Ца шин ва дачIи хьунуккар Лакрал райондалий жагьилтурал администрация зий. Жагьилтурал администрация бур райондалул жагьилтал кIанттул цилакаялувшиннарал органнащал дахIаву дуну райондалул администрациялучIа зузисса жяматийсса орган. Му сакин бувну бур жагьилтал райондалул социал-экономикалул тагьар хьхьичIуннай шавриву гьурттушинна дулланшиврул, жагьилтурал политика дачин давриву райондалул бакIдургьуминнан кабакьу булланшиврул.
Мунил гьануми мурадруну ккаклай бур: жагьилтурал администрациялул пикрирдая райондалул жагьилтурахь буслай, ми цалла давривун кIункIу буллалаву. Жагьилтурал администрациялухь дусса дур райондалул социал-экономика хьхьичIуннай давриву цала маслихIатру райондалул бакIдургьуминнал хьхьичIун ласланссагу ихтияр. Чялишсса гьурттушинна дуллай бур ми райондалул оьрчIащалсса ва жагьилтуращалсса даврил отделданул дуллалисса давурттаву. Жагьилтурал администрациялувун бухлай бур 18 – 30 шиннардил оьрмулувусса жагьилтал.
Жагьилтурал администрациялий каялувшиву дуллалисса райондалул администрациялул информациялул ва аналитикалул отделданул хъунама АхIмадов Тiагьирдул бусласимунийн бувну, вайннал дан дакIнийсса давурттавун бухлай бур цаппарасса социал буруккинтту щаллу бансса ва хъун хъанахъисса ник ватан ххирану тарбия дан кабакьу буллалисса проектру.
Миннан цалчинма-цалчин дузрайн бувккун ччисса проект бия Гъумучиял паччахIххуллий мюрщисса ччюрк дичай къуршив бишинсса. Мунил ялув жагьилтурал администрациялун багьссар райондалул цаппарасса идарарттал хьулурду лахъан, ми идарарттал каялувчитурал хьхьичI бацIан. Райондалий дакI аьтIисса жагьилтурал хьхьичI бихьлахьисса мурадру хъинчулий ккаклай, ми бакIуйн буккан бан арцуйну кумагру бувну бур райондалул азарханалул хъунама хIакин АьбдурахIин Дибировлул, ЦСОН-далул хъунама Шяпи Щурпаевлул, 11-мур аптекалул хъунама Аьбдул МахIаммадовлул. Финотделданиий зузисса МахIаммад Бавасулаймановлул буллуну бур цемент. Къуршив бихьлахьисса кьини жагьилтурал администрациялул давривух хIала бувххун, иширайну чIарав бавцIуну бур цIу лещан дай идаралул зузалтгу.
Амма къуршив бишаву къагьархха, аьркинни ми ягу бан, ишлагу буллан. Ттигъанну жунма исват хьусса куццуй, цаннал дурмур, цаннал лиян махъаллил къашайссагу чан бакъахьувкун жувува.
Жагьилтурал администрациялул цалчинсса проект чулийн бувккунни. Мунихлуну багьлай бур ми барчагу бан, миннахь барчаллагьгу учин, цайми проектру дузрайн букканшиврул миннал чIаравгу бацIлан.
Лажин хIадур дурссар
Зулайхат Тахакьаевал
