ДР-лул Президентнал буржру чIумуйну биттур буллалиману Рамазан АьбдуллатIипов ивтун махъ, республикалул агьалинаву хъинмунийнсса, ххуймунийнсса умудру цIулавгунни, мукунна властьрайнсса вихшалагу. ЦIуну итайхтува, ДР-лул Президент ивунни цаппарасса районнайн. Миннул бакIчитурай бигарду бивхьунни, кутIасса чIумул мутталий, ччюрклицIа марцI дуван районну. Уттивагу марцI банхьуви шагьрурду ва шяраваллурду ччюрклицIа.

Бадрижамал Аьлиева
Февральданул 23-нния тиннай Роспотребнадзорданул Дагъусттан Республикалиймур Управлениялий зий дайдирхьунни «Мусор!» цIанилусса «горячая линия». Му цIушиннарал хIакъиравусса хъунбакъасса ихтилат хьунни ттул ва Управлениялул пресс-секретарь Камила ХIамзатоващал. На буллусса цаппарасса суаллахьхьун жавабру дуллай, Камила ХIамзатова буслай бур:
— МарцIшиврул масъалалул­сса Роспотребнадзорданул ДР-лул Управлениялул муданмагу буллалиссар. МарцIшиврул ялув бавцIуну, аьркин дакъанийн ччюрк дирчуминнай, къабагьавайни муркъирду бувминнай аькIри дихьлай мудангу буссар. ДР-лул Президентну цIуну Рамазан АьбдуллатIипов ивтун, мунал ва масъалалух багьайсса къулагъас дуллан икIайхту, жулмур даву цукссагу бигьа хьунни. Цанчирча, районнал администрациярду жу тIутIимуних ургъил буллан бивкIунни. Микку иш анжагъ Дагъусттаннай ччюрк ча-чунгу душивруву бакъарча, аккредитироват бувсса цавагу муркъи бакъашиврувугу бур.
Ва даву лядуккан даншиврул, ДР-лул Хъунмур санитар хIакин Элеонора Оьмариевал сипталийну, тIиртIуссар «Мусор!» цIанилусса горячая линия. Му тIиртIуну махъ, республикалул агьали оьвтIий байбивхьунни жучIан. Линия зий дайдирхьусса ххюва гьантлул дянив 50-нния лирчусса зангру дирунни жучIан. ХъунмурчIин, оьвтIий бур МахIачкъала шагьрулия ва мунивун духлахисса поселокирттая, хаснува Семендердания. Оьвкунни, мукунма, Къизилюрт шагьрулия, Сулайман-Стальскаллал, Бущихъиял ва цаймигу районная. Лакрал царагу райондалия вай ххювагу гьантлул дянив, цалсса, къаоьвкунни. МахIачкъалалия оьвтIими, чIявучин, бур КОР-данул (Канал Октябрьской революции) чIарах ялапар хъанахъими ва ми аьрзирдай бур му каналданул лагма-ялтту ва муниву цивура чIярусса ччюрк душиврия. Агьалинал жучIанма оьвкуну махъ, жу левчунма ми ччюрк дукьан къалагайссаруча, ми районнал администрацияр­ттал бакIчитурая тIалав дуллан бикIайссару къабагьавай дирчуния ччюрк, муркъирду букьан баву, яни цалва къуллугърал буржру биттур буллалаву, — буслай бур Камила ХIамзатова.
Ва номерданий оьвкуну, ччинаща баян буван бюхълай бур мукунсса участокирдая: 63-48-94 – горячая линия «Мусор!».

Роспотребнадзорданул ДР-лулмур Управлениялул сипталийну, мукунна 2017-ку шинайннинсса, «Отходы» цIанилусса республикалул целевой программа сакин дувансса плангу дур. Мунил лагрулуву щаллу булланссар медициналул ва биологиялул духличIрурдацIун бавхIусса, закондалийн ва технологиялул щаллушиннарайн багьай­сса, республикалул шагьрурдай ччюрк ччуччайсса ва ччюрклива кIилчин ишла данмур дуккайсса заводру баврил ва чIявусса цаймигу масъалартту.

Вава масъалалийн дагьай­сса давурттив дуллай бур ДР-лул ТIабиаьтрал луртаннал ва экологиялул министерствалийгу. Уттигъанну му министерствалуву хьунни «Проблема обращения с отходами производства и потребления на территории РД» цIанилусса батIаву. Мунивух гьуртту хьунни МахIачкъалаллал природоохранный прокуратуралул каялувчи Аь. НурмахIаммадов, Росприроднадзорданул ДР-лулмур Управлениялул информациялул ва аналитикалул отделданул начальник З. МахIаммадов ва цаймигу.
Му батIаврий гьарта-гьар­засса ихтилат бунни ДР-лул тIабиаьтрал луртаннал ва экологиялул министрнал хъиривчу Лейла БахIандовал. Мунил бувсунни ва министерствалул сакин дуршиву ва ДР-лул ХIукуматрал хIукмулийну цIакь дуршиву Рес­публикалул целевой программа «Комплексная система обращения с отходами и вторичными материальными ресурсами РД на 2012-2016 годы» цIанилусса программа, бувсунни ва программа щаллу дуллантIишиву шанна этапрай, шиннайх дарчIуну. Му программалул цалчинсса этапрал лагрулуву, сакин дурну дур проект «Генеральной схемы санитарной очистки территории Республики Дагестан». Му проект ххалдигьаврийнсса конкурсраву ххув хьуну бур «Институт МосводоканалНИИпроект» ОАО. Му Генсхемалийн бувну, щаллу дуллан най бур марцIшиву даврил, ччюрк датIаврил ва духлаган даврил, ми лагма-ялттусса экологиялун зарал биян къабуллалисса тагьарданийн дуцаврил, кIилчин ишла дуллан бюхъаврил ва цаймигу чIярусса давурттив. Л. БахIандовал бусаврийн бувну, му проектращал кIул хьуну бур циняв муниципал сакиншиннардил бакIчитал.
Ялугьланну жувагу ва масъала щаллу баврих, жущава бан бюхъайсса кумаг, кабакьу бухьурча, мигу буллай.