КIулушацIрал администрациялувун духлай дур шанна шяравалу: ЧIурттащи, КIулушацIи, Читтур. Шаннагу шяраву ялапар хъанай ур 420 инсан. Гъинттул чIумал бучIай шагьрурдаягу.
КIанттул агьамшиву дусса масъалартту шяраваллил администрациялул щаллу байссар шяраваллил советрал депутатътурай, райондалул администрациялий, шяраваллал агьалинай, идарарттал хъуниминнай ва ишбажаранчитурай бивхьуну. Шяраваллил администрациялий зий ур мукьа инсан. Ларгсса шинал хъунмур къулагъас дуллай буссия агьалинащалсса даврих. Шяраваллил жямат хъунаманачIан бучIай аьрщи ишла даврил, арцуйнусса кумаг ба учин ва цаймигу суаллал ялув. Жу хIарачат буллай буру агьалинал чулухасса цавагу тавакъю биттур къабувну къабитан.
2012 шинал на ряххийла хьунаавкьура жяматращал. Шинал лажиндарай администрациялул зузалтрал хIадур дурссар администрациялул даврил хIасиллал отчетру ва райондалул идарарттал ва властьрал органнал тIалавшиннардансса чагъарду.
Администрациялул сияхIрайн ларсун дуссар цинярда аьрщи ва миннуха зузими. КIанттул бюджет микку ялапар хъанахъисса инсантурал аьдад хIисав дурну щаллу буллай бухьувкун, ми итадаркьусса арцу шяраваллил къайгъурдан диял хъанай дакъар.
Администрация ялув бавцIуну буссар аьралуннаву къуллугъ байсса чIумувусса жагьилтал сияхIрайн ласаврил. Январь зурул 1-ннийн бияннин сияхIрайн лавсун ур 60 жагьил.
Шяраваллил советрал давривун, мукунма, бухлай бур тIабиаьтрал апатIирттая ва цIу дагьаврия мюхчаншиву, терроризмалия ва экстремизмалия буруччаву. Му мурадрай, шяраву сакин дурну дуссар арула инсаннаясса дружина. Мюхчаншиву дуруччаву мурадрай, шяраву дурссар щинал дайгьузанну, кIичIирттавун бувцуну буссар чани.
Шяраву буссар ЧIурттащиял школа ва КIулушацIрал байбихьулул школа (микку дуклай уссар 40 дуклаки оьрчI), ФАП ва клуб.
2011 шинал ЧIурттахь типовойсса спортзал бувну махъ чялиш хьунни шяраваллил жагьилтал ва дуклаки оьрчIру спортрахун машхул шаву. Зий буссар кIива багьлухсса секция: лачIунбуккаврил ва волейболданул. Гъинттул ДГПУ-рал студент, спортрал мастернал цIанийнсса кандидат Юсупов Нураттин уссия дуклаки оьрчIру кикбоксинграйн вардиш буллай. Футболданул, волейболданул ва теннисрал командарттал махъсса кIира шинал лув-ялув райондалул администрациялул бакIчинал завалунсса турнирдай 1-2-ми кIантту бувгьуссар. ЧIурттащиял школалул командалул ларгсса шинал кIилчинмур кIану бувгьуссар «Безопасное колесо» республикалул конкурсрай. Дайссар жагьилтал ватан ххирану тарбия баврин кабакьу буллалисса давуртту. Гьарца шинал байссар Аьпалул вахта. ОьрчIру тIутIал шалкращал батIайссар Хъун дяъвилия зана къавхьуминнан дацIан дурсса гьайкалданучIан.
Сантирайн дагьну дуссар агьали бигьалагаврил даву. ЧIун-чIумуй дайссар магьирлугърал давуртту. ХIакьину шяраваллил клубраву зий уссар мукьа инсан. Мунил директор АьлихIажи Щамхаловлул цаллагу чялишсса гьурттушинна дайссар райондалий хъанахъисса магьирлугърал давурттаву. Ларгсса шинал МахIачкъалалив хьуссар ванал цалалусса балайрдал концерт. Дуссар тамансса наградартту ва хIурматрал грамотарду.
Ларгсса шинал клубрал ва школалул сакиншиннарайну шяраву дурссар ЦIусса шинан, Ватан дуру­члачиминнал кьинилун, Хъаннил байрандалун, Ххувшаврил кьинилун, КIулшивурттал кьинилун, Учительтурал кьинилун, Ниттил кьинилун хас дурсса байранну. Гульшан Хасаевал дуллусса арцух ЦIусса шинал байрандалийн оьрчIан ларсъссар бахшишру.
Хъун дяъвилул ветераннал щащар ДучIиятусса Оьмарова Сапижат ичIаллил шартIру ххуй дан мюхтажминнал сияхIрайн лавсун буссар.
Админисрациялувун дагьлагьисса шяраваллаву дурссар марцI-чапалшиврул ялув бацIлацIисса давуртту.
Ларгсса шинал шяраваллил администрациялул дурссар вай давуртту: шяраваллал кIичIирттаву бивхьуссар 25 чирахъ; администрациялул 2 кабинетраву дурссар ремонтру; бакьин бувссар ххуллурду – Читтурув 1, 5 километралийхсса, ЧIурттащиял шяравух – 300 метралийхсса, КIулушацI – 400 метралийхсса; ЧIурттахь 50 метралийхсса щинаххуллу бакьин бувссар, мукунма баххана був­ссар щинал турбарду; КIулушацI 1, 5 километралийх ва Читтурув 2, 9 километралийх бувцуссар щинаххуллурду; бакьин бувссар КIулушацIсса щаращи; КIулушацI бувссар зиярат; КIулушацI ялагу бувссар оьрчIру бялахълансса майдан; дакьин дурссар ЧIурттахь трансформатор ва КIулушацI ттукIрал ххаллу; ЧIурттахьсса кьакьалийх ламу бувссар; шяраваллил клубран лавсъссар аккордеон, мандолина, ччергъилу, чIу лахъ байсса аппаратура; администрациялун лавсъссар матахI, компьютер, принтер, ксерокс; ЧIурттахь ва Читтурув дакьин дурссар гьайкаллу; ЧIурттахь школалий бивхьуссар пластикалул чIавахьултту; марцI бувссар ЧIурттахь ва КIулушацIсса бярду.
КIулушацIрал советрал администрация барчаллагьрай бу­ссар муданма жяматрал чIарав бацIайсса Сиражуттин ва Марат Илиясовхъайн, ХIасанхIусайн Камаловлуйн (Читтур); Гульшан Хасаевайн, Нурислан Къушиевлуйн, Шагьимардан Мудуевлуйн, АгъарахIим Жяъпаровлуйн, Низами МахIаммадовлуйн, МахIаммад МахIаммадовлуйн (ЧIурттащи); Карин Ссунгъуровлуйн, Манолис Аьбдуллаевлуйн, Аьбдуссамад Лагиевлуйн, Шамсуттин Камаловлуйн, Илияс ХIажиевлуйн (КIулушацIи).
Аскандар ХIажиев,  КIулушацIрал шяраваллил администрациялул бакIчи