Мартрал 26-нний МахIачкъалалив ДР-лул Россельхознадзорданул Управлениялий хьунни ва идаралул ларгмур шинал дурсса давурттал хIасиллая бусласисса пресс-конференция.

Шикку гьурттушинна дурунни ДР-лул Россельхознадзорданул Управлениялул каялувчинал буржру биттур буллалисса Идрис Аьзиевлул, АьФ-лул хIукуматрал дазуйсса Ветеринар контрольданул ва транспортрал отделданул хъунама ХIажимурад Аьзаевлул, Россельхознадзорданул Управлениялул каялувчинал хъиривчу Карим Каримовлул, АьФ-лул хIукуматрал дазуйсса Фитосанитариялул контрольданул отделданул хъунмур Марина Мурсаловал.
Пресс-конференция тIитIлай, Идрис Аьзиевлул республикалул СМИ-рдал вакилтурахь гьарта-гьарзану бувсунни Управлениялул дурсса давурттая, масъалар­ттая, давриву хьунадакьлакьисса захIматшивурттая. Ванал бусаврийну, чIярусса дайшишрурду ва щаллу бан захIматсса масъалартту вайннал давриву хьунабакьайсса бур аьрщирдацIун бавхIуми суаллаву. Мукунссара къабигьасса тагьар дусса дур республикалий ветеринариялуцIун бавхIуми масъаларттавугу.
«Ларгсса 2012 шинал респуб­ликалул Россельхознадзорданул Управлениялул зузалтрал ДР-лул Ветеринариялул Комитет­райн багьайсса шагьрурдайсса ва районнайсса ветуправлениярттай аьмну республикалий дурну дур 58 хъиривлаяву, миннува – 20 пландалийн ларсун диркIсса ва 35 пландалийн ларсун къадиркIсса.
Вай хъиривлаявурттал хIа­силлайн бувну ялун личин дурну дур ветеринариялул идарарттал зузалтрал дурсса низамлиявуртту ва кIантту-кIанттурдайсса къуллугъчитурал баччибакъулшиву дурну итххявхсса гъалатIру. Укун, административ правонарушенияртту дуваврихлу, чивчуну бур 27 протокол. Аьмну низамлияндавур­ттахлу 106 азарда къурушрансса постановление чивчуну бур», — увкунни И. Аьзи­евлул.
Ванал мукъурттийну, Аьра­сатнал Федерациялул Ветеринариялул ва фитосанитариялул надзорданул къуллугърал каялувчи А.И Сауриннул тIалавшиннарайн бувну, ДР-лул Ветеринариялул комитетрал даврил тагьарданул хIакъираву 3 хъиривлаяву дурну дур. Вай хъиривлаявурттайн бувну чIярусса низамлиявуртту ялун личин дурну дур, хаснува ятту-гъаттарай шайсса лахъай азардал хIакъираву (бруцеллез, бешенство).
Идрис Аьзиевлул, мукунма, кIицI лавгунни республикалий ца яла захIматсса масъала бушиву халкьуннал цахьхьунна дуллусса аьрщи къатIайлану ишла дуллай, ми урттуран татан дитаврилмур масъалагу.
«Жулла республика аьмну щалва Аьрасатнаву дугьай аьрщи чансса дусса региондалун ккаллийссар. ХIакьину жулла шяраваллил хозяйство лирну дуну тIий шиная шинайн ми аьрщарал тагьар, бакIлахъру дулун бюхъаврил даража лагь хъанахъиссар. Шиная шинайн дугьай аьрщирду авлахъирттайн кIура даллай дур. Инсаннал цахьхьунна дуллусса аьрщи цанна ччикун ишла дуллан дуллусса кунна баччибакъулшиву дуллай ур. ХIукуматрахьгу цукунчIавсса ихтияр дакъар муначIату му аьрщарал касак махъунмай зеххин. Ихтияр духьурчагу жу дурсса тIалавшиннарду прокуратуралул къатIайлану дуршиврун хIисав дувай. ДурчIин къабюхъайсса тагьар дур кIинтнил минардай­сса аьрщарал хIакъиравугу. Ятту кIинтнил ва гъинтнил минардайн куч бавривугу дур аьрщарай зулму буллалисса нигьачIисса тагьар», — ххи бувунни ванал.
