* * * Щюллисса барзунттив, ссурулун щусса, Зунттай ччиккул тIутIив, хьхьемай шюршусса, РахIаву щаращал, щютIуххул макьан, На шикку увссара, вари ттул Ватан М-З. Аминов

Гьарца шинал чIуннаву жунна янилун дагьлан дикIай Лакку билаятрал личIи-личIисса ххуйшивуртту. Ттул буттал шяравалу дур Щуну-Зунттул даралуву. Лагмавагу бур цаннияр ца бюхттул­сса зунттурду. ЛяличIину авурну чIалан бикIай вай инттухунмай, тикку-шикку марххала басласи­сса чIумал. КIюрххил шания бивзукун, марцIсса гьава буссар вил гьутрурду тIитIин буллай. ЧIал къархьуну дучIантIиссар инт. Марххала бавссуну, чIалачIи хьусса кIанттаву личинтIиссар дараччи-тIутIив. ДачинтIиссар тяхъасса жюр-жюрданущал кьурукьру, зунттал, ардал лаххан­тIиссар щюллисса махмурданул лаххияртту. Ва ппурттуву инсантуравугу хIасул хъанан дикIайхьунссар ляличIисса ххаришивуртту. БаллантIиссар вечI-вечI тIисса лелуххантрал макьанну, бюрчурдил тIуркIурду, чIируннал мя-гъярду. Гьарца зат ххари хъанан­тIиссар гъилисса кьинирдая. Вай кьинирдал тIааьншиврия буслай бусан къашай. КIюрххил, баргъ бувккун нанисса чIумал, вил янилун дагьлантIиссар, бирлиянтру кунма, пар-пар тIисса ур­ттуйсса хьхьемал кIунтIру. Кьинирду хъиннура лахъи хъанай, тIутIивгу чIяру хъанантIиссар. Вин баллантIиссар тIутIал кацIру буллалисса душварал балайрдал чIурдугу. Чунмай бургарчагу, ябатIин къашайсса ххуйшивурттащалсса Лакку билаят буссар вил лагма. Иза Мирзаева, Вихьуллал школалул 8-мур классрал дуклаки душ

* * * Ттуйн Амирханова ПатIимат учайссар. Дуклай бура жула шяравалличIату арх да­къасса Вихьуллал шяравусса школалий, 8-мур классраву. Лакку билаятрай гьарцагу шяраваллил лагмава бур гайннул къаралданий бавцIусса бюхттулсса зунттурду. Ттулмур шяраваллил ялув бур Щуну-Зунтту. Ванил лахъшиву дуссар 3 километралучIан диллалисса. Лап исвагьину чIалан бикIай Щуну-Зунттул хъазамрайх яларай зурчIай тIисса щинал жюружани. Щаращал бувцIусса зун­тту бур кIа цуппагу. Ца нахIуну дикIайхха щаращал дюхлулсса щин! ЧIарах нанинаща кIайннуя нахIала къабувну ацIан къашай. Лакку билаятрая чIявусса инсантал шагьрулийнмай бивзун най бур. «Вай инсантурал дакIний ци бикIайривав, Ватангу кьадиртун, бачин багьлагьисса?» - тIисса суалгу хIасул шай. Шийсса гьавалул марцIшиву, тIааьншиву, дюхлулшиву, ссавнил някIшиврул караматшиву макIра къаккаккайривав гайннан? Ва Лакку билаятрай ябивтмурда тIааьнни. ПатIимат Амирханова, Вихьуллал 8-мур классрал дуклаки душ

* * * Хъинну ххирар ттун жула Лакку билаят! Лявхъуну бура нагу Лакку билаятрай. Жула Лакку улча бур авурсса, тIабиаьт дур ххуйсса, гьава бур нахIусса, щин дур дяркъусса ва марцIсса. КIинттул марххалттанилу бикIай, гъинттул уртту-тIутIавун бахьлагай жула лакку кIанттул зунттурду. Инттухунмай, баргъ гъили буллан бикIайхту, зунттурдал щюлли ла­ххай. Яла зунттавун гьухъаллийн лагай яттил ттурзанну, гъаттарал газурду. Вай цирдагу, уртту-тIутIавух сайрду буллай, ххарину дикIай. Ттун ххирар Лакку билаят. ХIурия Исмяилова, Вихьуллал 8-мур классрал дуклаки душ