Республикалий Цасса ПаччахIлугърал Экзаменнал хIасиллу хьхьарасса душиврийн бувну, Республикалул БакIчи Рамазан АьбдуллатIиповлул тIалавшинна дунни укуннасса экзаменну учи
тельтурал дянивгу дуван.
Вай гьантрай республикалул шагьрурдал ва районнал школардай учительтурал дуллунни оьрус мазрал ва литературалул дарсирдал ЕГЭ-рду. Дуллунни ми ЕГЭ-рду ЦIуссалакрал райондалул школардай зузисса 74 учительналгу.
Учительтурал кIулшивурттал даража ххал буллалисса экзамендалул ялув бацIаву дуллай бия КIулшивуртту дулаврил ва элмулул министерствалул вакил Мамлакат Аьбдуллаева.
Вай экзаменнал сакиншинначиталну бувккунни райондалул КIулшивуртту дулаврил управлениялул зузалт. Учительтурал экзаменну дуллунни тайра оьрчIал экзаменну дуллай бивкIсса материаллайн бувну.
ЦIуссалакрал КIулшивуртту дулаврил управлениялул хъунама Руслан МахIаммадовлул бувсунни учительтал кIулшивурттал даражалух бурувгун 3 группалийх бачIинтIишиву. Вай экзаменну дулаврил мурад хъанай бур учительтурал хьхьарасса кIанттурду ялун личин бувну, уттиния тихунмай миннал даража гьаз байсса курсру цукун сакин бан бурив ххал бан. Руслан МахIаммадовлул бувсунни учительтурал уттиния тихуннай математикалул, биологиялул, тарихрал дарсирдал ЕГЭ-рду дулунтIишиву.