Россельхознадзорданул Ветеринар контрольданул ва транспортрал отделданул хъунама ХIажимурад Аьзаевлул бувсунни цал отделданул агьаммур мурад бушиву чил хIукуматирттая жулла республикалийн даххан ларсун нанисса дикIул продукция ххал даву ва оьрмулун нигьачIисса азарду дусса да­къасса кIул даву.
«Ларгсса шинал жул зузалт­рал ххал дурну, сияхIрайн ларсун дур 5730 транспорт 4850 хъуслил партиярдащал, миннува дикIул, дукиялул 307103 тонна дусса, миннувагу 215644 ризкьилул бакI ва 55485 азарва инкубациялул ккунукру.
Азирбижаннал ва жулла рес­публикалул дазуй халкьуннал канихьсса гьивурду ххал даймур масъала бур ца яла захIматмур. Миннал жулла республикалийн баххан бувцуну нанисса ризкьи, лелуххант чIявуну лякъай ветеринар-санитар низам къадурурччуну, цукунчIавсса ча­гъарду канихь бакъасса.
Ххалдигьлагьисса даврил хIасиллая буслай, кIицI лаган ччива жул зузалтрал ларгсса шинал республикалийн буххан къабивтшиву Туркменнава нанисса «Кампина» ООО-лул 38.131 тонна накIлил продукциялущалсса ва Гуржиянава аьнакIул дикI даххан нанисса кIива-кIива машина. Дурсса хъиривлаявурттайн бувну, Гуржиянава нанисса аьнакIул дикI ляркъуна Американава дуркIсса дикI», — бувсунни ванал.
Мукунма ХIажимурад Аьзаев­лул бувсунни чIярусса диялдакъашивуртту душиву республикалийсса лахъай азарду дусса ризкьи бухлаган бай кIанттурдацIун (скотомогильники) дархIуну.
Россельхознадзорданул каялувчинал хъиривчу Карим Каримовлул кIицI лавгунни аьрщарацIун бавхIумур масъалалия, халкьуннал цахьхьунна дуллусса аьрщарах ургъил бакъа, цIинцI, ччюрк дичай кIанттурдайн кIура баен бувну лякъайшиву. Ва суалданул хIакъираву чIярусса диялда­къашивуртту дусса дур аьрщи пахха-парссари дурну, къун, чартту, ххюл буклай, ми бахлахаврилгу хIасул дуллай. Ванал бусаврийну, дан багьлай бусса бур циняв аьрщарал инвентаризация.
Марина Мурсаловал бусаврийну, вайннал отделданул зузалтрал жулла респуб­ликалул дазурдай ххал дурну дур 660,8 азарда тонна ахъул­ссаннул, ахънилссаннул дусса транспорт. Вай хъус жулла рес­публикалийн чIяруну ларсун бучIайсса бур Азирбижаннава, Ираннава ва магърибуллал (машрикь) хIукуматирттая. МахIачкъалаллал хьхьирил порт­райсса къалмул терминалдания ларгсса шинал Ираннавун тIайла дурккун дур 164,32 тонна къалмул.
Азирбижаннава ларсун нанисса продукциялува 115 ишираву КВО лявкъуну жулла рес­публикалийн 70,3 тонна продукциялул духхан диртун дакъар.
28 ишираву карантин баян бувну 1,25 тонна хъуслил зер­ххуну, бат дурну дур.
Пресс-конференциялул ахирданий Россельхознадзорданул отделлал каялувчитурал журналистурал суаллахьхьун жавабру дуллунни.