Апрельданул 1-нний МахIачкъалалив дайдирхьунни столданий теннисрал фестиваль, апрельданул 6-нний дайсса Щаллагу дунияллул столданий теннисрал кьинилуцIун дархIуну. Ванил мурад – спортрахун машхул хъанахъисса инсантал цачIун бавур, теннис ххираминнан шадлугъ давур. Хъуншагьрулул администрациялул ва шагьрулул дуккаврил управлениялул сакин бувну бур теннисрай буккансса столлу ва гай бишинсса кIанттурду. Га кьини МахIачкъалаллал 1-мур ва 13-мур гимназиярттаву физкультуралул дарсирдал лагрулий дихьлай бур тIиртIусса дарсру, мастер-классру, эстафетартту, бяст-ччаллу ва цIа дурксса спортсментуращалсса хьунабакьавуртту. Школалий дуклаки оьрчIащал теннисрай бувккунни МахIачкъалаллал мэрнал хъиривчу Запир Алхасов, шагьрулул дуккаврил управлениялул хъунама ТIагьир Мансуров, столданий теннисрал федерациялул председатель Константин Аванесов.

ХI. Аьдилов