Ттун хъинну ххирар ттулла буттал шяравалу Шахьуйми. Машан ларсун эяллу, шинай цалвагу жува шяравун биян, бацIан, дуварду къатри. Гъинттул чIумал, оьрчIал оьрчIругу бувцуну, хIарачат бувару чара бакъа буттал шяравун гьансса. Амма ца нюжмардува зана хьун багьай махъунмай, Каспийскалийн, оьрчIру бизар хъанай.
Шяраву бакъар клуб, жагьилми бялахъансса кIану. Хъинну хьунссия шяраваллил жагьилтал буххансса клуб тIитIирча, ивтун миччаллил каялувшиву данмагу, лавсун музыкалул ца-кIива инструментгу, шашкарду-шахматругу. Жугу бавияв жущава шаймур, жулва чулухасса ци-бунугу кумаг, луттирду, мукунна цамургу, клубравун ларсун бувкIун. Ттул адамина ур музыкант, мунал цикссагу шиннур Каспийскаллал музыкалул ва хореографиялул кIулшиву дулаврил гимназиялуву дарсру дихьлай, оьрчIаву музыкалухсса ччаву дихьлай. Муналгу оьрчIан цащава шаймур лахьхьин банссия, миннал бизаршиву лиххан дан, музыка ххираминнан, музыкалул инструментру бищун лахьхьин ччиминнан. Баванссия, хьхьичIва кунма, ссувхIатру, жагьилтал куннан кув кIул хьунссия. На душваран лахьхьин бавияв кIунулул давурттив ва цаймигу мюнпатсса давурттив дан. КIулмуния зарал бакъархха!
Бакъар медпункт, цакуну оьрмулул хъунанан тIий, чIивинан тIий кумаг аьркин хьурчагу.
Вай на тIисса клубгу, медпунктгу шяраву, шагьрурдая бигьалаган бувкIун, мюрщи-хъуни гьарза шайсса гъинтнил ца 3 зуруйссавагу тIитIирча, жу хъинну барчаллагьрай бикIанссияв. Хъинну хъунмасса умуд бур вай гьарзатрал ялув пикри банхьуви шяраваллил ва райондалул администрациярдал тIисса.
Субарижат Оьмариева ва шяраваллил махъсса агьлу
ш. Каспийск – ш. Шахьуйми
Укунсса чагъар бувкIунни уттигъанну «Илчи» кказитрал редакциялийн. Ихтилат шикку Шахьуйннал шяраваллия бухьурчагу, ва тагьар Лаккуйсса цайми шяраваллангу хасъсса духьунссар. БикIан аьркинни клубругу, хьхьичIва кунма, жагьилтал, оьрчIру ссахух-бунугу гьан бувансса, шахматирдай, шашкардай буклансса, жагьилтал цинявппагу цачIун батIлансса, куннащал ку кIул хъанансса. Цуппагу махъсса, цайми миллатирттащалми ташурду чIяву хьусса чIумал, ца шяраваллил, ца миллатрал ца бунугу цIусса ташу хьуншиврул.
БикIан аьркинни медпунктругу, инсаннан цалчинсса кумаг буванссавагу. Кумаг аьркин хьума райцентрданийн машиналий иян аннин (мугу хIадурну бухьурча), ягу Гъумучату «Анаварсса кумаграл» машина бияннингу къачансса хIал хъанай бухьувкун.
Шяраваллаву клубру бивкIссания, ца къахьурча, ца жагьил бюхъайвахха музыкалухух, шахматирдахух гьангу, му савав хьуну, гихунайгу миннуха зун.
Умуд бур ва кIанттух, ва масъалалух кIанттул администрациялул бикIу, райондалул администрациялул бикIу аьркинсса ургъил, къулагъас дуванссар тIисса.
Бадрижамал Аьлиева
