На оьрчIнийсса чIумал, шяраваллаву бикIу, шагьрулий бикIу, жагьилминнавугу, оьрмулул бугьараминнавугу сийлийсса тIуркIу бия шахматирттай буккаву. КкурчIа-чIирах, шаппа-шаппа цинявппагу лагма лаган бувну, чIал чIумалнин буклан бикIайва. Нажагьссарагу ужагъ къадикIайва ичIува шахматру бакъасса. ХIакьинусса кьинигу ва бухьунссар яла ня щурущи даймур, инсаннал аькьлу-кIулшилун мюнпатмур спортрал жура.

Шахматирттаву личIину за бувчIайсса бакъанугу, ттунма ва спорт ххуй бизай муттаэтурал куннан куннал цIунцIия къадайсса буну тIийгу. Къаххирар бишлай, ччанну щилай, оьттувух бувккун, кIулшилия гьаннин биллалисса рахIму-цIими бакъасса спорт. Амма хIакьинусса жагьи-жугьултрал чIявучин мукунмур спорт язи бугьлай бур. КъакIулли ва ттизаманнул оьрмулул тIалавшинна дуссарив. Жула буттахъачIа хъинну сийлий бивкIсса шахматирттай буккаву нукIура кунна вардишну дакъар цIана. ЧIявусса бакъар му журалул спортрахун багьсса. НахIакьдан. Наварив хъинну ххари хьура шахматирттай уккаврихун агьну, чIивисса оьрмулуву чIярусса ххувшавуртту ларсъсса Шайхаьлиев Джохар Мирзабагович лакку оьрчI усса кIул шайхту. ЧIава шахматист Джохардуягу, ванал ххувшавурттаягу цимилагу бавссия телевизорданувух, амма ва лакку оьрчI ушиву къакIулссия. Утти кIул хьунни Джохар ЦIуссалакрал шяравасса ушиву. ЦIана ванан 10 шин дур. Шахматирттахун агьну ур 7 шинаву. Ва чIирисса чIумул дянив Джохардул цимивагу бяст-ччалливух гьуртту хьуну цалчинсса кIанттурду бувгьуну бур.
Октябрь зурул 16-20-нний Ма­хIачкъалалив, Анатолий Карповлул цIанийсса школалул къатраву, хьуссия шахматирттай буккаврил Дагъусттаннал чемпионат. Му чемпионатрай 13 шин хьуннинсса оьрмулул оьрчIаву цалчинсса кIану бувгьуну, Джохар тIайла увкссар ноябрь зурул 1-10-ннийнин Ессентукилий нанисса федерал округрал чемпионатрайн. Ва чемпионатрай гьуртту хъанай бивкIссар Ухссавнил Ккавкказуллал 7 региондалиясса 250 спортсмен. Джохар уклакисса 13 шин хьуннинсса оьрмулувусса оьрчIал группалуву 45 спортсмен ивкIун ур. КIива бяст-ччалливу муттаэнащал цакуццуй увккун, арулунниву ххув хьуну, ласун бюхъайсса 9-гу очколува 8 очко лавсун Джохар ххув хьуну ур му чемпионатрайгу.
— Ухссавнил Ккавкказуллал Федерал округрал чемпион хIисаврай утти Джохар Дагъусттаннал чулуха Аьрасатнал первенствалийн гьантIиссар. Му хьунтIиссар апрель зурул 15-25-нний Сочилий.
ХIакьинусса кьини Джохар ур Дагъусттаннай яла итххявхсса, вихшала дишин бучIисса шахматистуравасса ца. ХьхьичIра хьусса Аьрасатнал первенствалий Да­гъусттаннал шахматистураву яла хьхьичIунма ва ия, — тIий буслай ур Джохардул тренер, КIулушацIрал шяравасса Мусаев Мансур Назирович.
Джохар мяйжаннугу гьунар бусса оьрчI ушиву исват буллай бур укунсса иширалгу. Гьашинусса Дагъусттаннал чемпионатрай ва уклай ивкIун ур 15 шин хьуннинсса оьрмулувусса оьрчIащал. Цаяра оьрмулул хъунисса спортсментуращал увккун, миннаяргу ххув хьун бювхъуну бур.
