Итни кьини Лакрал райондалул администрациялий хьунни цIуну ивтсса виваллил иширттал отделданул каялувчи Марат МахIмудов райондалул активращал кIул уллалисса батIаву.

Зулайхат Тахакьаева
М ахъсса шиннардий Лакрал райондалул виваллил иширттал отделданул каялувчину зий уссия Буниямин Айдиев. Ва МахIачкъалалив цамур къуллугърай ивтун махъ, чIумуйнусса буржру биттур буллай уссия РОВД-лул каялувчинал хъиривчу Закир МухIадов. ЦIусса каялувчи цIакь ан райондалийн увкIун ия ДР-лул МВД-лул жяматийсса низам дуруччаврил управлениялул каялувчи Минкаил Маккашарипов.

МахIмудов Марат ЯхIиянал арс увну ур 1966 шинал Ахъушиял райондалийсса Бархъаллал шяраву. 1990 шинал къуртал бувну бур Дагъусттаннал паччахIлугърал пединститутрал физкультуралул факультет. 2006 шинал къуртал бувну бур Аьрасатнал МВД-лул академия. 1989-1994 шиннардий зий ивкIун ур Бархъаллал школалий физкультуралул дарсру дихьлай. 1994-1995 шиннардий зий ивкIун ур МВД-лул учебный центрданул инструкторну, яла Аьрасатнал МВД- лул Астраханнал хасъсса милицанал школалул МахIачкъалаллалмур филиалданул учебный отделданул хъунама инспекторну; 1995-1999 шиннардий – вава филиалдануву пишакаршиврул дарсру дихьлай; яла МахIачкъалаллал хасъсса милицанал школалий аьрали дарсру дихьлай; 1999-2004 шиннардий вава школалий аьрали дарсру дишайсса хъунама преподавательну; 2004-2006 шиннардий – МахIачкъалаллал хасъсса милицанал школалул хъунаманал хъиривчуну; 2006-2010 шиннардий – Краснодардал МВД-лул университетрал МахIачкъалаллалмур филиалданул хъунаманал хъиривчуну; 2010-2012 шиннардий – МахIачкъалаллал УВД-лул ЦIусса Хушетрайсса ТПМ ОМ-лул каялувчину; 2012 шиная 2013 шинал январь зурул 1-ннийн ияннин – УМВД-лул ППСМ-2-лул штабрал каялувчину, полкрал командирнал хъиривчуну. 
Лайкь хьуну ур ДР-лул низам дуруччай органнал бусравсса зузалал цIанин.

Райондалул администрациялул бакIчи Юсуп МахIаммадовлул бувсуна, райондалул каялувчитурал ва республикалул виваллил иширттал министрнал пикри цалийн бувкIун, райондалул полицанал хъунаманал къуллугърай ивтшиву Марат МахIмудов. КIицI лавгуна ларгсса шин, социал-экономикалул ккаккиярттайн бувну, райондалун тIайлабацIусса хьушиву. ЧIурчIав дуруна, щалла республикалунна захIмат-жапасса политикалул ва криминал тагьардануву, Лакрал райондалул виваллил иширттал отделданул зузалтраща бювхъушиврий 2011 шинах бурувгун 51, 7 % тIулдакъашивуртту чан дан.
— Мунил бусласиссар райондалул виваллил иширттал отделданий зий бушиву цалла даву кIулсса, хIакьсса пишакартал, — увкуна ванал. ЦIусса каялувчинал каялувшиннаралугу даву сантирай дачинтIишиврийн умуд къакьукьлай, Юсуп МахIаммадовлул, Марат МахIмудов барчагу увну, тIайлабацIу чIа увкуна отделданул жапасса ва нигьачIисса давриву.
Ванал ихтилатрая махъ, ДР-лул МВД-лул жяматийсса низам дуруччаврил управлениялул каялувчи Минкаил Маккашариповлул, Марат МахIмудов Лакрал райондалул виваллил иширттал отделданул каялувчину итансса министрнал аьрзагу бувккуну, бувсуна ванал инсаншиврул ва пишакаршиврул хасиятирттая.
Марат МахIмудов барчагу увну, тIайлабацIу чIа тIисса ихтилатру ялагу бувуна Лакрал ва Ккуллал районнал прокурор Светозар Оьмаровлул, Райондалул дяъвилул ва захIматрал ветерантурал советрал хъунама Сулайман ХIажиевлул.
Муния махъ цIусса полицанал хъунама кIул увуна райондалул виваллил иширттал отделданул зузалтращалгу.