Ларгсса нюжмардий Кьубиял шяраву хьунни райондалул идарарттал каялувчитурал агьалинащалсса хьунабакьаву.
Зулайхат Тахакьаева
Хьунабакьаву тIитIлай, шяраваллил администрациялул бакIчи Заурбаг Исуповлул бувсунни ларгсса шинал шяраву дан бювхъусса ва гьашину дан дакIнийсса давурттая.
Шяраваллил жяматрал гьаз буллалисса суаллу бия, жямат кIибивщуну бушиврийн бувну, ттигу цIакь хьуну цалий дацIан дурасса СПК-лийн багьайсса, шяраваллил марцI-чапалшиврул, щинал ва ххуллурдал тагьардания, техника дакъашиврийн бувну, хъуру дугьан къахъанай бушивруя.
Кьубиял СПК-лул хъунама Сайпуллагь МахIаммадовлул бувсуна хозяйствалул гьарца шинал жяматран байсса ка-кумагирттая: къутаннай бувгьусса ппиринж жяматрайх бачIайшиву; къутаннайссагу, лаккуйссагу школарттан биххан булайшиву шан-шанма хIайван ва мукунма ЦIусса шинал байрандалийнгу дулайшиву шан-шаназарда къуруш арцул; дяъвилул ветерантуран булайшиву биххансса хIайвант; биххансса хIайвант ялагу булайшиву мавлудирттай мизитравун; хъарас щаврил байрандалийн булайшиву биххан гъаттарал хIайвангу, жяматрайх бачIин ххалал ккипругу ва ялагу чялишсса гьурттушинна дайшиву райондалий хъанахъисса мероприятиярттаву. Цалла дуллалисса давурттая ва буруккинттая бувсуна клубрал хъунама Ш. ХIамзалаевлул, школалул директор Муса Братиловлул ва цайминнал.
БатIаврил хIасиллу дуллай, райондалул администрациялул бакIчинал буржру чIумуйну биттур буллалисса Абакар Къюннуевлул кIицI лавгуна шяраваллаву агьалинащалсса хьунабакьавурттая мюнпат бушиву, миннаща цалва буруккинттал ялув, райондалул администрациялийн ва цайми идарарттайн, транспорт дакъашиврийну, гьан-бучIан жапану бушиврийн бувну.
Ванал ялагу кIицI лавгунни Кьубав ФАП бан, библиотекалул ремонт дан райондалул администрациялул кумаг бантIишиву. Ларгсса шинал Кьубиял колхозралгу, шяраваллил администрациялулгу кашилуцIух ва 250 азарда къуруш райондалул администрациялул бюджетравагу итадаркьуну къутандалий бувсса спортзал, гиву жяматрал хъатIи, мажлисру буллангу хъинну бучIи ляхълай бушиву буслай, жяматрал тавакъю бувна вихсса магъи лакьинсса кумаг бан. Абакар Къюннуевлул мунинссагу каширду лякъинну увкунни.
Жямат яла-яла ххари хьунни шяраву Гъумучиял детсадрал филиал тIитIиншиву бусайхту. ХIакьину райондалий зий бур бувагу ца детсад – Гъумуксса. Вайми щархъал агьалиначIа цалва оьрчIру я Гъумукун биян буллансса шартIру дакъа, ягу цачIава детсад бакъашиврийн бувну, оьрчIан школалийнсса хIадуршинна дулун бюхълай бакъар. Кьубав хIакьину ур 18 детсадравун лагайсса оьрмулул оьрчI. Вайксса оьрчIан школалийн гьаннинсса тарбия дулаврицIун, мукьа-ххюя инсаннансса давугу хьун тIий дур. Зузи кIантту бакъасса шяраваллил кIанттай къаоьккир. Шяраваллил администрациялул хъунаманал бакIрайн лавсунни детсадрахьхьун дулун къулайсса дачIрасса къатри ххал дан. Абакар Къюннуевлул бувсунни детсад тIитIавриясса ихтилат ттинингу гьаз бувшиву КIундиннал жяматращалсса хьунабакьаврийгу. Жун гихунмайгу детсадру тIитIинсса пикри буссар увкунни 15-нниха ливчусса оьрчIру бусса шяраваллаву.
