Апрель зурул 19-нний Гъумук Хъунмасса Буттал кIанттул цIанийсса дяъвилия зана къавхьуминнал гьайкалданучIа хьунни Ххувшаврил 68 шин шаврин хас бувсса Аьпалул Вахта тIитIлатIисса батIаву. Мунил сакиншинначитал бур райондалул администрациялул ОьрчIащалсса ва жагьилтуращалсса даврил ва туризмалул отдел, КIулшиву дулаврил управление ва магьирлугърал къатта.
Зулайхат Тахакьаева
Муний гьуртту хьунни райондалул бакI дургьуми, шяраваллал бакIчитал, идарарттал хъуними ва зузалт, учительтал ва дуклаки оьрчIру, га кьини райондалий дайдихьлахьисса СССР-данул спортрал мастер Ибрагьим Ибрагьимовлул аьпалун хас дурсса лачIунбуккаврил турнирданийн бувкIсса чIаххувсса районнаясса хъамал. Гьантлия гьантлийн ххялтIа дуклай дур дяъвилул цIаравух бувкминнал кьюкьа. Жущалва бумигу шанурдацIух буну, ва ххуллух цаягу ветераннаща къабювхъунни Аьпалул Вахталий гьуртту хьун.
Аьпалул вахта тIитIлай, райондалул администрациялул ОьрчIащалсса ва жагьилтуращалсса даврил ва туризмалул отделданул хъунама МахIаммад Гадаевлул кIицI лавгуна дяъвилул майданнайва ливчIсса жулва ватанлувтал цIунилгу хIурматрай дакIнийн бивчуну, миннал рухIирдая алхIам бувккуну, хъун хъанахъисса никирахь та яла оьттул ттур дурксса дунияллул кIилчинмур дяъвилий жулва ппухълуннал дурсса виричушивурттая бусаву ва хIакьину жущалва буми ветерантурахь Бюхттулсса Ххувшаврихлу барчаллагь учаву мурадрай, гьарцагу шинал апрель зуруй Ххувшаврил байрандалул хьунийн щалвагу билаятрай шайшиву аьдатравун багьсса Аьпалул Вахтарду.
Ванал кIицI лавгуна райондалул щархъавусса Хъун дяъвилия зана къавхьуминнал аьпалунсса гьайкаллах райондалул администрациялул хъуннасса аякьа дуллай бушиву, ми гьарца шинал Ххувшаврил байрандалул хьунийн дакьин дайшиву, цIудуккан дайшиву.
Дяъвилий ливтIуминнал рухIирдаяту кьулгьу-алхIам бувккуна чIярусса шиннардий Гъумук ялапар хъанахъисса хъуначу-захIматчи АьбдурахIин Абакаровлул.
Райондалул администрациялул ва депутатътурал цIания дяъвилул ветеранталгу, Аьпалул Вахталийн бавтIмигу барча бувна Лакрал райондалул администрациялул бакIчи Абакар Къюннуевлул.
— Лакрал райондалий бакъахьунссар цавагу кулпат Хъун дяъвилул щавщи къабивсса. Жулла райондалия аьрайн лавгун бур ряхазарунная ливчусса чиваркI. ЧIивисса лакрал миллатрава ххюннал лавсун бур Виричунал цIуртти. ЧIявусса лайкь хьуну бур орден- медаллан. Хъиннува чIявур дяъвилул аьйплу бувми. Ххувшаву ласун хъунмасса кIану бувгьуссар дяъвилул цIу къизгъинний талай бивкIминнал бакъа, ЗахIматрал дяъвилий гьурттушинна дурминналгу. Ккаши бувхIуну, цалла дусса хъус-хъиншиву дяъвилун тIайла дуклай бивкIссар ми. Лув-ялув шамилва лайкь хьуссар ПаччахIлугърал комитетрал обороналул Занази ЯтIул Ттугълин ва му абадлий ливчIссар райондалучIа. Хъун дяъвилийгу, къинттуллухгу ппухълуннал дурсса виричушиврул, чувшиврул, захIматрал эбратрай тарбия буллан аьркинссару жува жула хъирив нанимигу. Дяъвилул лажин ккаркми дунияллия гьаннин бюхъайссаксса чялиш дара хъун хъанахъисса ник ватан ххирану тарбия даврил ялувсса даву школарттайгу, жагьилтурал дянивгу, — увкуна ванал.
Ккурккуллал школалул директор Даниял Магьдиевлул кIицI лавгуна махъсса шиннардий политиктал хъунмасса хIарачат буллай бушиву Хъун дяъвилул тарих баххана бан. Дяъвилул лажин ккаркнанни хIакьмур кIулсса, миннал бусласимурди лаласун аьркинсса, увкуна ванал.
Аьпалул Вахталий ялагу ихтилат бувуна Лакрал ва Ккуллал районнал Аьрали комитетрал отделданул хъунама ХIусман Маммаевлул. Райондалул жагьилтурал цIания ветерантал барча бувуна Гъумучиял школалул учительница Жамила МухIуевал:
— Жу пахрулий буссару жулла тархъаншиврул цIаний цалла жагьилсса жанная ка ларсун талай бивкIсса жулва виртталсса ппухълунная ва жувагу хIадурну буссару кьини дуккарча, ватандалул цIаний, гай кунма, гьаз хьун, — увкуна ванил.
Райондалул дуклаки оьрчIал цIания ветерантал барча бувуна РайхIанат Жалаевал ва Замира Атоевал.
Аьпалул Вахталун хас дурсса митинг къуртал дуруна Дагъусттаннал ва Аьрасатнал гимнру руцаврийну.
Шиккува кIицI бан, Аьпалул Вахталийн хаварбакъулий бакIрайн багьсса цайми районнаясса хъамал кIицI лаглай бия ватан душманная дуручлай, дяъвилул майданная зана къавхьуминнал аьпа ябаву жуйвасса мубараксса бурж хъанахъишиву ва му бурж Лакрал райондалий лайкьну биттур буллай бушиву.
