Ларгсса нюжмардий Лакрал театрданул актертал байбивхьунни вакцинарду буллай.

Шанма театрданул коллективрду: Оьруснал, Лакрал, Опералул ва балетрал – ДР-лул Мин­здраврал МахIачкъала шагь­рулул администрациялущал цачIуну Оьруснал театрданул чIивимур залданул фойераву бивхьуну бур вакцинарду буллансса пункт, эпидемиологиялул тIалавшиннардугу дурурччуну. Цалчин вакцина бунни Да­гъусттаннал халкьуннал артист Шамсуттин Къаплановлул, цалгу вайминнайнгу оьвчаву дурунни цивппагу, цала гъанмигу лавмартсса азардания буруччин. «Яр зу, вакциналия циван буру нигьабуслай, дуниял ясир дурсса азардания нигьабусан багьлай бунува», – тIий ур Шамсуттин Къапланов. «Цинявннан дакIнийссар ларгсса шинал сайки урчIва зурул манзилданий жува онлайн-кьаралданий зий, жунма ххира­сса тамашачитурах мякь бувккун бивк1сса. Дахьра азаргу хьхьара хьуну, жувагу тамашачитурал хьхьичIун буклай, оьрму цила кьаралданийн багьлай байбишайхту, цIунилгу лапва аьратталсса щатIи бивщун, жунма ттигу онлайн-кьаралданий зун багьунни. Ттигъанну театр­данул 85-мур сезон лакьарду онлайн-кьаралданий премьера ккаккан бувну. Хасну ттун къачча бачIвасса залдануву рольлу дугьлан. Оьрму цила кьаралданийн багьну, жува сахIналийн зана хьуну, жула тамашачитал ххари буллан бюхъаншиврул багьлай бур хIасул дан коллектив­сса иммунитет. Му хIасул даншиврул багьлай бур жунма цинявнан вакцинарду бан»,– тIий ур Къапланов. Ванал хъирив вакцинарду буллай байбивхьунни вайми актерталгу.