Ци дур зул давриву яла тIааьнмур, ххуймур тIий цIуххаву дуллалийни на, пикри къабувну, учивияв ххуй-ххуйсса, дугърисса, оьрмулул дуцири захIматшивуртту дугу-дурхIуну, оьрмулул ххуллу лайкьну бувтсса инсантуращалсса кIулшавуртту дур, куну. Уттигъанну жулва редакциялий на кIул хьура Ккуллал райондалий бакъа, шилу, МахIачкъалаливгу бусрав-хIурматрай оьрму бувтсса СумбатIуллал шяравасса Аьбдуллаева Жамилат Аьбдуллагьлул душнищал. Жамилат жучIан бувкIун бия цилва аьрххилий. Ялун нанисса 8-мур мартрал кьинилул хьунийн укунсса хъамитайпалия къачичирча, яла щиятур чичин аьркинсса, щиятур жагьи-жугьултрал эбрат ласлантIисса тIисса пикрирдащал, нагу дирирсса хIалу чIарах дуккан къаритав.

Залму АьбдурахIманова
Оьрмулуву мадара ккавксса, бакIрачIан чIявусса бувкIсса Жамилат бувну бур СумбатIлив 1932 шинал муххал ххуллул зузала Аьбдуллагьлул ва Муъминатлул кулпатраву. Жамилат ба­къасса вайннал кулпатраву ялагу бивкIун бур ца арс ва кIива душ.
Аьбдуллагьлул кулпат бивкIун бур яхъанай Дарбантлия арх бакъа муххал ххуллуцIсса къатлуву. Му кIанайн хIакьинугу учайссар тIар «Аьбдуллагьлул къала» куну.
Ца хьхьуну, ппалнил чIира зевххуну, вайннанния, щил бавцуссарив, вилцIун бавцуну бур. Ганил хъирив лавгсса ппу, аьвкъу-гъили хьуссарив, шавайвагу зана къавхьуну, шамилчинсса кьини МуъминатлучIан бувкIун бур хавар, вил лас Дарбантлив азарханалий ур, тIисса. Му цуппагу яла бявкъусса январь барз бивкIун бур. Азар ялтту дуркхьунссия, Аьбдуллагь, хъин хьун кьисмат къавхьуну, къуртал хьуну ур. Му чIумал Жамилатлун шанма барз хьусса чIун диркIун дур. Цукуннугу, ласнал жаназагу чай дирхьуну, мюрщисса лякьлул оьрчIругу хъирив лавхIуну, Муъминат Лаккуйн бувкIун бур.
Пикри хьуну бур мюрщисса оьрчIащал гилун зана къавхьуну буттал шяравува бацIан. ЧIумул гьарзат цила-цила кIанайн бувцуну,Муъминатлуща цилва оьрчIру ччаннай бацIан бан бювхъуну бур. Учительну бакъа къазунна тIисса пикрирдащал, школа къуртал бувсса Жамилат дуклан бувххун бур Буйнакскалийсса педучилищалувун. Учительнал пишакаршиврул дип­ломращал шичча ва тIайла бувккун бур СумбатIуллал школалийн байбихьулул классирттаву дарс дихьлан. Микку зий ххюра-ряхра шинава Жамилат бувчIуну бур советрал председательну. Учительнал даврил стаж зия къахьун, школалийгу нюжмардий ца-кIира дарс дихьлай бивкIун бур. Совет­рал председательну мукьра шин дурну дур Жамилатлул, амма цилла кIулшивурттал даража лахъ бан дуклан гьан­сса гъира ваниву лешлай бивкIун бакъар. Цила лякьлул оьрчIан арулла шин хьуну школалийн цалчинмур классравун гьан ан чIун хьу­сса чIумал мугу интернатрайн уллуну, Жамилат лавгун бур дуклан МахIачкъалалив пед­институтравун. ОьрчIру ххирасса, вайннахь цуппа дарс дихьлай чIалачIисса хияллу бакIраву щашлаши­сса Жамилатлул хияллугу хияллайнува ливчIун, буттал шяравун бучIаврищалва ва тIайла бувккун бур райондалул ОНО-райн инспекторну зун. ЧIяйннал школалийгу цаппара ссятру дуллуну дур, яла Ваччавгу дуллуну дур. Дахьва даврихун ххавахлахисса ппурттуву Жамилат партийный органдалул райисполкомрал секретарьну бивтун бур. Цилла хьхьичIмур даврищал ва давугу дачин дан ванин къабигьану бивкIун бур. Ги­кку цаппара шинну дурну махъ Жамилат райкомрал пропагандалул отделданул хъунаманал хъиривчуну бивтун бур. КIиккугу ваницIун дархIуну дур парторганизациялул секретарьнал даву. КIиччагу Жамилат бувчIуну бур райкомрал секретарьну. Микку зий кIира-шанна шин хьусса чIумал кулпатраву хьусса захIматсса ишру сававну, Жамилатлун гьан багьну бур Лаккуя. БувкIун бур МахIачкъалалив. Шикку ванил захIматрал ххуллун лайкьсса кьимат бишлай, цуку-цукунсса давурттал жаваблувшинна дуллай бивкIсса инсан буссарив хIисавравун лавсун, Жамилатлул хьхьичI вай кIанттурдай уку-укунсса давуртту дур, чув зунна, ци даву язи дугьанна, тIисса суал хьхьичI бивхьуну бур. Миннувух ччарчан рыбоконсерварттал заводрай профкомрал председательнал къуллугъ бивкIун бур, ччарчан III Интернационал фабрикалул парткомрал секретарьнал къуллугъ бивкIун бур. Жамилатлун пикри хьуну бур къатлулмур масъала ччяни чув щаллу хьун тIий бурив микку зунсса. Мукунмур суал щаллу хьун тIий бушиву ванихь бувсун бур «Каспий» тIисса мебельданул фирмалий. Шикку парторганизациялул секретарьну зий ванил хьуну дур мукьцIаллахъул шинну. ХIакьинусса кьинигу Жамилат зий бусса бур шикку кадрардал отделданул хъунмурну ва парторганизациялул секретарьну. Жамилатлул арс Шамхаллул къуртал бувну бур филологиялул факультет. Учитель хьунсса кIулшивуртту ласурчагу, ванал цалвамур оьрму хас бувну бур аьралий къуллугъран. Хизриев Шамхал ур 1999 шинал жулла республикалийн чачаннал къачагътал ххявхсса ишир­ттал гьурттучи. Микку хьусса цIунцIия сававну Шамхаллул аьрали къуллугъ кьабивтун бур. Жамилатлул бусаврийн бувну, бакIрачIан чIявусса бувкIун, хъунмасса захIмат биширчагу, арснаясса ва мунал кулпатраясса, вайннал дянивусса шанма душниясса, ца арснаятусса ххаришиврул, рязишиврул хьхьичI цикIуй къадацIайсса дур. Жамилат бур чIярусса лайкьсса цIардан, диплом-грамотардан ва бахшиширттан лайкь хьусса цила хIакьсса зузала ва захIматрал ветеран.
Жамилат ва ялун нанисса щалла дунияллий кIицI лагайсса Хъаннил байрандалущал барчагу буллай, чIа учин ччива вин цIуллу-цIакьшиву, гихунмайгу оьрму бутлансса тавпикь, оьрчIая, оьрчIал оьрчIая ххари-шадшиву ва миннаясса неъмат.