ДР-лул бакIчинал буржру чIумуйну биттур буллалисса Сергей Меликовлул амрулийн бувну, COVID-19 цIуцIаврийн къаршисса вакцина бувсса 60 шиная лавайсса оьрмулул инсантуран буллан тIий бур социал кумаг – дукиялийнусса.

ДР-лул ЦIуллу-сагъшиву дуруччаврил министерствалул сайтрал бусаврийн бувну, прививкалия махъ дукиялул наборду дуллай байбивхьуну бур: - Исинбаевал цIанийсса стадиондалий, - Оьруснал театрдануву, - Яруссаннал театрдануву, - Лениннул майданнийсса ДГМУ-рал къатраву. ДР-лул цIуллу-сагъшиву дуруччаврил министр Татьяна Беляевал бусаврийн бувну, 60 шинаха ливчусса инсантурал дукиялийнусса кумаг буллай бур ДР-лул Спортрал министерствалул, МахIачкъала шагьрулул администрациялул, «Чистое сердце» ва «Инсан» ихIсандалул фондирттал цачIуну. «Ишла дувара коронавирусрал инфекциялийн къаршисса вакцина бансса каширду. Буруччияра зувагу, зула лагма-ялттумигу», – оьвтIий бур министр агьалинайн. КIицI бан багьлай бур 60 шинаха ливчусса инсантал бухлай бушиву COVID-19 цIуцIаву захIматну дияйсса ва ххассал къашайсса нигьачIисса группалувун. Вайннал оьрмурду буруччинсса бувагу бусса чаран хъанай бур вакцина баву. Акция лахъи лаган тIий дур сентябрь зурул 20-ннийн ва му дикIан тIий дур вакцина байсса цайми пунктирдай. Шиккува дакIнийн бутан, прививка дан наниминнал цащалла дикIан багьлай бур паспортрал копия, ОМС-рал полис ва СНИЛС.