Вай гьантрай гьунар бусса композитор, пианист, дирижер, ххаллилсса педагог Рамазан Фаталиевлул оьрмулул 50 шин там хьунни.
Рамазан Фаталиев увссар хIакьсса педагогтурал – СумбатIлиясса АбутIалиблул ва Хъусращатусса ПатIиматлул кулпатраву. Цала творчествалул ххуллу ванал байбивхьуссар ХI. ХIасановлул цIанийсса музыкалул училищалуву дуклакисса чIумалва.
1982 шинал училищегу къуртал бувну, Рамазан увхссар П.И. Чайковскийл цIанийсса Москавуллал паччахIлугърал консерваториялувун. Аспирантуралуву дуклакисса шиннардий музыка чичаврицIун элмийсса ахттаршиннарду дуллалисса давурттахагу зий ивкIссар.
1992-1994 шиннардий Рамазан зий ивкIун ур Сахалиннал областьрай. Дагъусттаннайн зана хьуну махъ чялишну хIала увхссар республикалул музыкалул оьрмулувух
1994 шинал Дагъусттаннал композитортурал Союз сакин бувну 40 шин кIицI лаглагисса чIумал, щаллусса концерт Рамазан Фаталиевлул творчествалун хас дурсса ккаккан дурну диркIссар. 1996 шинал «Песня года» тIисса конкурсраву Рамазан 1-мур Премиялул лауреат хьуссар.
1999 шинал магьирлугърал ва искусствалул аралуву дурсса давурттахлу ванан «ДР-лул искусствалул лайкь хьусса зузала» тIисса бусравсса цIа дуллуссар.
2000 шинал Рамазан Фаталиев увчIуссар ДР-лул Композитортурал Союзрал председательну.
2002 шинал МахIачкъала шагьрулухасса балайрдал конкурсрай композиторнал лайкь дурссар 1-мур премия. 2003 шинал ноябрь зуруй ванал «Заслуженный деятель Всероссийского музыкального общества» тIисса цIа ларсъссар. 2005 шинал ДР-лул ПаччахIлугърал премиялул лауреат хьуссар.
Гьунар бусса композитор, гьарица чулуха марцIсса, тIайласса, дакI-аьмал хъинсса, цила икIайкунсса интеллигент Рамазан Фаталиев юбилейращал барча уллай, чIа тIий буру ванан цIуллушиву, талихI-тирхханну, гьарица ишираву тIайлабацIу.
«Илчи» кказитрал редакция
***********************************************
Май зурул 25-нний бартлаглай дур 50 шин ГьунчIукьатIрал Димокритлул ва Зинал арс Сагидов Сагидлун.
Жул хIурмат лавайсса, акъа чара бакъасса Сагид! Жу цинявппагу, ина ххирасса нину-ппу, кулпат, оьрчIру, ниттилссурвал, уссу, цинявппагу мачча-гъанми, чIа тIий буру вин цIуллушиву ва оьрмулуву талихI. Ина дуллалимуницIун Зал акьиннав.
Ина, вилва кулпатращал, оьрчIал оьрчIал ххари уллай, оьрмулул уччиннин итаннав.
Виха дуаьлийсса нину-ппу, кулпат, оьрчIру, уссу,
ниттилссурвал