Шиккува кIицI бан, Джохардул буттан Мирзабаглунгу ххирар шахматирттай уккан. Ванал бувтун бур арснавунгу шахматирттахсса гъира. Гъирагу мукссава хъунмасса бивкIун бурхха, Джохар нюжмардий кIийла лагайсса ивкIун ур тренировкардайн Новолакрая Избербашлив. Ванал тренер Мансур Назирович уттинин Избербашлив зий ивкIун ур. Уттигъаннурив ванал МахIачкъалалив тIивтIуну бур «Гамбит» тIисса шахматирттал школа. Утти ванал тренировкартту дикIан тIий дур Избербашливгу, МахIачкъалаливгу.
Мансур Мусаев оьрмулул жагьилсса унугу, мадара опыт бусса тренер ур. Избербашливсса шахматирттал школалийн ваначIан 40-нния ливчусса оьрчIру занай бур. МахIачкъалаливмур школа тIивтIуну хъунма хIал къавхьунугу, шиккугу салкьи хьуну бур ванал группа.
Укунсса тренерначIан агьавривугу Джохардун хъунмасса тIайлабацIу хьуну бур.
Вай гьантрай чIиви шахматистнал цIунилгу ххари бунни цува ххирами.
Ноябрь зурул 15-нний МахIач­къалалив хьусса «Папа, мама, я – шахматная семья» тIисса нукIура аьдатравун дагьсса кулпатирттал дянивсса шагьрулул тIиртIу турнирданий гьуртту хьуну, Джохардул ва ванал буттал Мирзабаглул цалчинсса кIану бувгьунни. Гьашину кIилчинни Шайхаьлиевхъал кулпат ва турнирданул чемпионтал хъанахъисса.
Ва турнир дувайссар гьарица шинах, МахIачкъалаллал администрациялул ва спорткомитетрал сипталий, шагьрулул агьалинал дянив шахматирттал сий гьаз даву ва кулпатирттал аьдатру дуруччаву мурадрай. Турнирданий шахматрай бу­ккулт цания ца нитти-буттащал ягу бава-ттаттахъащал гьуртту шайссар. Гьашинусса ряххилчин­сса турнир хас дурну дия щалагу дунияллул ОьрчIал кьинилун ва А. Карповлул цIанийсса шахматирттал школа тIивтIуну 10 шин хъанахъаврин.
Шикку гьуртту хьунни щалвагу Дагъусттанная 30-ннийн бивсса кулпатру.
Миннувугу кIива хьхьичIсса кIану бувгьунни лакрал кулпатир­ттал. Цалчинмур – Шайхаьлиевхъал, кIилчинмур — Асваровхъал.
Ва турнир лавайсса даражалий тIайла дуккансса харж-хурж цала бакIрайн лавсунни ОАО «Ростелекомрал» Дагъусттаннайсса филиалданул ва «Визаж Косметикс» ООО-лул. Вайннал дунни ххув хьуминнан ва призертуран багьлул ххирасса бахшишругу.
Джохар Шайхаьлиевлул оьрмулуву уттиния тихуннай цимирагу турнирду ва чемпионатру хьунссар. ХIакьинусса ххувшавуртту дахьра дайдихьур. Хъунмасса умуд бур гьунар бусса спортсменналгу, тренерналгу вайннуяргу бюхттулми ххувшавуртту ларсун ххари банссару жува тIисса.
Ва ялагу, миллатрал цIа гьаз дансса гьунар бусса спортсментал жула лакрава чIявусса букканнав тIий, учин ччива жула оьрчIахь, жагьи-жугьултрахь шахматирттах гъира бусса, му спортрахун багьан ччисса бухьурча, маитадакьару зухьхьунна дирирсса сант. Бу­хьхьияра цIуну тIивтIусса «Гамбит» тIисса шахматирттал школалийн. Щин кIулссар, бюхъайхха буккан Дагъусттаннаягу жулла цIа-кьини бюхттул дансса Карповхъул ва Каспаровхъул.