Апрель зурул 27-нний Ла­ккуй, Карашрал шяраву, кIицI ларгунни Хъарас щаврил байран. Ва ххуллухсса Хъурда­ккаврил заллуну ия гьашинусса барачатрал кьуру цайнма кьамул бувну ивкIсса Аьбдуллул арс ХIажиев Роман.
Гьарица чулуха тIиссакссагу, хIадуршиннагу дурну, ххаллилну тIайла дурккунни Хъузалал Кьини. Му эбадатсса байрандалувух гьурттушинна дан бувкIун бия личIи-личIисса кIанттурдая ххуй-ххуйсса хъамал, вакилтал, патриотътал.
Барачатсса шин чIа тIий ялувсса Заннайн лабизлази­сса дуаьрттугу дурккуну, му эбадатрацIун дархIусса аьдатругу дурну мукьах диргьуна хъарас Хъун Хъузалал – щарнил лулттусса Кьакъурух, дуруна дялахърурду.
Муния махъ тIивтIуна Хъарас щаврил залуннал буллугъсса ссупра. Буллугъсса бия ссупрагу, буллугъсса дия цурда кьинигу, буллугъсса бия мажлисрай лахълахъисса махъругу цаннайх цаннал дачIлачIисса ххуйшивурттугу, тIутIисса балайрдугу, дуллалисса къавтIавурттугу.
Ялунсса шинал Хъузалал Кьуру ХIажиев Романнуя кьамул бунни Карашрал К. Маркслул цIанийсса колхозрал председатель Мусанниплул арс Оьмаров Исмяиллул.
Жул корр.