур-цагу шагьрулий, шяраву оьрчIал цIаний дуллалимур даврия хъунмасса пахру бикIан аьркиншиву, ва садик тIитIаву ца мюрщултран бакъасса, миннал ниттихъанссагу бахшиш хъанахъишиву.
Садик тIитIаврищал микрорайондалул халкь барча буллалисса махъ лавхъунни Хизри Шихсаидовлулгу. Ванал бувсунни махъсса 2 шинал дянив жулла республикалий 1000-ксса чIивитIун кIану хьусса садикру тIивтIушиву. КIицI лавгунни ванийну ирглий бавцIусса оьрчIал сияхI ттигу чIири къархьушиву.
— ХIакьинусса кьини ца МахIачкъалалив оьрчIал садикирттавун цалла чIун дияннин ялугьлагьисса 12 000-ксса оьрчI бур. Республикалул бакIчинал ва жул цинявнналагу мурад буссар 5-6 шинал дяниву ва масъала щаллу бансса, — увкунни ванал.
Хъирив вайннал цащала лавсун бувкIсса ссайгъатру пишкаш бунни оьрчIал садикрал коллективрахьхьун ва оьрчIахьхьун.
Шадлугърал ахирданий циняв шикку гьуртту хьусса хъамаллурал садикрал лагма-ялтту бувккун, хъун дакъасса экскурсия дунни.
