Ва кьини 1989 шинал дуккан дурну диркIссар Авгъаннал аьрщарая Совет аьралуннал махъра-махъсса колонна. Ахир хьуссар 10 шинал лажиндарай, 2238 кьини най бивкIсса, тарихраву ца яла лахъи лавгмунин ккаллисса дяъвилун.
Авгъаннал аьрщарай интернационалнал бурж лахълай бивкIун бур 600-ннийн бивсса совет аьралитал. 14 азаруннийн бивсса оьрмулуцIа хьуну бур. 311 инсан ятIатIар бакъа акъа хьуну ур, 72 аьраличунан дуллуну дур Совет Союзрал Виричунал цIа. Дагъусттанная Авгъаннаву къуллугъ буллай бивкIун бур 4000-нния ливчусса аьралитал, 141 аьраличунал тай дяъвилул иширттаву жанну дуллуну дур. Шама ятIатIар бакъа акъа хьуну ур. 109 жагьил чулахъ хьуну ур. Авгъаннаву жанну дуллусса дагъусттанлувтураву 4 лаккучу ур. Тай дяъвилул иширттаву ккаккан дурсса къучагъшиврухлу 769 дагъусттанчу лайкь хьуну ур личIи-личIисса аьрали наградарттан. КIиннан аьпалул хьуну махъ Совет Союзрал Виричунал цIа дуллуну дур.

А. Аьбдуллаева
МахIачкъалалив, Шамиллул цIанийсса кучалий бивхьусса паркирайн «Афганский парк» учай. Шикку кьюкьрай дацIан дурну дур Авгъаннал аьрщарай жанну дуллусса вирттаврал цIарду абад дуллалисса лухIисса мармарчарил гьайкаллу. Дур интернационал бурж биттур буллай жанну дуллуминнан дацIан дурсса аьмсса гьайкалгу. Гьарица шинах кунна, гьашинугу, февраль зурул 15-нний шикку хьунни Авгъаннаву интернационал бурж биттур буллай жанну дуллуми дакIнийн бичлачисса мажлис. Шикку гьуртту хьун бувкIун бия ДР-лул аьрали комиссар Дайтбек Мустапаев, Авгъаннал ветерантурал координационный советрал председатель, отставкалийсса генерал-майор Оьмар Муртузааьлиев, ДР-лул цIуллу-сагъшиву дуруччаврил министр Танка Ибрагьимов, ДР-лул захIматрал ва социал иширттал министр Малик Багълиев, МахIачкъала шагьрулул администрациялул бакIчинал къуллугърайсса Муртузали Рабаданов, Авгъан дяъвилул ветерантурал шагьрулул советрал председатель Аьлисултан Аьлисултанов, СаллатIнал ниттихъал комитетрал председатель Зульфия МахIаммадова, жяматрал ва ветерантурал организациярдал вакилтал.
Митинг тIиртIунни Авгъан дяъвилул ветерантурал шагьрулул советрал председатель Аь. Аьлисултановлул.
Тай дяъвилул иширттаву ливтIуминнал аьпалун минутI­райсса пахъ багьаву дурну махъ, ихтилат бунни Оьмар Муртузааьлиевлул.
— ХIурмат бусса авгъанцы, кьянкьасса зунттал арсрув!
Чил билаятирттал иширттавух хIала буххаву ххирану дарцIунни жунна. Авгъан дяъвилул азара­хъул инсантурал оьрмурду къак-щук бунни, азарахъул ниттихъан абадлийсса хIасрат дуллунни. На мукьра шин дурссар та билаятрай. Ттун щиннияргу ххуйну кIулли цукун къучагъну лархъссарив зу та кьини.
Ва хIакьину жура кIицI лаглагисса кьини хъуннасса агьамшиву дусса кьинир. Ттул дакIниву рязишиву дикIай ва кьини гъан давриву ттула хIарачатгу буну тIий. Авгъаннавун увкIун ца-кIива зурувату, тиккусса тагьар чIалай, на увкссара жула госбезопасностьрал комитетрайн та питналува дакьаврийну буккансса чаран лякъин аьркинссар тIий.
