Вай гьантрай МахIачкъалалив «Дагэнергосеть» ОАО-лий хьунни мунил хъунама директор Муртазяли Гитинасуловлул журналистуращалсса пресс-конференция. Муний агьаммур ихтилат бия республикалул электросетевой комплекс цачIун баврия.

Зулайхат Тахакьаева
Пресс-конференция тIитI­лай, М. Гитинасуловлул кIицI лавгуна ларгсса шинал ноябрь зуруй Аьрасатнал Президент В. Путиннул къулбас дуршиву МРСК холдинграл гьанулий щалва билаятрал электросетьру кIунттихьхьун ласунсса ОАО «Российские сети» сакин дансса указ.
«Мунийн бувну, жул хьхьичI бацIлай бур региондалул энергосетирдал реорганизация дансса мурад. Электросетьру цачIун дурну къуртал дан багьлай дусса дур июнь зурул ахирданийннин. ХIакьинусса кьининин дурну дусса дур цаппара давуртту. Ми давуртту даншиврул, цIакь дурну дусса дур электросетирдал муниципал объектру тапшур даврил ххуллурдал карта. Ххалбивгьуну бусса бур электросетьру цачIун даврил хIадуршиннарал суаллугу.
Дагъусттаннай дусса дур «Дагэнергосеть» ОАО-лувун къадухлахисса сетьру, цивгу МахIачкъала, Каспийск, Къизлар, Къизилюрт ва Даг.огни шагьрурду ттукIрал дузал буллалисса. Дусса дур, колхозру духларгун махъ, заллу-зал акъа лирчIсса, 1600 км. ттукIрал ххаллал. Ми ттукIрал ххаллу цала балансрай дакъахьурчагу, «Даг­энергосеть» ОАО-лул хIакьинусса кьинигу ми кIанттурдайсса агьали ттукIрал дузал буллай бусса бур. Мукунна заллу-зал акъар, проектру дакъанна, шагьрурдай ва щархъаву цIуну дуллалисса къатравун дурцусса, 1300 км. ттукIрал ххаллалгу», — увкунни Муртазяли Гитинасуловлул.
Журналистурал суаллахьхьун жавабру дуллай, ванал кIицI лавгунни итабакьлакьаврия байбивхьуну муштаритурачIан бияннин, ттукIрал чIявусса заллухъру бушиву. Мунийн бувну, щаллу къавхьунма личIлай бушиву, ттизаманнул тIалавшиннардацIун бавкьусса, электросетьру хьхьичIуннай даврийн багьайсса чIявусса суаллу.
«Мукунсса шартIирдай жапану бур агьали ттукIрал дузал баврийн, ишла бувсса ттукIрахсса багьа ласаврийн багьайсса суаллу щаллу бан. Электросетьру цачIун даврийну вай суаллу бигьану биттур бан бюхълантIиссар», — увкунни ванал.
Тарифирдал хIакъиравурив Муртузяли Гитинасуловлул кIицI лавгунни СКФО-лул цайми регионнах бурувгун, Да­гъусттаннай ттукI кьювкьуну бушиву. «Электросетьру цачIун даврийну агьалинан ттукI ххира баврия нигьачIаву дакъассар,» — увкунни Муртузяли Гитинасуловлул.