Ларгсса нюжмар кьини Юсуп МахIаммадовлухь ряхра шинал лажиндарай Лакрал райондалул цIаний бувсса захIматрахлу барчаллагьгу учин, мунал цIусса лавайсса къуллугърал давриву тIайлабацIугу чIа учин бувкIун бия райондалул актив.
Дагъусттан Республикалул Президентнал ХIукмулийн бувну, Лакрал райондалул администрациялул бакIчи Юсуп МахIаммадов ивтунни ДР-лул ХIукуматрал хъунаманал хъиривчуну.
Ларгсса нюжмар кьини райондалул администрациялул актовый залданувун Юсуп МахIаммадовлухь ряхра шинал лажиндарай райондалул цIаний бувсса захIматрахлу барчаллагьгу учин, мунал цIусса лавайсса къуллугърал давриву тIайлабацIугу чIа учин бувкIун бия райондалул актив.
Зулайхат Тахакьаева
БатIаву тIиртIуна райондалул администрациялул бакIчинал буржру чIумуйну биттур буллалисса Абакар Къюннуевлул. Юсуп ХIамидовичлул барчаллагь увкуна цува райондалул бакIчину зузисса мутталий цала иширттаву, давриву чIарав бавцIуцириннахь:
«Ттинин райондалий хьусса хьхьичIуннайшивурттаву зулмур захIматрал бутIа ххину-ххишалассар,» — увкуна ванал. ЧIурчIав дуруна республикалул социал-экономикалул тагьар къулай даврил, республикалул сагъ-саламатшиву ядаврил ялув республикалул каялувчитурал хьхьичI хъунисса мурадру ва жаваблувшинна душиврий.
Райондалул администрациялул бакIчинал хъиривчу Юсуп Рамазанов, Гъумучиял администрациялул бакIчи Апанни Макьаев, райондалул Хъунисриннал советрал вакил ХIасанаьли Оьмаров, Ккурккуллал школалул директор Даниял Магьдиев, райондалул администрациялул хьхьичIунсса пишакар Мирама Эфендиева, Хъурхърал СПК- лул хъунама Закир Аьлишаев, ЧIурттащиял школалул директор Руслан Кьадиров кIицI лаглай бия Юсуп МахIаммадов райондалул администрациялул бакIчину увчIлачIисса ппурттуву лакрал махъ нанисса чиваркI Лакку билаятрал бучIантIимур мунал цIаницIун бахIлай бивкIшиву ва му цIакьсса вихшала мунал кьукьин къадуршиву.
Юсуп МахIаммадов райондалул бакIчину зузисса шиннардил дянив дурсса давурттаву кIицI ларгунни «стройка века» шавай ливчIсса Гъумучиял лицейрал къатри, лицейрачIа тIивтIусса школа-интернат, ЦIахъарату Гъумукунсса ххуллийх асфальт бутIаву, цаппарасса шяраваллаву цIусса типовойсса ФАП-ирдал къатри даву, чIяву квартирарду бусса кIива къатта бувну, ца ттигу буллай бушиву, бувния шинмай цаллагу ремонт къадурсса Гъумучиял клубрал ва спортзалданул къатри цIудуккан даву. Яла-ялагу, цинявппа пахрулий кIицI лаглай бия Юсуп МахIаммадовлул каялувшиннаралу район, социал-экономикалул ккаккиярттайн бувну, лув-ялув шамилла лайкь хьушиву зунттал районнал дянив кIилчинмур кIану бугьан.
Ахирданий Абакар Къюннуевлул Юсуп МахIаммадовлухь барчаллагьгу куну, цIусса къуллугърал буржру лажин кIялану биттур буллансса тIайлабацIу чIа увкуна.
