Къяннал шяраву 7 классгу къуртал бувну, Аьишат дуклан лавгун бур Буйнакскаллал хъаннил педучилищалувун. Му къуртал бувкун, тIайла бувккун бур ЧIарадиял райондалийн, Нукуш ва Ириб тIисса шяраваллавун, оьрус мазрал дарсру дихьлан. Мюрщисса оьрчIан оьрус мазрай махъру лахьхьин баннин кIулну бикIан багьлай бивкIун бур яру мазрай гай махъру учин, гай кувнницIун кув бахIин.
Мунияту хъунмасса захIмат бан багьну бур яру маз лахьхьин. Ца шингу дурну, зана хьуну бур жулла Ккуллал райондалийн. Къянив кIантту бакъа, тIайла бувккун бур Хъювхъиял шяравусса школданий зун. Шикку зий дурну дур 2 шин, яла хьуну бур кIану цила буттал шяраву. Шикку зий дурну дур 16 шин. Яла, къашавай хьуну, багьну бур Къизлардайн. Гикку бувну бур операция. Ххуй хьуну махъ, райкомпартиялул ва тIайла бувккун бур 6 клуб буххайсса Жданово тIисса шяравусса Культуралул къатлувун. Му клубрай зий хьуну дур 23 шин. Клубрал даву ххуйну нани дурну тIий, ванин дуллуну дур чIярусса грамотартту, арцуйнусса бахшишру. Шикку зузиссаксса хIаллайгу бан багьну бур ялагу операциярду. ЗахIматсса кIанттава буккан бувну бур жула шяравучу хирург Кьасимов Кьасимлул. Хъунасса Заннал кабавкьуну, жул дада уттигу сагъну дур.
Жу хъунмасса барчаллагь тIий буру цинявппагу хIакинтурахь, шаймур бувсса жу, ряхва оьрчI, ятинталну къаличIан. Дадал хъуни бувссар шама арс ва шанма душ, циняв оьрчIал оьрчIругу.
Жу цинявннал «дадай» чайну тIий, циняв чIаххувралгу, хъуниналгу, мюрщиналгу учайссар «дадайка» куну. Цанчирчан дада бур дакI-аьмал ххуйсса, хъунанал хIурмат бусса, чIивиманай цIими бусса, дакъанан дулун ччисса, цинявннай рахIму бусса.
Жул дадан «Илчи» хъинну ххирассар, мудан му чичайссар, жугу буккайссар. Дадал макьаларттугу цимиллагу рирщуссар кказитрай.
Ххирасса жулла дадан дакIнийхтуну чIа тIий буру цIуллушиву, ххаришивуртту, хъиншивуртту. Ина оьрчIалгу, оьрчIал оьрчIалгу ххари дуллай личIаннав. Уттинин кунма, вания тинмайгу вин хъунасса Аллагьнал кумаг баннав.
Виха дуаьлийсса вил душру, оьрчIру, оьрчIал оьрчIру ва гъан-маччами
