Мартрал 4-нний ДР-лул Президентнал кIанайма Рамазан АьбдуллатIипов гьуртту хьунни «Нергиз-Дагестан» тIисса Турциянал ва Дагъусттаннал янна щащай фабрика баврил цалчинсса чару бишаврин хасъсса шадлугърай.

Ва 800 млн. доллардансса проект ишакаш дуллантIиссар 3 шинал лажиндарай. Инвесторнал цалчинмур хъус (продукция) ласунтIиссар фабрика буллай байбивхьуну махъ ца шин лях ларгукун. Шикку дуллантIиссар ххаллу, зунтIиссар янна щащай станокру, дуллантIиссар лаххан хIадурсса янна. Проектрая хъунмасса мюнпат хьун тIий бур экономикалунгу, инсантурангу. 5500 зузи кIану хьунтIиссар, миннувату 4000-ллихъайсса кIанттурдай душру-хъами зунтIиссар. Мунияту проектрай ккаккан бувну бур фабрикалучIа 1000 оьрчIансса садикгу, спортплощадкагу бан. Тиккун занантIиссар транспортгу. Ми гьарзат украссар. Проектрай, мукунма, ккаккан бувну бур щин марцI дайсса сооруженияртту, фильтрарду, лагмасса тIабиаьтран зарал къабияншиврул. Мунияту фабрикалун дулунтIиссар дунияллул халкьуннал даражалул экологиялул сертификат.Тиккува бугьантIиссар мурхьругу, тайннуха къуллугъгу буллантIиссар цалва инвестортурал.
Компания «Нергиз» зий бур 50-ллихъайсса шиннардий. Мунил ххуйсса дахIавуртту дур ханхъус дулайминнащал ва хIадурсса хъус даххан ласайминнащал.
Фабрика бантIисса кIанай компаниялул ният кIул хьуну махъ ДР-лул Президентнал кIанайма Рамазан АьбдуллатIиповлул увкунни:
— ХIакьину жува чару бихьлай буру ттизаманнул предприятие бансса кIанай, ванил дуккан дуллансса хъус тIалав дуллай бур жучIарагу, чIаххувсса регионнайгу. Ва предприятиялий зунтIиссар 4000-яр ххишаласса душру-хъами. Шикку бикIантIиссар ххуйсса харжру, оьрчIал садик, поликлиника, азархана, спортзал.
Шадлугърай ихтилатру бунни, мукунма, проектрал сиптачи, «Нергиз» холдинграл Директортурал советрал председатель Джавит Чаглардул, «Нергиз-Дагестан ЗАО-лул гендиректор Наида Джамуковал, Къумтуркъалаллал райондалул бакIчи Руслан Тотурбиев.
Яла бивхьунни цалчинмур чару бихьлай. Агарда инвестортурал ният щаллу хьурча, ялунчIил мартрай фабрика зий байбишинтIиссар.
ХIадур бувссар
ХI. Аьдиловлул