23марта, делегация во главе с врио Президента республики Рамазаном Абдулатиповым приняла участие в торжественных мероприятиях, посвященных Дню Конституции Чеченской республики.
Мартрал 23-нний ДР-лул Президентнал кIанайма Рамазан АьбдуллатIипов бакIчисса Дагъусттаннал делегация гьуртту хьунни Чачаннал Республикалул Конституциялул Кьинилун хасъсса шадлугъирттай.

Делегациялувух бия ДР-лул Халкьуннал Мажлисрал Председательнал 1-ма хъиривчу Николай Алчиев, ДР-лул ХIукуматрал Председательнал хъиривчу Абусупиян Хархаров, ДР-лул Халкьуннал Мажлисрал депутатътал ва цаймигу.
Дагъусттаннал делегация кIира республикалул дазуй хьунабавкьунни ЧР-лул парламентрал председатель Докуваха АьбдурахIмановлул, ганал кумагчи МахIаммад Алхазуровлул, Гудермесуллал райондалул бакIчи Ваха Насухановлул ва цайминнал.
Яла хьунабавкьунни кIи­ра чIаххувсса республикар­ттал бакIчитал. Тикку Р. Аьб­дуллатIиповлул Р. Кьадыровлухь барча увкунни байран кьини. ДР-лул Президентнал кIанайманал, мукунма, бувсунни АхIмад-ХIажи кьянкьану тIалав буллай ивкIсса референдум баву яла тIайламур ххуллу-хха бивкIшиву, цанчирча ганил дуккан дуруна Чачаннал республика дяъвилул тагьарданува ва Чачаннал агьалинан паракьатшиву щаллу дуруна. [pullquote]Дагъусттаннал делегация гьуртту хьунни Чачаннал Республикалул Конституциялул Кьинилун хасъсса шадлугъирттай.[/pullquote]
«Чачаннал Республикалун ва Дагъусттаннан аьркинссар уртакьну зун культуралул ва гуманитар бутIраву, экономикалул ва спортрал масъаларттаву, цанчирча жулва халкьру аьмсса тарихрал цачIун буллалиссар, ттинияр тихунмайгу хIарачат буллан аьркинссар ва дусшиву цIакь дуван», — увкунни жулла республикалул бакIчинал.
Р. Кьадыровлул барчаллагь увкунни Р. АьбдуллатIиповлухь цивппа барча бан учIаврихлу, бувсунни цалва хьхьичIсса масъалану чIалай бушиву Дагъусттаннащал дусшиврийсса арарду цIакь даву. Ганал мукунма хъин чулий ккар­ккунни Р. АьбдуллатIиповлул кIира республика гъан даврил цIаний дуллалисса давуртту.
Яла Грозный шагьрулул ПаччахIлугърал театрдал ва концертирттал залдануву хьунни юбилейран хасъсса шадлугъру.
Чачаннал Республикалул бакIчинал аьла-ссалам бунни шадлугърай гьуртту хьуминнахь: «На зуйн хъамал къаучинна, зу буниялагу жул уссурваллу, жул халкьуннайн, Республикалийн кьини дурксса чIумал жул чIарав бивкIсса. Зу кумаг бувссар жул регион ччаннай бацIан бан. Буниялагу хIакьину республикалий агьамшиву дусса кьини дур.
АцIра шин бюхъай му хъунна­сса чIун къадикIангу, амма ми жун дия захIматсса кьинирду – аькьувалул кьинирду. Гьарца кьини чан личIлай бия жул мачча-гъансса, дустал. ЦIанагу жун, кьинилия кьинилийн тIиссакссагу, захIмат хъанай бур, цанчирча дунияллия лавгунни жун яла аьзизми, маччами инсантал, миннавух Чачаннал 1-ма Президент ва ганащал архIал зий бивкIми. Амма тайннал хIарачатрайнур жун дакьаву, паракьатшиву хьусса».
Рамазан АьбдуллатIиповлул ихтилатраву бувсунни 10 шинал хьхьичI байбивхьуну бивкIшиву чIявусса бакIрачIан бувкIсса, кьянкьасса чачаннал миллатрал цIусса тарих.
Ихтилатчинал мукъурттийн бувну, Чачаннал Конституциялул цалчинсса ххану хъанахъиссар Кьадыровхъал тухум. «Ва конституциялул дайдихьулувух гьурттуну ивкIссар В.В. Путин, ганал хIукму хьуссар га референдумрацIун кабакьин. ХIакьину Чачаннал Конституция зий бур, га сагъну бур Рамзан Кьадыровлул хIарачатрайну. Бю­хъай Р. Кьадыров цавайннан ххуй излай икIан, цайминнан къаххуй излай икIан, амма га чара бакъа личIантIиссар цалва миллатрал тарихраву цала буттащал архIал», — увкунни ДР-лул бакIчинал.
Ихтилатру бунни, мукунма, цайминналгу, яла дурккунни барча буллалисса телеграммартту. Шадлугъирттай дунни концертгу. Дагъусттаннал делегация гьуртту хьунни шадлугърал тагьардануву Грозналий цIусса Хъунмур библиотека тIитIавривугу.