Ттущава шаймур бувссар ми нава тIутIимуний мукIру бан.
ДакI марцIну зула буржгу лавхъун зана хьуссару зу. Зу лайкьссару ччимур аякьалунгу, хIурматрангу. На дакIнийхтуну барчаллагь тIий ура зул масъалартту щаллу бан кабакьу буллалисса, зул чIарав бацIлацIисса къуллугъчитурахь, — увкунни Оь. Муртузааьлиевлул.
Ихтилатру къуртал хьуну махъ авгъан дяъвилул инвалидтурал фондрал Дагъусттаннал отделениялул председатель Арсен Лемешевлул фондрал чулухасса наградартту дуллунни «афганцынан» кумаг буллалисса къуллугъчитуран. Награда кьамул дуллай, ДР-лул цIуллу-сагъшиву дуруччаврил министр Танка Ибрагьимовлул увкунни:
«Ва наградалул на зул хьхьичI буржлув уллалиссара. На хIарачат банна ва лайкь дан. ХIадурссара ччимур чIумал ттула биялдаралу­сса медициналул идарарттайн кьамул бувну, зул цIуллу-сагъшиву къулай даврил ялув ацIан».
Митинг къуртал хьунни интернационал бурж биттур буллай жанну дуллуминнал гьайкалданучIа тIутIив дишаврийну.
Совет аьрал Авгъаннава був­ккун 25 шин шаврин хас дур­сса шадлугърал мажлис хьунни Къумукьнал театрданувугу. Шикку гьуртту хьунни ДР-лул ХIукуматрал Председательнал цалчинма заместитель Анатолий Карибов, генерал-майор Оь. Муртузааьлиев, республикалул министерстварттал ва ведомстварттал бакIчитал.
— Авгъаннавусса дяъви Да­гъусттаннал жагьилтурал хIал ххалбигьинсса ишну хьунни. ХIакьину жува хIурматрай кIицI лаглагиссару тай иширттаву хъуннасса чувшиву ва кьянкьашиву ккаккан дурсса саллатIнал ва хIаписартурал, сержантътурал ва генералтурал цIарду.
ХIакьину жагьилтураву Ватандалухсса ччаву тарбия дан аьркинссар укунсса инсантал эбратну ккаккан буллай, — увкунни цала ихтилатраву А. Карибовлул.
P.S.
Авгъан дяъвилия ихтилат багьтари, ай, та мяъна-му­рад бакъасса, щинчIав, ссанчIав къааьркинсса, кьюкьаласса дяъви бивкIссар тIутIиссагу чан къашай. Мукунсса ихтилатру хъинну кьурчIи бизлай, дакIнийн щилай бур Ватандалул тIайла бувкнийн лавгун, дяъвилул ишир­ттаву чувшиву ккаккан дурминнан, дяъвилул чулахъ бувминнан, чил аьрщарай жанну дуллусса аьралитурал нитти-буттан, уссурссуннан. Бюхъай та оьхIалсса дяъви, мяйжаннугу, жунма къааьркинну бивкIун бикIан. Мукун бухьурча му дур хIукуматралгу, аьралуннал хъуниминналгу кьюкьала, миннал яхIирайсса ттангъа. Амма цукунни му бувчIин бан миннал гъалатI ххирану бавцIуминнан. Ца акъа акъасса арснацIа хьусса ниттин, дяъвилул аьйплу бувну, жагьилсса оьрмулуву ппухълу дунияллия лавгсса ятинтуран, ня зия хьусса уссур­вал лази-лакьи буллалисса ссурвавран. Цаппарасса жагьилтал жула билаятрайвагу аьралуннавун къагьан лабикIлай бивкIсса чIумал, Ватандалия архну, чил аьрщарай дяъвилул иширттаву аьрали бурж лахълай бивкIсса совет аьралуннал саллатI ва хIаписартал ттунцила бикIайкунсса виртталну чIалай бур.