Кьанкьру лагайссар

* * * Ччурччусса накIлил оькки­сса кьанкь гьантIиссар, накI щара лархъсса кIункIурдул ялун ссиркагу дуртIусса итти бувсса ча­гъар бутарча.

* * * Ччурччусса накIлил кьанкь гьантIиссар, кIирисса накI­лищалсса кIункIур дяркъу­сса щинаву биширча. НакIливун чIиллул мицIлийсса чансса цIугу бичайссар.

* * * Каландалул дукра дуллалийни, щала къатта ххуй да­къасса кьункьал буцIай. Кьанкь къадикIан, калан шахьлахьисса кIункIурдувун бутияра, марцIсса янналул кьютIливу кай-кай бувну, ччатIул вирдакIрал касак (кIукIлумур), ягу щинавух ссирка хIала дурну, вайннуй атил дурну ацци кьалакьул лултту дахIира.

* * * ЧIиллуя чимусул кьанкь гьаншиврул, гъили бувну кьавкьсса цIу буккайссар, яла вилагайссар марцIсса щинай.

* * * Балугърал кьанкь тIахIни-кIичIулия гьаншиврул, гай цал шюшин аьркинссар ссахIвангу бувккун, яла лимондалул ккир­ттарай ссукугу дурну (лимон дакъахьурча, ссиркалий), яла цIунилгу вилаган аьркинссар укуннасса щинай.

* * * Кьаярал кьурчIишивугу, кьанкьгу лагайссар, кьувкьуну касакру бувсса кьая дяркъусса щинай вилагарча.

* * * КьацIлива лаччул кьанкь лагайссар, гъили накIлил стакан хIачIарча, петрушкалул ца-кIива чIапIи ккухIирча, дагъ був­сса кофелул цаппара ккуккурду ккухIирча.

* * * Карунния лаччул кьанкь лагайссар, чIявусса цIий ссукугу дурну, яла дяркъусса щинай кару вилагарча. Кьавкьсса апельсиндалул ягу лимондалул ккири ччуччирча, кухнилува тIааьн дакъасса кьанкь лагайссар. ХIадур бувссар Т. ХIажиевал